Qarjy polısııasynyń qarymy

Almaty oblysy boıynsha ekonomıkalyq qylmysqa jáne sybaılas jemqorlyqqa qarsy kúres (qarjy polısııasy) departamentiniń bastyǵy, qarjy polısııasynyń  polkovnıgi Talǵat Sádýaqasov  jýrnalıstermen baspasóz brıfıngin ótkizgen edi. Onda  qoǵamda quqyq qorǵaý qyzmetkeri ataǵyn jamylyp, zańsyz áreket etýshilerdiń jolyn kesý úshin atalǵan qurylymda    ishki qaýipsizdikti kúsheıtý, kadr jumysynda qyzmetkerler   laýazymdaryn  aýystyrý barysyndaǵy birqatar  derekterge dáıekteme keltirilip, azamattardyń ótinishterin qaraýdaǵy  sala qyzmetkerleriniń dármensizdikteri  talqylandy. «2013 jyly 65 qyzmettik tekserý júrgizilip, 39 fakt boıynsha 26 qyzmetker jaýapkershilikke tartyldy. Sondaı-aq, 6 qylmystyq is qozǵalyp, 4 fakti qarjy polısııasy qyzmetkerlerine qatysty boldy. Quqyq qorǵaý qyzmetkeri ataǵyn jamylýshylardyń 2, al para berýdiń 1 faktisi ashyldy. Ar-namys kodeksi talaptaryn buzǵan qarjy polısııasy qyzmetkerlerine 5 derek boıynsha qatań shara qoldanyldy. Naqtylaı tússem, kásibı talaptarǵa sáıkes tekserý júrgizilgende áriptesterimizdiń úsheýi atqaryp otyrǵan laýazymyna sáıkes emestigi anyqtalyp, ekeýi qarjy polısııasy qyzmetkeri qatarynan shyǵaryldy. Tutastaı alǵanda, byltyrǵy jyly oblysta sybaılasqan jemqorlyq qylmysynyń sany azaıǵanymen zańnamany buzǵan sheneýnikter sany artyp otyr», dedi Talǵat Sádýaqasov. Elimizdegideı Jetisý jerinde de azamat­tardyń ótinishterin qaraý boıynsha áreketsizdik kórsetken quqyq qorǵaý organdarynyń qyzmetkerlerine qatysty Úkimettiń qatal saıasaty júrgizilýde. Shyny kerek, kóbinese azamattar quqyq qorǵaý organdary qyzmetkerleriniń jumystaryna qanaǵattanbaı, prokýratýra organdaryna shaǵym túsirýge májbúr bolady. Búgingi tańda Memleket basshysynyń tapsyrmasyn oryndaý maqsatynda Ekonomıkalyq qylmysqa jáne sybaılas jemqorlyqqa qarsy kúres (qarjy polısııasy) agenttiginiń tóraǵasy Rashıd Túsipbekovtiń «Qarjy polısııasy sybaılas jemqorlyq qylmystardyń aldyn alatyn ýákiletti organ bolǵandyqtan óz qatarynyń tazalyǵyn qamtamasyz etip, basqaǵa úlgi kórsetýi tıis. Sondyqtan qarjy polısııasy qyzmetkerleri tarapynan sybaılas jemqorlyqqa jol bergen, tártip buzý­shylar men kezdeısoq qyzmetkerlerge oryn joq», degen sózimen atalǵan departament bastyǵy baspasóz brıfıngin túıindeı oty­ryp, jýrnalıster tarapynan qoıylǵan suraq­tarǵa jan-jaqtyly ja­ýap qaıtaryp, Almaty oblysynda azamattardyń ótinishteri boıynsha áreketsizdik kórsetken quqyq qorǵaý organ­darynyń qyzmetkerlerine qatysty qatal saıasat júrgizilip, tıisti shara qoldanylyp otyr­ǵanyn basa aıtty. Nurbol ÁLDIBAEV, «Egemen Qazaqstan». Almaty oblysy.