Qazaq tastaıaqshylary dese aldymen Qanybek Saǵyndyqov (úsh dúrkin álem chempıony), Álıhan Qaraneev (úsh dúrkin álem chempıony), Ernar Shymbaev (eki dúrkin álem chempıony), Álibek Omarov (álem chempıony) syndy tastaıaq sheberleriniń esimderi esimizge oralady. Degenmen biz bul joly bılıard álemindegi qazaqstandyq sportshylardyń eń mańyzdy bes kezdesýine nazar aýdarǵymyz keledi.
Abramovqa arnalǵan «tárbıe saǵaty»
Bári de áleýmettik jeliden bastalǵan. 2020 jyl aıaqtalar tusta álem chempıony, otandasymyz Ernar Shymbaev ınstagramda jazba qaldyrdy.
«Barlyqtaryńyzdy Jańa jyl merekesimen quttyqtaımyn. 2021 jyly postkeńestik elderdiń kez kelgen sportshysymen kommersııalyq kezdesý ótkizgim keledi. Barlyq usynysty qarastyramyn», degen Shymbaevtyń jazbasy reseılik Iosıf Abramovtyń shymbaıyna qatty batsa kerek. Jedel jaýap berdi. Jaýap bergende de ádepsizdigimen kózge tústi.
«Sen árqashan jelide jazýdan jalyqpaısyń. Is júzine kelgende sen qaıda bolasyń? Bala, bul saǵan týrnır emes», dep jazdy eki dúrkin álem chempıony, álemdik reıtıngtiń kóshbasshysy Iosıf Abramov ózinen 13 jas úlken Ernar Shymbaevqa qaratyp. Muny qalaı ádepsizdik demeısiń? Ekeýara daýǵa Ernar núkte qoıdy.
«Aqyry ınstagramda osyndaı sóz saıys bastalǵan eken. Men saǵan kelesideı usynys jasaımyn. Qaı jerde jolymyz túıisse de, birinshi kezdesýde eski Máskeý erejesi boıynsha kommersııa oınaıyq. Eger sen meniń talabymdy qabyldasań, ózińnen jaýap kútemin», dedi Ernar. Abramov jazba astyna pikir qaldyrmady.
Eki sportshynyń joly Reseıdegi álem chempıonatynda túıisti. Erkin pıramıda boıynsha ótken kezdesý taǵdyry sońǵy kezeńde sheshildi. Bir-birin jaqtyrmaǵan eki sportshy da kóp qatelesti. Alaıda sheshýshi sátte salqynqandylyq tanytqan Ernar Shymbaev qarsylasynan 7:6 esebimen basym túsip, Abramovtyń aýzyn japty.
Stalevten qarymta qaıtarǵan qazaq
Bes mańyzdy kezdesýdi túzgen kezde alǵashqylardyń biri retinde oıymyzǵa Álıhan Qaraneev pen bılıard áleminiń ańyzy, álemniń segiz dúrkin chempıony Evgenıı Stalev arasyndaǵy qarymta kezdesý oralady. 2007 jyly ótken «Eýrazııa qalalary: Gran-prı» dodasynda jas peri Álıhan Karaneev pen bılıard ańyzynyń joly túıisti. Álıhannyń baby men baǵy qatar kelispeı turǵanyn ańǵarǵan Stalev ádetine basty. Yrjalaqtap júrip otandasymyzdy 6:0 esebimen oısyrata jeńdi. Oıyn bitkennen keıin sóz alǵan Álıhan sonda búı dedi:
«Búgin durys oıyn kórsete almadym. Evgenıı óz deńgeıinde oınady. Buıyrtsa ekeýmiz Sankt-Peterbýrg qalasynda ótetin úzdik segizdik alamanynda kezdesemiz. Sol kezde ese qaıtarýǵa bar kúsh-jigerimdi salamyn».
17 jastaǵy jampoz eshqandaı emosııaǵa erik bermedi. Erkin, sabyrly sóıledi. Arada ýaqyt ótti. Stalevpen ózi aıtqan jarysta joly túıisti. «Úzdik segizdik» dodasynyń jartylaı fınalynda jurt «nevka» dep atap ketken dınamıkalyq pıramıdadan ótken oıynda Stalevtiń júzinen kúlkiniń taby ǵaıyp boldy. 17 jastaǵy bozbalanyń daıyndyǵy myǵym eken. Bılıard oıynynyń barlyq parametri boıynsha Jenıadan bir bas joǵary ekenin baıqatty. Qorytyndy esep 7:4. Álıhan sózinde turdy.
Kásipqoı kezdeısoq sharǵa qýanbaıdy
2016 jyly erkin pıramıdadan ótken álem chempıonaty jurt jadynan óshpek emes. Álıhan Qaraneev pen búgingi bılıard áleminiń kóshbasshysy, moldovalyq Sergeı Kryjanovskıı 1/8 fınalda kezdesti. Birqalypty ótip jatqan oıynnyń yrǵaǵyn Kryjanovskıı buzdy. Sheshýshi sátte kezdeısoq shary lýzaǵa top ete qalǵanda quddy bir kezdesý taǵdyry sheshilgendeı qýandy. Bılıardta «kezdeısoq sharǵa qýansań, oıyn seni jazalaıdy» degen uǵym bar. Dál solaı boldy. Jeńiske jaqyn turǵan moldovalyqty otandasymyz sabasyna túsirdi. О́te muqııat oınaǵan Álıhan Sergeı Kryjanovskııdi sheshýshi partııada jeńip, úıine qaıtardy.
Madamınovtiń mysyn basqan Almaz
2021 jyly ótken álem kýbogy («Kreml kýbogy» dep te atalady) dodasyna jahandyq reıtıngte kósh bastap turǵan myqtynyń bári qatysty. Árıne, qazaqstandyq Almaz Ábseıit bul alamanda favorıtterdiń qatarynda bolǵan joq. Áıtkenmen otandasymyz myqtylardy birinen keıin birin jeńip, jankúıerlerdi jelpintti. Ol dodada Sergeı Kryjanovskııdi, Dmıtrıı Shkodany jarys jolynan yǵystyrǵany málim. Sondaı-aq Dmıtrıı Shkodadan Savvıdı dodasynda ketken esesin qaıtardy. Sheshýshi kezeńde bir demmen 8 shardy lýzaǵa toǵytyp, óziniń tas túıin daıyndyqpen kelgenin kórsetti.
Degenmen Almaz eń úzdik oıynyn qyrǵyz Azız Madamınovke qarsy kórsetti dep paıymdaımyz. Qarsylasyna 0:2 esebimen ese jiberip jatqan ol óziniń psıhologııalyq daıyndyǵynyń myǵym ekenin aıqyn tanyta bildi. Qatarynan 5 partııada mereıi ústem bolǵan Almaz jeńisti joryǵyn fınalda ǵana toqtatty. Áıtkenmen jarys jolynda kil myqtylardy jeńgen Almazdyń kúmis júldesi altynǵa para-par edi. О́ıtkeni odan eshkim júlde kútpedi.
Sońǵy qadam... Jeńilis...
2014 jyl. Taraz qalasyndaǵy «Taraz Arena» sport saraıynda ótken álem chempıonatynyń fınalyna shyqqan Dáýren Orynbaev qyrǵyz oǵlany Qanybek Saǵynbaevpen kezdesti. Qanybek á degennen basymdyqty qolǵa alyp, 3:0 esebimen esepte alǵa uzap ketti. Biraq Dáýren sasqan joq. Keıinnen 3:6 esebimen basym turǵan Qanybekti qýyp jetýdiń barlyq amalyn qarastyrdy. Qanybektiń de oıyny toqtap qaldy. Dáýren qaharyna mindi. Tablodaǵy esep aıyrmasyn 5:6-ǵa deıin qysqartty. Dál osy sátte ákki Qanybek qazaq sportshysynyń mysyn basý nıetimen úzilis aldy. Bilýimizshe úzilis medısınalyq sıpatqa ıe bolyp, 20 mınýtqa sozyldy. Qaıta bastalǵan oıynda Dáýren ózin joǵaltty. Qanybek óz oıynyn taýyp, 7:5 esebimen basym túsip, úsh dúrkin álem chempıony atandy. Átteń, Dáýrenniń armanyna bir ǵana qadam qalyp edi. Sportta qarsylastyń qarqynyn basý nıetinde jasalatyn áreketter bolady. Qanybek dál sol sátte sondaı qadamǵa bardy. Oıynnan keıin Saǵynbaevqa jaqyndadyq. «Nege uzaq úzilis aldyń?» degen suraqpen qaıyryldyq. Jymıdy. «Men úshin Qanybek Saǵyndyqovty qýyp jetý mańyzdy boldy. Endi men de úsh dúrkin álem chempıonymyn». Jaýaby osydan aspady.
Jalpy, qazaqstandyq tastaıaq sheberleriniń álem chempıonaty sekildi ózge de mańyzdy dodalardaǵy ǵajap kezdesýleri kóp-aq. Alaıda biz jankúıerlerdiń jadynan óshpeıtin bes matchty eske túsirip kórdik. Ázirge osy.
