Úkimet • 28 Qańtar, 2022

Úkimet basshysy densaýlyq saqtaý júıesine aýdıt júrgizýdi tapsyrdy

533 ret kórsetildi

Úkimet basshysy Álıhan Smaıylov Densaýlyq saqtaý júıesiniń tıimdiligin arttyrý máseleleri boıynsha keńes ótkizdi, dep habarlaıdy Egemen.kz QR Premer-Mınıstriniń baspasóz qyzmetine silteme jasap.

Úkimet basshysy densaýlyq saqtaý mınıstrliginde jáne áleýmettik medısınalyq saqtandyrý qorynda (ÁMSQ) bólinetin qarajattyń tıimdiligin baqylaýdy úılestirý jáne baǵalaý júıesin synǵa aldy.

2021 jyly densaýlyq saqtaýǵa arnalǵan memlekettik shyǵystar 2,3 trln teńgeni nemese JIО́-niń 2,9%-yn qurady. Bul rette densaýlyq saqtaýǵa arnalǵan respýblıkalyq bıýdjet qarajatynyń 90%-ǵa jýyǵyn ÁMSQ ákimshilendiredi.

Premer-Mınıstr ÁMSQ-nyń barlyq kórsetkishteri tym jalpy jáne halyqtyń medısınalyq kómekke, sondaı-aq olardy qanaǵattandyrý úshin medısınalyq uıymdarǵa naqty qajettiligin nashar kórsetetinin atap ótti. Osyǵan baılanysty Úkimet basshysy qarajatty jumsaý tıimdiligi ındıkatorlarynyń jáne qor qyzmetin baqylaýdyń naqty júıesin ázirleýdi tapsyrdy.

«Búginde óńirlerdegi medısınalyq qyzmetterdiń 100%-y qordan qarjylandyrylady, bul halyqqa medısınalyq kómek kórsetýdi uıymdastyrý jaýapkershiliginiń artýyna alyp keledi. Bul, ásirese, ótken jyldyń sońynda, Almaty jáne Jańaózen qalalarynda jedel medısınalyq kómek qyzmetin qarjylandyrý jáne uıymdastyrý máseleleri týyndaǵan kezde baıqaldy», dedi Á.Smaıylov.

Úkimet basshysy ÁMSQ memlekettik qarajatty ákimshilendirýden birtindep alshaqtap, saqtandyrý medısınasyn damytý máselelerine jáne qarjylandyrýdyń qosymsha kózderin izdeýge nazar aýdarý qajettigin atap ótti. Ol qysqa merzimde Densaýlyq saqtaý ınfraqurylymyna táýelsiz keshendi tehnıkalyq aýdıt jáne túgendeý júrgizýdi, sonyń ishinde jabdyqtarmen jáne medısınalyq-tehnologııalyq júıelermen jaraqtandyrýdy, ana men bala, onkologııa, travmatologııa, kardıo -, neırohırýrgııa, ınfeksııalyq aýrýlar sııaqty basym baǵyttar boıynsha óńirlerdiń medısınalyq ınfraqurylymyn damytý kartasyn ázirleýdi tapsyrdy.

A. Smaıylov medısınalyq personaldy dıplomnan keıingi oqytý baǵdarlamasyn ázirleý, Densaýlyq saqtaý júıesin zamanaýı jabdyqta jumys isteı alatyn jáne jańa tehnologııalardy ıgere alatyn kadrlarmen qamtamasyz etý qajettigin atap ótti.

Úkimet basshysy densaýlyq saqtaý mınıstrligine ýákiletti organdarmen birlesip, qysqa merzimde salany basqarý, ınvestısııalyq josparlaý, qarjylandyrý jáne bıýdjetaralyq qatynastar júıesin jetildirý boıynsha sharalar qabyldaýdy tapsyrdy.

«Basty mindet – densaýlyq saqtaýdyń tıimdi júıesin qalyptastyrý. Barlyq usynystar Úkimettiń 2022 jylǵa arnalǵan is-qımyl josparyna engizilýi tıis, ony ázirleý men bekitý aıaqtalýǵa jaqyn», dep túıindedi Á.Smaıylov.

Sońǵy jańalyqtar

Uqsas jańalyqtar