Áleýmettik nysandar talapqa saı bolýǵa tıis

Infraqurylymdarmen qatar, jurtshylyqqa qyzmet kórsetetin mekemelerdi talapqa saı jetildirý ýaqyt kúttirmeıdi. Almaty qala­synyń ákimi Erbolat Dosaev shet aýdandardy aralaý kezinde bir­qatar kemshilikke kóz jetkizip, taıaý arada sheshýge tıis jobalardy jú­zege asyrýǵa tapsyrma berdi. Túrksib aýdanyndaǵy jumys saparyn «Álmerek» shaǵyn aýdanynan bastaǵan qala basshysy qazirgi kezde áleýmettik ınfraqurylymdy da­mytýǵa qatysty máseleler ót­kir turǵanyn atap ótti. Munda ót­ken ǵasyrdyń 80-jyldary salyn­ǵan turǵyn úıde jumys istep tur­ǵan dárigerlik ambýlatorııa sanı­tarlyq normalarǵa saı emes jáne jón­deýge de kelmeıdi. Al 300 oqý­shy orynǵa eseptelgen №195 jal­py bilim beretin mektepte 741 oqýshy bilim alýda.

Kóshpeli keńes barysynda qala ákimi kún tártibinde turǵan máselelerdi sheshý jónindegi usynystarmen tanysty. Jaıly qala­lyq orta basqarmasyna múd­deli memlekettik organdar­men birlesip aǵymdaǵy jyly medı­sınalyq nysannyń qurylysyn jobalaýdy bastaý jáne basqa da áleýmettik nysandardyń: bala­baqshanyń, sport jáne balalar alańdarynyń qurylysyn odan ári júrgizý máselesin pysyqtaý, son­daı-aq №195 mektepke qo­symsha nysannyń 450 oryndy qurylysyn jobalaý merzimin jedeldetý jáne aǵymdaǵy jyly qurylysty bastaý týraly tapsyrma berdi.

Qazirgi kezde Túrksib aýdanynda nazar aýdara­tyn ózge de máseleler jetkilikti. Osy oraıda turǵyndardy ortalyqtan sapaly sýmen jáne sý burýmen qam­tamasyz etý maqsatynda bı­yl shaǵyn aýdanda ınjenerlik jeli­lerdiń II kezeńiniń qurylysy bas­talyp, sýmen – 287, sý burýmen 519 úıdi qamtamasyz etý josparlanýda.

Jumys sapary barysynda qala ákimi «Avıator» stadıonynyń aýmaǵyn aralap kórip, 3 gektar aýmaqta ornalasqan sport ny­sa­nynyń basym bóligi bos tur­ǵanyn kórdi. Osyǵan baılanys­ty deneshynyqtyrý-saýyq­tyrý keshenin jobalaý týraly sheshim qabyldanyp, aldaǵy ýa­qytta ondaǵy seksııalarǵa «Nur­shashqan», «Álmerek» shaǵyn aýdan­darynyń, sondaı-aq áýejaı mańyndaǵy turǵyn úı alabynyń balalary tegin qatysýy qajettigi tapsyryldy. Sondaı-aq stadıondy jańǵyrtýǵa nazar aýdarylyp, kórermender trıbýnalary men kıim aýystyratyn bólmeler jónge keltirilip, júgirý joly salynatyn bolady. Sondaı-aq qala basshysy Ogarev kóshesindegi jumys istemeıtin burynǵy vedomstvolyq balabaqshanyń aýmaǵyn paıdalaný josparlarymen tanysty. Munda árqaısysy 160 oryndy memlekettik zamanaýı balabaqsha men balalardyń damý jáne shyǵarmashylyq ortalyǵynyń qurylysy jobalanýda. Qazirgi kezde 400-ge jýyq bala kezekte tur, ázirge 280 oryndy bir ǵana №185 memlekettik balabaqsha ju­mys istep tur. Osyny eskere otyryp, qala ákimi jobalaý ju­mystaryn aǵymdaǵy jyldyń III toqsanynyń sońyna deıin aıaqtaýdy tapsyrdy. «Qaırat» shaǵyn aýdanynda 41 kóppáterli turǵyn úıdiń, 1 500 oqýshyǵa ar­nalǵan jalpy bilim beretin mek­teptiń qurylysymen, emhana men balabaqshany jobalaý barysy da ákim nazaryna ilikti.

Sýmen jabdyqtaý jáne káriz máselelerine erekshe nazar aýdaryldy. Búginde 200-ge jýyq úı jobaǵa áli kirmegen. Qala­nyń Energotıimdilik jáne ın­fra­qu­ry­lymdyq damý basqar­masyna abonentterdi jelilerge qosý ju­mystaryn shuǵyl aıaqtaýy tıis.

Shahar basshysy ótken ǵasyrdyń 30-jyldary salynǵan memlekettik tilde oqytatyn №59 mektep-gımnazııa jumysymen de tanys­ty. Qazirgi kezde 860 oryndy mektepte 1 251 oqýshy bilim alýda. Aǵymdaǵy jyldyń aqpan aıynda mektep-gımnazııanyń janynan qosalqy nysan salý jónindegi jobalyq qujattama memlekettik saraptamanyń qortyndysyn aldy. Qalalyq jaıly orta basqarmasyna rekonstrýksııadan soń sport ala­ńyn abattandyrý úshin tıisti aýmaqty keńeıtý tapsyryldy. Son­daı-aq qala ákimi eski úılerdi renovasııalaý aıasynda salynyp jatqan úılerdiń qurylysymen tanysty. Munda Saýranbaev, Mol­daǵalıev, Chernyshevskıı, Tolstoı kósheleriniń sharshysynda 4 úı buzylyp, 3 úı salyndy, 7 úıdiń qurylysy jalǵasýda. Jalpy, Túr­ksib aýdanyndaǵy 606 úı renovasııa baǵdarlamasyna jatady, bul Almaty qalasyndaǵy eski turǵyn úılerdiń jalpy sany­nyń 50 paıyzyn quraıdy. Ákim sonymen birge aýdandy abattandyrý, Oqýshylar úıiniń janynda ornalasqan skverdi jańartý jáne jańa rekreasııalyq aımaqtardy qurý jobalarymen tanysty.

ALMATY