Dostyq. Qandaı qasıetti sóz. Qaı halyqtyń da maqal-mátelderinde dostyq týraly kóp aıtylady, tamasha aıtylady. Birlikti barlyq, baılyq, baqyt dep bilemiz biz. Birlespegen eldiń bilegi álsiz keledi. «Birikken eki birligi joq jetini jeńedi» degendi de qazaq aıtqan. Dostyqty, týysqandyqty tý etip ustaǵandyqtan da Qazaqstan halqy kópetnosty memlekettiń myǵymdyǵynyń úırenerlik úlgisi bolyp otyr. Elbasymyz – Qazaqstan halqy Assambleıasynyń Tóraǵasy Nursultan Nazarbaev Táýelsizdiktiń tańsári shaǵynda, egemendiktiń eleń-alańynda-aq bizdiń elimizdiń bolashaǵy tek qana birlikke baılanysty ekenin basyn ashyp aıtty. Jas memlekettiń alǵashqy qadamdarynan bastap ulttyq saıasatty sarabdal júrgize bildi. Adamdardy násiline, tegine, ultyna qarap bólýge eshqandaı jol berilmeıtinin salǵan betten ańǵartty, Qazaqstanda ár
adam óziniń iskerligine, biliktiligine, parasattylyǵyna ǵana qarap baǵalanatynyn málimdedi. Is júzinde dál solaı boldy da. Sondyqtan bizdiń elimizdegi qandaı etnostyń ókili de ózin Qazaqstannyń tól perzenti, patrıoty sanaıdy. Osy eldiń qyzyǵyn birge qyzyqtaıdy, qıyndyqtaryn birge eńseredi, tabystaryna birge qýanady.
Prezıdent Nursultan Nazarbaevtyń bastamashyldyǵymen qurylǵan Qazaqstan halqy Assambleıasy – jer júzinde buryn-sońdy bolmaǵan biregeı uıym. Ortaq úıimizde tatýlyq pen kelisim bolsyn, osynda ómir súrip jatqan barsha etnostyń jáne búkil Qazaqstan halqynyń bolashaǵy úshin mańyzdy máseleler talqylanatyn alańǵa aınalsyn dep qurylǵan Assambleıa ótken jolǵa jáne bolyp jatqan qoǵamdyq-saıası úderisterge taldaý jasaý, ulttyq saıasatty júzege asyrýdyń ońtaıly joldaryn belgileý úshin taptyrmas minber ekenin alǵashqy jyldardyń ózinde kórsetip úlgerdi. Qoǵamdyq turaqtylyqty qalaı saqtap, nyǵaıtý kerek, el ómirin reformalaýdy qalaı tezdetý kerek degen máselelerdi Assambleıa músheleri shyn janashyrlyqpen talqylaı bastady. Munyń naqty nátıjesin qazir kórip te otyrmyz.
Búginde Qazaqstan Respýblıkasy ekonomıkasy qýatty, saıasaty sarabdal, ishki turaqtylyǵy myqty memleket retinde alysqa da, jaqynǵa da birdeı qadirli. Elimizdiń Eýropadaǵy Qaýipsizdik pen yntymaqtastyq uıymyna tóraǵalyqqa saılanýy munyń aıshyqty aıǵaǵy. Bizge osyndaı senim kórsetý eń aldymen Qazaqstandaǵy ultaralyq tatýlyqtyń arqasy. Nursultan Nazarbaev ózge elderde kemshilik dep sanalyp kelgen kópetnostylyqty memlekettiń artyqshylyǵyna aınaldyra bildi. Bul qandaı qadamyn da alystan oılastyratyn, kemeńger saıasatkerge tán belgi.
Men – túrik halqynyń ókilimin. Astanadaǵy qalalyq túrik etnomádenı birlestiginiń tóraǵasymyn. Qazaqstan halqy Assambleıasynyń múshesi retinde elimizdegi tatýlyqqa, birlikke, dostyqqa, yntymaqqa qolymnan kelgenshe úles qosyp júrmin. Bizge ózimizdiń tól mádenıetimizben sýsyndaýǵa da barlyq jaǵdaı jasalǵan. Osy jaqynda ǵana Astanada, Beıbitshilik jáne kelisim saraıynda Túrik Respýblıkasynyń memlekettik «Halyq bıi» ansambli óz ónerin kórsetti.
Taıaý kúnderde Qazaqstan halqyna ortaq merekeni – Naýryzdy toılaımyz. Bir-birimizge qutty bolsyn aıtamyz, jaqsy tilekter tileımiz. Nursultan Ábishuly Nazarbaev sııaqty búkil álem tanyǵan, moıyndaǵan Elbasymyz bar, tatý-tátti halqymyz bar, eńbekqor elimiz bar, jerdiń astyn da, ústin de toltyrǵan baılyǵymyz bar, yrys qonǵan jurtpyz. Osy yntymaǵymyzdy, osy birligimizdi kózdiń qarashyǵyndaı saqtaýymyz, balalarymyzǵa, nemerelerimizge, shóberelerimizge úlgi etip, ónege etip aıtýymyz, amanatqa qaldyrýymyz kerek. Solaı etý arqyly biz eldegi áleýmettik-ekonomıkalyq reformalardyń oıdaǵydaı júzege asyrylýyna jaǵdaı jasaımyz, ózimizdiń berik te baıandy bolashaǵymyzdy qamdaımyz.
Ásker PIRIEV,
Qazaqstan halqy
Assambleıasynyń múshesi,
Astana qalalyq túrik etnomádenı birlestiginiń tóraǵasy.
