Qazirgi ýaqytta Ishki ister mınıstrliginde 2739 qylmystyq is boıynsha tergep-tekserý júrip jatyr. Atap aıtqanda, urlyq, zańsyz qarý satý, ózgeniń múlkin qasaqana búldirý jáne basqa da derekter boıynsha is qozǵalǵan.
Qazirgi ýaqytta 271 adam qamaýda otyr. Olardyń 196-sy buryn qylmystyq jaýapkershilikke tartylǵan azamattar. Erlan Turǵymbaevtyń aıtýynsha, tergeý barysynda azamattardyń quqyqtary saqtalady. Qylmys quramyna baılanysty, qoǵamnan oqshaýlaýǵa jatpaıtyn 103 azamat tergeý ızolıatorlarynan bosatyldy. Taǵy 200-den astam kúdiktige qatysty eshqaıda ketpeý týraly qolhat alý nemese kepildik qoıý boıynsha sharalar qabyldanyp, tergeý ızolıatorlaryna qamamaýǵa sheshim shyǵarylǵan.
Mınıstr Parlament Májilisiniń depýtattaryna, qoǵamdyq-baqylaý komıssııalary men úkimettik emes uıymdardyń ókilderine tergeý ızolıatorlaryna kirýge múmkindik berilgenin jetkizdi. Qasym-Jomart Toqaevqa ishki ister organdarynyń daǵdarys jaǵdaılaryna daıyndyǵyn arttyrýǵa, kúshtik organdardyń ózara is-qımyl algorıtmin qaıta qaraýǵa baǵyttalǵan sharalar týraly málimet berildi.
Prezıdent Ishki ister mınıstrligine eldegi quqyqtyq tártipti qamtamasyz etý, ustalǵan adamdardyń konstıtýsııalyq quqyqtaryn qorǵaý jáne qańtardaǵy qaıǵyly jaǵdaılardyń sebepterine obektıvti tergeý júrgizý jónindegi jumystardy jalǵastyrýdy tapsyrdy.
