TMKKK kimge tıesili?
Tegin medısınalyq kómektiń kepildik berilgen kólemi bıýdjet qarajatynan tólenedi jáne olar:
- Qazaqstan Respýblıkasynyń azamattaryna,
- qandastarǵa,
- bosqyndarǵa,
- Qazaqstan Respýblıkasynyń aýmaǵynda turaqty turatyn
(jáne turýǵa yqtııarhaty bar) sheteldikterge,
- Qazaqstan Respýblıkasynyń aýmaǵynda turaqty turatyn (jáne turýǵa yqtııarhaty bar) azamattyǵy joq adamdarǵa.
Qazaqstan Respýblıkasynda ýaqytsha bolatyn sheteldikter men azamattyǵy joq adamdardyń, pana izdegen adamdardyń aınalasyndaǵylarǵa qaýip tóndiretin aýrýlary bolǵan kezde TMKKK alýǵa quqyǵy bar.
TMKKK paketine ne kiredi?
Tegin medısınalyq kómektiń kepildik berilgen kólemine mynalar kiredi:
- Jedel járdem qyzmetteri, onyń ishinde belgili bir jaǵdaılarda medısınalyq avıasııany tarta otyryp (ıaǵnı shuǵyl kómek qajet bolǵan jaǵdaıda pasıentke onyń saqtandyrylǵanyna nemese saqtandyrylmaǵanyna qaramastan kórsetilýge tıis);
- Medısınalyq-sanıtarlyq alǵashqy kómek qyzmetteri (MSAK, ıaǵnı bul negizinen emhanańyzdyń ýchaskelik qyzmet deńgeıinde kórsetiletin negizgi qyzmetter), onyń ishinde:
1) eń kóp taralǵan aýrýlardy dıagnostıkalaý, emdeý jáne basqarý;
2) halyqtyń nysanaly toptaryn (balalardy, eresekterdi) profılaktıkalyq tekserý;
4) ımmýndaý (vaksınalaý);
5) salamatty ómir saltyn qalyptastyrý jáne nasıhattaý;
6) urpaqty bolý densaýlyǵyn qorǵaý jónindegi is-sharalar;
7) júkti jáne bosanǵannan keıingi kezeńdegi áıelderdi baqylaý;
8) ınfeksııalyq aýrýlar oshaqtaryndaǵy sanıtarlyq-epıdemııaǵa qarsy jáne sanıtarııalyq-profılaktıkalyq is-sharalar.
- Ambýlatorııalyq jaǵdaıda mamandandyrylǵan medısınalyq kómek (bul emhana deńgeıinde, onyń ishinde esepte turǵandar úshin jáne shuǵyl jaǵdaılar týyndaǵan kezde kórsetiletin qyzmetter):
1) AITV-ınfeksııasynyń jáne týberkýlezdiń profılaktıkasy jáne dıagnostıkasy;
2) jaraqattar, ýlanýlar nemese basqa da shuǵyl jaǵdaı kezindegi qyzmetter, onyń ishinde eldegi epıdemııalyq jaǵdaıdyń nasharlaýyn týdyratyn aýrýlar kezindegi jáne olarǵa kúdik týyndaǵan jaǵdaılarda saqtandyrylǵan mártebesine qaramastan barlyq adam úshin mobıldi brıgadanyń qyzmetteri;
3) áleýmettik mańyzdy aýrýlar kezindegi dıagnostıka jáne emdeý;
4) dınamıkalyq baqylaýǵa jatatyn sozylmaly aýrýlar kezindegi dıagnostıka jáne emdeý.
- Stasıonardy almastyratyn jaǵdaılarda mamandandyrylǵan medısınalyq kómek (aıtpaqshy, bul koronavırýspen aýyrǵan naýqastardy úıde emdeýdi de qamtıdy):
1) áleýmettik máni bar aýrýlardy emdeý kezinde;
2) eldegi epıdemııalyq ahýaldyń nasharlaýyn týdyratyn aýrýlar kezinde jáne olarǵa kúdik týyndaǵan jaǵdaılarda saqtandyrylǵan mártebesine qaramastan barlyǵy úshin úıdegi stasıonardyń qyzmetteri;
3) dınamıkalyq baqylaýǵa jatatyn sozylmaly aýrýlar kezinde emdeý.
- Stasıonarlyq jaǵdaıdaǵy mamandandyrylǵan medısınalyq kómek (pasıentterdiń belgili bir sanattary úshin aýrýhanada emdeý):
1) aınalasyndaǵylarǵa qaýip tóndiretin ınfeksııalyq nemese parazıttik aýrýmen aýyratyn naýqaspen qatynasta bolǵan adamdardy, sondaı-aq bakterııa tasymaldaýshylardy, vırýs tasymaldaýshylardy jáne qaýip tóndiretin ınfeksııalyq nemese parazıttik aýrýǵa kúdikti adamdardy oqshaýlaý kezinde;
2) ınfeksııalyq, parazıttik aýrýlardy jáne aınalasyndaǵylarǵa qaýip tóndiretin aýrýlardy emdeý kezinde;
3) saqtandyrylý mártebesine qaramastan adamdarǵa shuǵyl kómek kórsetý, onyń ishinde táýlik boıy stasıonardyń qabyldaý bólimshesinde emdeý-dıagnostıkalyq is-sharalar ótkizý;
4) josparly tártipte.
- Medısınalyq ońaltý:
1) negizgi aýrýdy emdeýde;
2) týberkýlezben aýyratyn naýqastar úshin.
- Pallıatıvti medısınalyq kómek;
- Mamandandyrylǵan medısınalyq kómek kórsetý kezinde medısınalyq kórsetilimder bolǵan kezde qan preparattarymen jáne onyń komponentterimen qamtamasyz etý;
- Ambýlatorııalyq, stasıonardy almastyratyn jáne stasıonarlyq jaǵdaılarda mamandandyrylǵan medısınalyq kómek kórsetý kezindegi patologııalyq-anatomııalyq dıagnostıka;
- Qazaqstandyqtardy shetelge emdelýge jiberý jáne (nemese) otandyq medısınalyq uıymdarda emdelý úshin sheteldik mamandardy tartý;
- Dárilik zattarmen, medısınalyq buıymdarmen, mamandandyrylǵan emdik ónimdermen, ımmýndyq-bıologııalyq dárilik preparattarmen qamtamasyz etý. (Áleýmettik mańyzy bar, sozylmaly aýrýlary bar dınamıkalyq esepte turǵan adamdar úshin qarastyrylǵan. Búginde ambýlatorııalyq deńgeıde TMKKK sheńberinde dárilik zattar men medısınalyq buıymdardyń 347 ataýy boıynsha 49 nozologııa qamtamasyz etiledi. Tizbe Densaýlyq saqtaý mınıstriniń № 75 buıryǵymen bekitilgen).
Atalǵan barlyq jaǵdaıda saqtandyrylmaǵan azamattar memleket kepildik bergen tegin medısınalyq kómek kólemi sheńberinde olarǵa kórsetiletin qajetti kómekke sene alady.
«Eger sizge shuǵyl kómek qajet bolsa, alaıda sizge MÁMS-de saqtandyrylý mártebesiniń joqtyǵyna silteme jasaı otyryp, shuǵyl kómek kórsetýden bas tartylsa, dárigerge pasıenttiń óz quqyqtary týraly málimdeý jáne olardyń saqtalýyn talap etý qajet. Qorǵa osyndaı ótinishter jıi kelip turady, sondyqtan azamattardy óz quqyqtaryn bilýge shaqyramyz», dep túsindirdi ÁMSQ basqarma tóraǵasynyń orynbasary Ilııas Muhamedjan.
Eger MÁMS úshin jarnalar tólemese, pasıentter tipti emhanaǵa júginbeıtin de faktiler bar. Esterińizge sala keteıik, joǵaryda atalǵan jaǵdaılar boıynsha tegin kómekten Sizge bas tartpaý kerek.
Sonymen birge qor medısınalyq qyzmetterdiń keń tizimin paıdalaný úshin MÁMS júıesiniń qatysýshysy bolýdy usynady. Atap aıtqanda, bul – tar beıindi mamandardyń konsýltasııalary, dıagnostıkalyq zertteýler, josparly operasııalar, sonyń ishinde qymbat turatyn operasııalar.
Aıta ketelik, qosymsha suraqtar týyndaǵan jaǵdaıda olardy emhananyń anyqtama qyzmetine qoıýǵa nemese jaǵdaıdy sheshý úshin Pasıentterdi qoldaý qyzmetine habarlasýǵa bolady. Eger sol jerde túsinistikke qol jetkizý múmkin bolmasa, siz úshin yńǵaıly baılanys arnasy boıynsha Áleýmettik medısınalyq saqtandyrý qoryna habarlasý kerek: fms.kz resmı saıty, 1406 baılanys ortalyǵy, Qoldau 24/7 mobıldi qosymshasy jáne Telegram-daǵy SaqtandyryBot.
