Teatr • 11 Aqpan, 2022

Jasyl qurlyqta jarqyrady

120 ret kórsetildi

«Astana Opera» balet trýppasynyń jetekshi solısi, Qazaqstannyń eńbek sińirgen qaıratkeri Baqtııar Adamjan Ballet International Gala álemdik shoýy aıasynda Aýstralııa elinde abyroıly óner kórsetip qaıtty. Talantty ártistiń balettegi minsiz tehnıkasy men sheberligi jasyl qurlyq kórermenderin tańdaı qaqqyzdy.

26 qańtardan 5 aqpanǵa deıin jalǵasqan bı óneriniń jármeńkesine Qazaqstannan bólek, Kovent-Garden Koroldik bale­ti, Amerıkalyq balet teatry jáne Kvıns­lendsk baletiniń jetekshi solısteri qa­ty­syp, úzdik tájirıbelerimen bólisti. Pla­netanyń túkpir-túkpirinen barǵan úzdik bıshiler Aýstralııany bekzat ónerdiń naǵyz dýmanyna aınaldyrdy.

Ballet International Gala álemdik shoýy  – bul baıqaý nemese jarys bolmaǵanymen, onda Olımpııa oıyndarynyń bir jurna­ǵy bar: kúlli álemniń úzdik balet ártisteri ózderiniń minsiz tehnıkasyn kórsetip, osylaısha erekshe merekelik atmosfera týdyrady. Aıtýly sharada Qazaqstandy talantty bıshi Baqtııar Adamjan tanystyrdy. Bıdegi sahnalyq juby «Astana Operanyń» talantty ártisi Shuǵyla Ádep­hanmen birge A.Hachatýrıan­nyń «Spar­­tak» baletinen úzindi oryndady.

– Aýstralııa elinde ótken óner saparymyz shyǵarmashylyq jolymyzdaǵy úlken mektep boldy. Tamasha tájirıbe jınap qaıttyq. Jergilikti kórermenniń de balet ónerin túsinip, qabyldaýy erek­she. Bul olar úshin aıtýly oqıǵa bol­ǵany sózsiz, zalda ıne shanshar oryn bolmady. Jasyl qurlyq halqynyń balet ártisterine kórsetken qoshemeti men qurmeti kóńilimizge aıryqsha áser etti. Elge zor shabyt alyp oraldyq, – dep Qazaq­stannyń eńbek sińirgen qaıratkeri Baqtııar Adamjan óz áserimen bólisti.

Ártistiń aıtýynsha, ol áriptesterimen jyly dostyq qarym-qatynas ornatqan. 

– Balet álemi óte tar, sondyqtan biz buǵan deıin bir-birimizben tanys bolmasaq ta, áleýmettik jeliler arqyly syrttaı biletinbiz. Ballet International Gala álemdik shoýy sondaı úzdik áriptesterimizben jaqynyraq tanysýǵa, shyǵarmashylyq turǵydan tájirıbe almasýǵa tamasha múm­kin­dik berdi, – deıdi ol.

Baqtııardyń balettegi juby Shuǵyla Ádephan da seriktesiniń pikirin qýattady: – О́ner saparynan tek jaqsy áser aldym. Bizdiń nómir bárine unady, tamsanbaǵan jan qalmady. Ár balet mektebiniń jáne ár sheteldik ártistiń ózindik kásibı ereksheligi bar. Bizdiń bir-birimizden erekshelenýimiz zańdylyq. Bul qaı-qaısymyzǵa da  qýat, motıvasııa alýǵa, shabyttanýǵa múmkindik beredi.

Ballet International Gala jobasy balet­tiń jetekshi ártisterin jınaı otyryp, kópshiliktiń nazaryn aýdardy jáne buqaralyq aqparat quraldarynda keń re­zonans týǵyzdy. Eń qyzý talqylanǵan oryndaýlardyń biri «Astana Opera» ártisteriniń nómiri boldy, ol týraly birqa­tar aýstralııalyq jáne álemdik bu­qara­lyq aqparat quraldary jarysa jaz­dy. Aıtýly basylymdar ishinde The Australian, The Courier Mail, The Mercury, The Cairns Post jáne basqalary bar. Shoý qatysýshylary da áleýmettik jelilerde Qazaqstannyń astanasynan barǵan óz áriptesteri jaıly tańdanystaryn bildirip jatty.

Eń iri aýstralııalyq synshylardyń biri – óner sholýshy Fıl Braýn The Courier Mail gazetinde Baqtııar men Shuǵylanyń ónerine joǵary baǵa berdi:

– «Spartak» baletinen úzindi oryndaǵan qazaqstandyq qos bıshi – Baqtııar men Shuǵylany kórgenime sene alar emespin. Olarǵa munda jetý ońaı bolmady, alaıda qajetti qujattardyń bolýy jáne BIG-tiń basqa da qatysýshylarymen birge karan­tındi saqtaýdyń nátıjesinde olar kovıdti boldyrmaı, maqsattaryna jetti. Qazaqstandyq jup kezinde jazylǵan eń áde­mi áýenderdiń biri – Aram Hachatýrıannyń mýzykasyna keremet bıledi. Jáne de Adam­­jannyń beınesi shynaıy Spartaktan aı­ny­maı qaldy. Bul juptyń óner kórsetýi tańǵal­dyrarlyq qýatty jáne ádemi boldy,  dedi Braýn.

Ballet International Gala álemdik shoýynda óner kórsetý mártebesi bıyl  Orta­lyq Azııa memleketteriniń ishinen tek Qazaqstan ǵana buıyrypty. Elimizdiń aby­­roıyn jat elde asqaqtatqan ónerli jup balet óne­rindegi kezekti bıigin baǵyn­dy­ryp qaıtty. Al «Astana Opera» teatry ba­let trýppasynyń jasampaz jumystary álemdik deńgeıdegi áıgili ortalyqtarmen afıshada qatar turýy – óz aldyna zor mártebe.

Sońǵy jańalyqtar

EQYU Bas hatshysy Qazaqstanǵa keledi

Parlament • Búgin, 09:31

Beısenbige arnalǵan aýa raıy boljamy

Aýa raıy • Búgin, 09:00

Shabyt shaqyratyn shahar

Elorda • Keshe

Aqjaınaq astana

Elorda • Keshe

Ozyq óndiris ornynda boldy

Aımaqtar • Keshe

Dımash pen Djekson

О́ner • Keshe

Uqsas jańalyqtar