VAK otyrysynda karantın kezeńinde qazaqstandyq jáne sheteldik azamattardyń Qazaqstan Respýblıkasynyń memlekettik shekarasyn kesip ótý tártibin jeńildetý máseleleri talqylandy.
Vedomstvoaralyq komıssııa ýaqytsha shekteýlerdi alyp tastaý týraly sheshim qabyldady:
- Qazaqstan Respýblıkasy azamattarynyń Qazaqstan Respýblıkasynyń halyqaralyq áýejaılary arqyly shet memleketterge shyǵýyna;
- vızalyq talaptar saqtalǵan jaǵdaıda sheteldikterge vızasyz rejımi bar elderden, sondaı-aq tikeleı áýe qatynasy bar elderden (turaqty, turaqty emes charterlik reıster) Qazaqstan Respýblıkasynyń aýmaǵyna/aýmaǵy arqyly kirýge/tranzıttik ótýge ruqsat beriledi.
Sondaı-aq Qazaqstan Respýblıkasynyń azamattary úshin avtoótpe joldary arqyly shet memleketterge shyǵý úshin shekteý merzimi eki ese azaıtyldy, endi qazaqstandyqtar 15 táýlikte 1 ret shyǵa alady.
Elge kirý kezindegi jalǵyz talap – shetelden kelgenderdiń barlyǵy vaksına alǵanyna qaramastan, 72 saǵat ishinde jaramdy COVID-19-ǵa teris PTR-testi týraly anyqtamany usynýy kerek. Birge alyp júretin adamdarda teris test týraly qujat bolǵan jaǵdaıda 5 jasqa deıingi balalardan anyqtama talap etilmeıdi.
Bul sharalar ekonomıkalyq qyzmetti jandandyrýǵa, otandyq týrıstik bıznesti damytýǵa jáne eldiń ınvestısııalyq ahýalyn jaqsartýǵa baǵyttalǵan.
Memleket basshysy Qasym-Jomart Kemeluly Toqaev 21 qańtarda bıznes ókilderimen kezdesý barysynda Úkimetke koronavırýs ınfeksııasynyń taralýyna jol bermeý boıynsha karantındik sharalardy qoldaný tásilderin qaıta qaraýdy tapsyrǵan bolatyn.
