«09 aqpan kúni saǵat 21:00 shamasynda Ulan aýdanyndaǵy Tavrııa aýylynan 20 shaqyrym jerdegi «О́skemen-Semeı» avtojolynda «Skanııa» markaly avtokólik órtengen. 38-О́SB qutqarýshylary kelgen sátte asetılen ballondaryn tasymaldaıtyn avtokólik jalynǵa oranǵan bolatyn. Qaýipsizdik maqsatynda Jol polısııasy qyzmetkerleri avtojoldaǵy qozǵalysty ýaqytsha toqtatty. Oqıǵa ornyna Apattar medısınasy ortalyǵynyń trassalyq medısınalyq - qutqarý pýnktinen dárigerler bardy. Zardap shekkender boıynsha aqparat túsken joq. Kólik júrgizýshisi de aman», delingen habarlamada.
Málimetke saı, ballondardyń jarylýyna baılanysty órtti dereý sóndirý múmkin bolmady. TJD órt sóndirýshileri aldymen qaýipsizdik tehnıkasyn saqtaı otyryp qashyqtyqta boldy. Jarylystar toqtaǵan soń órt sóndirýshiler ballondy sýytý men órtti sóndirý úshin sý quıdy. О́rt 22 saǵat 35 mınýtta aýyzdyqtaldy. О́rtti sóndirýge ShQO TJD О́rt sóndirý qyzmeti jeke quramnyń 6 adamy, 2 tehnıkasy jumyldyryldy.
