Hokkeı: «Barys» eki oıyndaǵy esepti teńestirdi

Búgin, 22 naýryz kúni Astanada jergilikti «Barys» komandasy Qurlyqtyq hokkeı lıgasynyń pleı-offy ekinshi raýndynda Ýfanyń «Salavat Iýlaev» jasaǵyn qabyldap, 5:2 esebimen utyp shyqty. Bul týraly egemen.kz habarlady. Match ýfalyqtardyń shabýylymen bastaldy. Osy kezde alań ıeleri sapynan bir oıynshydan keıin bir oıynshy alańnan qýylyp jatty. Osyndaı azshylyq tusynda olar óz qaqpalaryna gol da soqtyryp tyndy. Muny 12 mınýtta Andreı Zýbarev jasady. Taǵy tórt mınýttan keıin meımandar forvardy Egor Dýbrovskıı eki qorǵaýshynyń ortasynan joıqyn soqqy jasap, astanalyqtardy qapyda qaldyrdy. Alań ıeleri bir goldyń qarymyn kezeń bitýge bir mınýt qalǵanda qaıtardy. Ony Dastın Boıd pen Brendon Bochenskıden pas alǵan Krıstıan Kýdroch saldy. Ekinshi kezeńde Arı-Pekkı Selınniń shákirtteri úzdiksiz alǵa umtylýmen boldy. Bul aralyqta olar taǵy eki shaıba salyp, oıynda birinshi ret alǵa shyqty – 3:2. Shaıbalardy Konstantın Rýdenko men Kem Barker túsirdi. Bizdiń jigitter úshinshi kezeńde de osylaı jaýapsyz eki shaıba soqty. Aldymen Bochensı men Boıdtyń pasynan Andreı Gavrılın esepti 4:2-ge jetkizdi. Al sońǵy núkteni Bochenskıdiń qoldaýymen Dastın Boıd qoıdy. Osylaısha eki oıyndaǵy esep 1:1-ge turaqtady. Endi úshinshi jáne tórtinshi oıyndar 24 jáne 25 naýryz kúnderi Ýfada ótedi. Sodan sońǵy besinshi kezdesý Astanada oınalady. Eske sala keteıik, Astanada ótken birinshi oıynnyń negizgi ýaqyty 2:2 bolyp aıaqtalǵan edi. Jeńimpaz over-taımda anyqtaldy. Ony 62-mınýtta Nıkıta Fılatov salyp, qonaqtarǵa jeńis áperdi. Damır Qojamqul. Derekkóz: egemen.kz. Foto: «Barys» hokkeı klýbynyń arhıvi.