Konferensııany D.Qonaev atyndaǵy Eýrazııalyq Zań Akademııasy men D. Qonaev halyqaralyq qory, Qazaqstandyq krımınologııalyq qaýymdastyǵy birlesip uıymdastyrdy.
Konferensııanyń moderatory D. Qonaev atyndaǵy Eýrazııalyq zań akademııasynyń rektory, zań ǵylymdarynyń doktory, professor О́miráli Jalaırı asa kórnekti memleket jáne qoǵam qaıratkeri, úsh márte Sosıalıstik eńbek eri, Qazaq KSR Ǵylym akademııasynyń akademıgi, tehnıka ǵylymdarynyń doktory, keńestik Qazaqstandy otyz jyl basqarǵan Dinmuhamed Ahmetuly Qonaevtyń el damýyndaǵy basshylyq kezeńi men ǵylymı joly týraly aıtyp ótti.
D.Qonaevtyń ómiri men memlekettik qyzmeti, onyń respýblıkamyzdyń áleýmettik-ekonomıkalyq, ǵylymı áleýetin damytýǵa qosqan úlesi, keıbir saıası jáne quqyqtyq kózqarastary, Memleket basshysynyń saıası talanty týraly estelikterimen bólisti. Onyń ómiri men kóp qyrly qyzmeti Qazaqstannyń uly dáýiriniń sımvolyna aınaldy.
Jıyn barysynda D.Qonaev atyndaǵy halyqaralyq qordyń prezıdenti Eldar Qonaev sóz alyp, Dinmuhamed Ahmetulynyń el ómirindegi, sonymen qatar baılanys ortasy jaıyna keńinen toqtaldy. Qazaqstan ǵalymdary odaǵynyń prezıdenti, akademık Orazáli Sábden respýblıkamyzǵa D.Qonaev basshylyq etken jyldardaǵy áleýmettik-ekonomıkalyq jaǵdaıǵa keńinen toqtaldy.
Sh.Ýálıhanov atyndaǵy tarıh ınstıtýtynyń dırektory, tarıh ǵylymdarynyń doktory, professor Zııabek Qabyldınov, D.Qonaev atyndaǵy qordyń О́zbekstandaǵy bólimi atynan akademık Abdýlla Rýstemov, jazýshy Oraz Qaýǵabaı, UǴA korrespondent-múshesi, tehnıka ǵylymdarynyń doktory, professor Nıkolaı Búktikov, Qazaqstannyń halyq ártisi Nurjuman Yqtymbaev, Áýezov úıi mádenı ortalyǵynyń dırektory Dıar Qonaev, taǵy da basqa ǵalymdar men qoǵam qaıratkerleri, sonymen qatar alys-jaqyn shetelderden qatysýshylar D.Qonaevtyń halyqaralyq dárejedegi tulǵa ekendigine, onyń el basqarýmen qatar ǵylymdaǵy zertteýleriniń mańyzdylyǵyna toqtaldy.
Dinmuhamed Ahmetuly basqarǵan jyldary keń baıtaq qazaq jerinde 43 qala boı túzedi. Onyń ishinde, ónerkásip ortalyǵy sanalǵan Rýdnyı, Ekibastuz, Shevchenko (qazirgi Aqtaý), Temirtaý, Jańatas, Kentaı, Arqalyq, t.b. qalalar salyndy.Aýyl sharýashylyǵy qarqyndy damyp, tyń jáne tyńaıǵan jerler ıgerildi. Mal sany kóbeıip, aýyl sharýashylyǵynyń ónimderi jyl saıyn artyp otyrdy. Qazaqstannyń ónerkásip, onyń ishinde túrli-tústi metallýrgııa salasy joǵary deńgeıde damydy. Mystyń úshten bir bóligi, qorǵasynnyń 70, myryshtyń 40 paıyzynan astamy qazaq jerinde óndirildi. О́skemen qorǵasyn-myrysh jáne tıtan-magnıı kombınattary, t.b. iske qosylyp, Aqtóbe qalasyndaǵy shyǵarylǵan hrom keniniń kólemi artty. Metall óńdeý jáne kólik jasaý salalarynda da óndiris tıimdiligi artty.
Almaty aýyr mashına jasaý zaýyty shyǵarǵan ónim álemniń 40-tan astam memleketine taraldy. Qazaq jeriniń aýmaǵynda kómir men munaı ken oryndary ashylyp, Qazaqstan otyn-energetıka ónerkásibiniń iri ortalyǵyna aınaldy. Taraz jáne Shymkent qalalarynda ornalasqan kombınattar sary fosfor óndirý boıynsha álemde birinshi orynda boldy.
Qazaqstan Respýblıkasynyń Ulttyq ǵylym akademııasynyń akademıgi Dinmuhamed Ahmetuly Qonaev 100-den asa ǵylymı eńbekter men zertteýler jazdy. О́z eńbekteriniń halyq sharýashylyǵyna tıgizer paıdasynyń zor ekendigin is júzinde dáleldedi.
