«16 aqpanda Nur-Sultanda Qazaqstannyń jaýyngerlik óner qaýymdastyǵy quryltaıshylarynyń jalpy jınalysy ótti. Quryltaıshylardyń jalpy jınalysynyń sheshimimen Qaýymdastyq prezıdenti laýazymyna Ermek Saǵymbaev saılandy», delingen Qazaqstannyń jaýyngerlik óner qaýymdastyǵynyń baspasóz qyzmetiniń habarlamasynda.
Sondaı-aq jınalysta qaýymdastyqtyń birinshi vıse-prezıdenti bolyp Málik Myrzalın (Prezıdent Ákimshiligi Basshysynyń orynbasary), vıse-prezıdenti bolyp Berik Qunanbaev (UQK tóraǵasynyń orynbasary), Serik Jarasbaev (mádenıet jáne sport vıse-mınıstri) jáne Sársen Quranbek saılandy.
Kezdesý barysynda qaýymdastyq qyzmetiniń strategııalyq maqsattary men baǵyttary anyqtalyp, tıisti jylǵa arnalǵan jumys jospary bekitildi.
Jaýyngerlik óner qaýymdastyǵy 2019 jyldyń basynda quryldy. Uıym quramyna olımpıadalyq emes sport túrleri boıynsha 26 federasııa kiredi. Qaýymdastyqtyń negizgi maqsaty - eldegi jaýyngerlik ónerdi damytý, ilgeriletý jáne tanymal etý, óskeleń urpaqty sportpen aınalysýǵa tartý, sondaı-aq olımpıadalyq emes sport túrleriniń ımıdjin arttyrý. Qaýymdastyq karate, qoıan-qoltyq kúres, aralas MMA jekpe-jegi, grepplıng, djıý-djıtsý, sambo, pankratıon, ýshý, mýaı-taı, kıkboksıng, taekvondo, belbeý kúresi, ámbebap jekpe-jek jáne basqa da jekpe-jekter sııaqty sport túrlerin biriktiredi.
