«Aısha bıbi» polıgonynda «Ońtústik» óńirlik áskerleri vzvodtarynyń jaýyngerlik jattyǵý atystary bastaldy. Onyń maqsaty – shynaıy urysqa meılinshe uqsas jaǵdaıda áreket etip, jattyǵý mindetterin is júzinde pysyqtaý. Bul sharalar Elbasy – Qarýly Kúshterimizdiń Joǵarǵy Bas qolbasshysy Nursultan Nazarbaevtyń oqý prosesin jańa mazmunmen tolyqtyrý, jaýyngerlik daıyndyqtyń qarqynyn kúsheıtý týraly nusqaýymen úndesip jatyr. Jaqynda Qorǵanys mınıstrliginde ótken jedel-strategııalyq jıynda Elbasy jattyǵýlar qazirgi zamanǵy qaýip-qaterlerge saı bolýy qajet degen bolatyn.
Qazir «Aısha bıbi» polıgonynda 5-shi taýly atqyshtar brıgadasynyń bólimsheleri ózderiniń daıyndyq jumystaryn júrgizýde. Bul el Qarýly Kúshteri sapyndaǵy birden-bir erekshe qurama bolyp tabylady. Bıyl bul brıgadada alǵash ret jaýyngerlik daıyndyqtyń jańa tásilderi tájirıbe júzinde synaqtan ótkizilýde.
Jalpy, vzvodtyq jaýyngerlik jattyǵý atysy barysynda bólimshe komandırleriniń, mehanık-júrgizýshilerdiń, kózdeýshi-operatorlardyń jáne atqyshtardyń ózara úılesimdi jumysyna basa nazar aýdarylady. Sonymen qatar, taýly atqyshtardyń jeke daıyndyǵyna da aıryqsha mán beriledi. Qazir olar álemge áıgili «Kalashnıkov» avtomatynan, tankige qarsy granatomet pen mınometterden, BMP-2 jaýyngerlik mashınasynan atyp jattyǵý ústinde.
Jattyǵý barysynda Qarýly Kúshter tekteriniń ózara úılesimdi is-qımyldary da pysyqtalý ústinde. Mysaly, qurlyq áskerlerine áýe qorǵanysy kúshteriniń maıdandyq avıasııasy áýeden qoldaý kórsetýde. Avıasııanyń is-áreketi men nysanalaryn qurlyq áskerleriniń ókilderi óz kezeginde qazirgi zamanǵy baılanys quraldary arqyly jerden baǵyttap otyrdy.
Búginde «Teris-Ashybulaq» polıgonynda taýly qoryqshy bólimsheleriniń áskerı qyzmetshileri de ózderiniń arnaıy daıyndyqtaryna kiristi. Olardyń basty ereksheligi – taýly aımaqtarda jáne tikeleı urys qımyldary kezinde jylqylardy tıimdi qoldanyp, áreket etý. Úzdiksiz jattyǵý jumystary nátıjesinde attar atys-shabystan úrikpeı, buıryqty tez qabyldap, jaýyngerdiń senimdi serigine aınalǵanyn kórsetti. Bul bólimshelerdiń sarbazdaryna qoıylar talap ta joǵary. Olar shyń-quzdarǵa órmeleý ádisterin jaqsy meńgerip, arnaıy quraldarmen taý jartastaryna shyǵyp, túrli kedergilerdi jeńe bilýge tıis. Bul úshin jalpy áskerı urys taktıkasynan bólek, adam denesiniń fızıkalyq turǵysynan óte jaqsy daıyndyǵy da qajet.
Kósemáli SÁTTIBAIULY,
«Egemen Qazaqstan».
Jambyl oblysy.
