Premer-Mınıstr birqatar máseleler boıynsha keńes ótkizdi

Keńes barysynda mınıstrlikter 2022 jylǵa arnalǵan is-qımyl baǵdarlamasyn ázirleý boıynsha tómendegideı usynystaryn jetkizdi.

Saýda jáne ıntegrasııa mınıstrligi usynǵan sharalar shıkizattyq emes eksportty, ishki saýdany qoldaý ınfraqurylymyn damytýǵa, sondaı-aq áleýmettik mańyzy bar azyq-túlik ónimderi baǵasynyń ósýin belsendi túrde tejeýge baǵyttalǵan.

Bilim jáne ǵylym mınıstrligi usynǵan sharalar eńbek naryǵynda suranysqa ıe kadrlardy daıarlaý júıesin jetildirýdi, mektepke deıingi bilim berý júıesinde kórsetiletin qyzmetterdiń sapasyna qoıylatyn talaptardy kúsheıtýdi, jumsalatyn qarajattyń tıimdiligin arttyrýdy, óńirlerge úzdik pedagogterdi tartýdy, oqýshylarǵa qaýipsiz jaǵdaılar jasaýdy, erekshe qajettilikteri bar balalardy korreksııalyq qoldaýdy jáne qosymsha bilim alýdy qoljetimdi etýdi kózdeıdi. Mádenıet jáne sport mınıstrligi mádenıet salasy qyzmetkerlerin áleýmettik qamtamasyz etýdi kúsheıtý, sport seksııalarynyń, sport nusqaýshylarynyń sanyn ulǵaıtý, áýesqoı klýbtar jelisin keńeıtý, sport ǵımarattaryn salý jáne sporttyq-buqaralyq is-sharalar ótkizý, sportshylar men jattyqtyrýshylardyń áleýmettik jaǵdaıyn jaqsartý jolymen buqaralyq sportty, birinshi kezekte balalar sportyn damytý jónindegi sharalardy usyndy. Týrızm salasynda 192 ınvestısııalyq jobadan turatyn pýldy júzege asyrý josparlanyp otyr.

Aqparat jáne qoǵamdyq damý mınıstrligi jastardyń bilim alýy men jumysqa ornalasý múmkindikterin keńeıtý, olardy qoldaý boıynsha qarjylyq jáne qarjylyq emes quraldardy qoldaný, azamattyq qoǵamdy jańa qoǵamdyq shartty qalyptastyrýǵa tartý, memlekettik organdardyń halyq pen bıznestiń suranystaryn eskere otyryp, ózekti derekterdi ashýy týraly sharalardy usyndy.

Densaýlyq saqtaý mınıstrligi, birinshi kezekte, aýyldyq jerlerde halyqqa alǵashqy medısınalyq-sanıtarlyq kómek kórsetýdi damytýǵa basa kóńil bóledi — aýyldarda 80 medısına nysanyn ashý kózdelgen, jyljymaly medısınalyq keshender 3 mln-nan astam konsýltatıvtik-dıagnostıkalyq qyzmet kórsetedi.  Alǵashqy medısınalyq-sanıtarlyq kómek kórsetý uıymdarynda 70 gerıatrııalyq kabınet ashý arqyly egde jastaǵy adamdardyń ómir súrý sapasyn jaqsartý boıynsha sharalar qabyldanady. EKU-ǵa 7 myń kvota bólip, «Ańsaǵan sábı» baǵdarlamasy odan ári iske asyrylady. 8 balalardy ońaltý ortalyǵyn, 2 erte qolǵa alý ortalyǵyn ashý josparda bar.

Eńbek jáne halyqty áleýmettik qorǵaý mınıstrligi 2022 jyly 700 myńnan astam adamdy jumyspen qamtamasyz etýdiń belsendi sharalarymen qamtýdy josparlap otyr. Shamamen 5 mln adam memlekettiń áleýmettik mindettemelerimen qamtamasyz etiledi. Bıyl halyqtyń ornalasýynyń óńiraralyq sáıkessizdigin azaıtý máselelerin sheshýge baǵyttalǵan Kóshi-qon saıasatynyń jańa tujyrymdamasy men Áleýmettik kodeksti ázirleý kózdelip otyr.

Energetıka mınıstrligi elektr taratýshylarǵa baǵany ustap turý, ishki naryqtyń munaı ónimderine, elektr energııasyna, suıytylǵan jáne taýarlyq gazǵa degen qajettiligin jabý, elimizdiń otyn-energetıka kesheniniń túrli salalaryna ınvestısııalar tartý jáne t. b. boıynsha sharalardy usyndy.

Sıfrlyq damý, ınnovasııalar jáne aeroǵarysh ónerkásibi mınıstrligi usynǵan 2022 jylǵa arnalǵan sharalar AT bilim alýdyń qoljetimdiligin arttyrýdy, Nur-Sultan, Almaty jáne Shymkent qalalarynda 5G uıaly baılanys standartyn engizýdi, geostasıonarlyq emes spýtnıktik toptamalardy paıdalaný arqyly shalǵaıdaǵy aýyldardy ınternetpen qamtýdy kózdeıdi.

«Baǵdarlamanyń barlyq tarmaǵy praktıkalyq sıpatqa ıe bolýy tıis jáne halyqtyń turmys sapasyn naqty jaqsartýǵa baǵyttalǵany jón. El turǵyndary oń ózgeristerdi sezinýi úshin tıimdi sharalar ázirleý qajet», dedi Premer-mınıstr.