Osy máselege oraı oblys ákimi Gúlshara Ábdiqalyqovanyń tóraǵalyǵymen ótken jıynda oblystyq aýyl sharýashylyǵy basqarmasynyń basshysy Talǵat Dúısebaev, kásipkerlik jáne týrızm basqarmasynyń basshysy Ferdoýsı Qojabergenov, «Baıqońyr» ÁKK» AQ basqarma tóraǵasy Erlan Nurlanbaev jáne basqa da departament basshylary esep berdi.
Aýyl sharýashylyǵy basqarmasynyń basshysy Talǵat Dúısebaev azyq-túlik qoryna qatysty naqty sharalardyń oryndalý barysyn baıandady. Búginde 34 áleýmettik dúken men 18 sýpermarkettegi arnaıy buryshta 19 túrli ónim shekti baǵada satylady. Sondaı-aq elimizde jarııalanǵan tótenshe jaǵdaı kezinde óńirdegi saýda jelilerinde tapshylyq bolmas úshin Túrkistan oblysynan azyq-túlik ónimderin tasymaldaıtyn 122 jeke kásipkerdiń tizimi jasaldy.
Turaqtandyrý qorynda 291,4 mln teńgeni quraıtyn 1 393 tonna ónim bar. Onyń ishinde birinshi surypty bıdaı uny, qaraqumyq jarmasy, kúrish, makaron, kúnbaǵys maıy, qant jáne kókónis ónimderi sekildi azyq-túlik qory jınalǵan. Munan bólek, «Baıqońyr» ÁKK» arqyly «aınalym syzbasy» boıynsha baǵany turaqtandyrý úshin kásipkerlik sýbektilerin nesıelendirýge 500 mln teńgege kelisimshart jasalýda.
«Baıqońyr» áleýmettik-kásipkerlik korporasııasynyń» basqarma tóraǵasy Erlan Nurlanbaevtyń aıtýynsha, qyryqqabat pen kartop baǵasynda ósim baıqalyp tur. Ol turaqtandyrý qorynyń ónimderinen jármeńke uıymdastyrý arqyly baǵany ustap turýǵa bolatynyn aıtyp ótti.
Jıynda óńirdegi janar-jaǵarmaı qory týraly da sóz boldy. Oblystyq kásipkerlik jáne týrızm basqarmasynyń basshysy oblys aýmaǵyndaǵy munaı ónimderiniń saýdalanýy týraly habarlama jasady. Búginde baǵanyń shekti mánnen aspaýyna kúndelikti monıtorıng júrgizilýde.
Qyzylorda oblysy
