Ǵalymjan Pirmatov óz baıandamasynda Ulttyq bank erkin ózgermeli baǵamda ınflıasııalyq targetteý rejımin ustanýdy jalǵastyratynyn jetkizdi.
«Ulttyq banktiń barlyq qajetti quraldary bar jáne olardy aqylǵa qonymdy tásilmen paıdalanady. Eldiń jalpy halyqaralyq rezervteri 25 aqpanda 87,7 mlrd dollardy qurady. Aı basynan beri ósim 346 mln dollar. Onyń ishinde Ulttyq qordyń aktıvteri – 54,0 mlrd dollar, altyn – valıýta rezervteri – 33,7 mlrd dollar. Biz qarjylyq turaqtylyq úshin táýekelder kúsheıgen jaǵdaıda valıýtalyq ıntervensııalar júrgizemiz», dedi Ǵalymjan Pirmatov.
Ulttyq bank basshysy sharalar kesheni teńgelik aktıvterdiń tartymdylyǵyn saqtaýǵa, dollarmen baılanysty táýekelder men aıyrbas baǵamyna qysymdy tómendetýge, sondaı-aq ınflıasııanyń eleýli ósý táýekelderin jumsartýǵa baǵyttalǵanyn aıtty. Sondaı-aq ol reseılik banktermen transshekaralyq operasııalardyń jumys jospary daıyndalǵanyn atap ótti.
«Qazaqstandyq bankterdiń klıenttik jáne menshikti tólemder men aqsha aýdarymdaryn el ishinde júrgizý boıynsha barlyq operasııalary shtattyq rejımde júzege asyrylady. SWIFT júıesinen ajyratylǵan reseılik bankterdiń klıentterimen transshekaralyq operasııalardy qamtamasyz etý úshin ózara esep aıyrysýlardy júrgizýdiń balamaly tetikteri ázirlendi», dedi Ǵalymjan Pirmatov.
Ǵalymjan Pirmatov Qazaqstan Eýrazııalyq ekonomıkalyq odaqtyń múshesi ekenin, sol odaq aıasynda bizge ákelinetin ımporttyń 42%-y Reseıge tıesili ekenin eske saldy.
«Osynyń bárin eskersek, Reseıge qarsy jańa sanksııalar bizdiń elimizdiń ekonomıkasyna áser etedi. Reseı rýbliniń álsireýine baılanysty Qazaqstannyń qarjy naryǵyna qysym ósýde», dedi Ulttyq bank basshysy.
