Gýzalııa Gafýrova nege muńaıdy?

Talaı dodada qarsy­las­ta­rynan aılasyn asyryp, kók týdy kókte jelbiretken sport­shylarymyzdyń jeńisti hám jemisti kásibı mansaby týra­ly bárimiz jaqsy bilemiz. Alaı­da olardyń alǵashqy jeńisi men jeńilisi týraly suraı bermeıtinimiz bar. Karate sportynan eki márte Azııa oıyndarynda top jarǵan Gýzalııa Gafýrova kóptegen jarys­ta jeńistiń bıik tuǵyrynan kó­ringeni málim. Alaıda alǵash ret jeńilistiń kermek dámin tatqan kezde ol qatty muńaıǵan bolatyn...

«Alǵashqy jeńisti umytý múmkin be eken? Eń alǵashqy je­ńisime Qarataý qalasynda ótken jarysta qol jetkizdim. Ol kezde meniń sportpen shuǵyldana bastaǵanyma bir aı da tolmaǵan bolatyn. Bul – meniń birinshi jarysym. Eń birinshi týrnırimde birinshi oryn alǵanym esten ketpeıdi. Balalyq kóńilmen óte qatty qýandym, baqyttan basym aınalǵandaı kúı kesh­tim. Anashym da máz bolyp, qýa­­nyshymdy bólisti. Sol kúni Jam­­byl oblysynyń Baızaq aýdany­na qarasty Qyzyl juldyz aýylyndaǵy barlyq kórshilerim jınalyp, alǵashqy jeńisimdi jaqsy kóńil kúıde atap óttik. Ol kúndi eshqashan jadymnan shyǵarmaımyn. Al eń birinshi jeńilisim Petropavl qalasynda ótken jarysta tirkeldi. Ol kún men úshin kúrsinispen eske ala­­tyn sátterdiń biri bolyp qala beredi. Tuńǵysh ret oblys aýma­ǵynan shyǵyp, syrtta uıym­dastyrylǵan jarysqa attandym. Meni sol jarysqa jiberý úshin anashym bizge tıesili jerdiń bir bóligin satyp jiberdi. Sóıtip meni jalǵyz jibermeı, qasyma ápkemdi qosty. Batasyn berip, shyǵaryp saldy. Sol kezde jan dúnıem astan-kesten bolyp ketti. Senim údesinen shyǵa al­ma­ǵanym úshin qatty ókindim. Anashymnyń meniń eshkimnen kem bolmaýym úshin jerimizdiń jartysyn satyp jibergenin oılap tipti kúızelip kettim. Ol kez esime tússe, áli de muńaıamyn», deıdi sportshy.

12 jasynan bastap karate sportyn janyna serik etken Gýzalııanyń 2014 jyly Oń­tústik Koreıanyń Inchhon qa­la­synda ótken Azııa oıyndarynda top jarýy zańdylyq se­kildi kóringenimen, 2018 jyly Indonezııa astanasy Djakarta qalasynda jalaýy jelbiregen Azııa oıyndarynda odan kóp adam altyn júlde kútpegen bolatyn. Sebebi de túsinikti ǵoı. Otbasyn qurǵannan soń dekrettik demalysqa ketken edi. Alaıda qyzy alty aıǵa tol­ǵannan keıin tynysh jatpaı, jattyǵýdy bastap ketti. Iá, elordadan Tarazǵa qaıta keldi. Jattyqty. Shúmektep tókken ter­diń arqasynda ekinshi márte Azııa oıyndarynyń chempıony atandy. Jarysqa attanar aldynda «qola júlde alsam da jetedi ǵoı» degen Gafýrova osy­laısha Kók týymyzdy kókte jelbi­ret­ken edi.

Dýlatbek Qusbekov sekildi bilikti bapkerden tálim alǵan Gýzalııa Gafýrova babynda júr­gen kezde karate sporty Olım­pııa oıyndarynyń baǵdar­lama­syna engende qazaqstandyq sportshy tórtjyldyqtyń basty dodasynan da oljaly oralar ma edi, kim bilsin?