Úkimet basshysy «Báıterek» UBH» AQ-nyń burynǵy basqarma tóraǵasy Aıdar Áriphanovqa Holdıng basshysy retinde atqarǵan jumysy úshin alǵys bildirdi.
Premer-Mınıstr Holdıngtiń jańa basshysy Qanat Sharlapaevty tanystyra otyryp, onyń álemdegi iri ınvestısııalyq bankterdiń biri – «Sıtı» qurylymdaryndaǵy úlken basqarýshylyq jumys tájirıbesin atap ótti.
«Báıterektiń» aldyna mańyzdy mindetter qoıyldy. Birinshi kezekte, bul – ekonomıkanyń shıkizattyq emes sektorlaryn, kásipkerlikti damytý, qarjylandyrýdyń qoljetimdiligin arttyrý jáne AО́K-tegi óndiristi keńeıtý. Memleket basshysy áleýmettik-ekonomıkalyq damýdyń atalǵan baǵyttaryna basa kóńil bóledi jáne Holdıng jumysynan tıimdi nátıje kútedi», dedi Á. Smaıylov.
Qanat Sharlapaev 1981 jyly Saratov oblysynda dúnıege kelgen.
Saratov áleýmettik-ekonomıkalyq ýnıversıtetin (RF), Cranfield School of Management (Ulybrıtanııa) bitirgen.
Eńbek jolyn 2003 jyly bank sektorynda bastady.
2006-2008 jyldary «Sıtı» ınvestbankiniń (Ulybrıtanııa, Chehııa) óńirlik keńsesiniń qarjy departamentinde, jobalardy basqarý departamentinde, operasııalyq-tehnologııalyq departamentinde, satý basqarmasynda jumys istedi.
2008-2014 jyldary — «Sıtı» ınvestbankinde (London, Ulybrıtanııa) aǵa taldaýshy, vıse-prezıdent kómekshisi, aksııalar naryǵyndaǵy jumys jónindegi óńirlik dıvızıonnyń vıse-prezıdenti.
2014-2015 jyldary — «Sıtı» ınvestbankiniń Eýropa, Taıaý Shyǵys jáne Afrıka boıynsha strategııalyq josparlaý jáne taldaý óńirlik tobynyń vıse-prezıdenti (London, Ulybrıtanııa).
2015-2017 jyldary — «Sıtıbank Qazaqstannyń» bas qarjy dırektory, basqarma tóraǵasynyń orynbasary, aǵa vıse-prezıdenti.
2017-2020 jyldary — Reseı Sıtıbankinde Reseı, Ýkraına jáne Qazaqstan boıynsha bas qarjy dırektory, aǵa vıse-prezıdenti.
2020 jyldan bastap qazirgi ýaqytqa deıin «Sıtı» ınvestbankiniń (BAÁ) Afrıka, Taıaý Shyǵys jáne Shyǵys Eýropanyń damýshy naryqtaryndaǵy strategııa, josparlaý jáne taldaý jónindegi óńirlik dırektory qyzmetin atqardy.
