Infografıkany jasaǵan Amangeldi Qııas, «EQ»
«Báıterek» ulttyq basqarýshy holdınginiń habarlaýynsha, 2021 jyly agroónerkásip keshenin «Agrarlyq nesıe korporasııasy» men «QazAgroQarjy» arqyly qarjylandyrý kólemi 464 mlrd teńgeden asqan. 2020 jylmen salystyrǵanda qarjylandyrý 4 paıyzǵa ósti.
О́tken jyly qoldaý sharalaryna 23 myńǵa jýyq kásipker ıe bolǵan. Qarjylandyrý kóleminiń 96 paıyzdan astamy shaǵyn jáne orta kásipkerlik sýbektilerine berildi.
«Keń dala» nysanaly kredıt berý baǵdarlamasy aıasynda kóktemgi egis jáne egin jınaý jumystaryn júrgizýge 70 mlrd teńge bólindi. Bul shamamen 3,6 mln gektar aýmaqta egis jumystaryn júrgizýge múmkindik berdi.
«QazAgroQarjy» lızıngtik baǵdarlamalary boıynsha aýyl sharýashylyǵy tehnıkasyn satyp alýdy qarjylandyrý kólemi 140 mlrd teńgeden asty (jyldyq ósim – 28 paıyz). Bul 7,3 myń birlik aýyl sharýashylyǵy tehnıkasyn satyp alýǵa jol ashty. Osylaısha, kórsetkish 2020 jylǵy kólemnen asyp tústi. 2020 jyly 6 myń birlik tehnıka lızıngke alynǵan edi.
Agrarlyq sektorda básekege qabiletti óndiristik bazany damytý úshin 2021 jyly jalpy quny 71,8 mlrd teńge bolatyn 46 joba qarjylandyryldy. Oǵan 53,8 mlrd teńge kredıt berildi. 53,1 mlrd teńge kredıt berilgen, quny 71,3 mlrd teńge bolatyn 43 joba paıdalanýǵa berildi. Engizilgen jobalar jemis, shyryn, et jáne sút ónimderi, ósimdik maılary, kókónis jáne taǵy basqa ónim túrlerin óndirýge baǵyttalǵan.
Agroónerkásip kesheni sýbektilerine ekinshi deńgeıli bankter beretin kredıtterge kepildik berý baǵdarlamasy jalǵastyryldy. Ol qaryz alýshyda kepildik jetpegen kezde ınvestısııalyq jobalardy engizýge yqpal etedi. 1,6 mlrd teńgege 7 kepildik berildi. Osylaısha, aýyl sharýashylyǵyna 3,2 mlrd teńgeden astam somada banktik qaryz tartyldy.
Uıym qurylymyn ońtaılandyrý sharalary sheńberinde 2021 jyly «Báıterek» holdıngi «Aýyl sharýashylyǵyn qarjylaı qoldaý qoryn» «Agrarlyq nesıe korporasııasyna» qosý jumysyn aıaqtady. Bul óńirlerdegi fılıaldyq jeli arqyly fermerlerge «bir tereze» qaǵıdaty boıynsha kredıt berýge múmkindik beredi.
