Kásipker kútken qujat

Keshe Premer-Mınıstr Serik Ahmetovtiń tóraǵalyǵymen Úkimet otyrysy ótti. Onda Úkimet músheleri «Ruqsattar jáne habarlamalar týraly» jáne «Qazaqstan Respýblıkasynyń keıbir zańnamalyq aktilerine ruqsat berý júıesi máseleleri boıynsha ózgerister men tolyqtyrýlar engizý týraly» zań jobasyn bir aýyzdan maquldady. Otyrysty ashqan S.Ahmetov daıyndalǵan zań jobasy týraly baıandaý úshin  О́ńirlik damý mınıstri Bolat Jámishevke sóz berdi. Mınıstr zańnyń mańyzy – Memleket basshysynyń ruqsat berý zańnamasyna jańa úderister engizý boıynsha bergen tap­syrmalarymen mán mátindik úıle­­simdiliginde ekenin atap ótti. Qujattyń mańyzdy bóligine nazar aýdaryp, qoldanystaǵy ruqsat berý júıesiniń negizgi problemalaryna toqtaldy. Sóıtip, ony sheshýdiń joldary týraly áńgimeledi. «Bul zań jobasy úsh bólimnen turady. Oǵan «Lısenzııalaý týraly» zań tolyǵymen endi. Zań jobasynyń bul bóliminde osy saladaǵy búgingi problemalar eskerile otyryp pysyqtalady. Sondaı-aq, zań jobasynda «Ákimshilik rásimder týraly» Zańnan habarlamalar týraly erejeler tolyǵymen endi. Zań jobasynyń úshinshi bólimi tolyǵymen qaıta jazylyp, lısenzııa bolyp tabylmaıtyn ruqsat rásimderiniń máselelerin reglamentteıdi», dedi mınıstr. Zań jobasynyń qosymshasyna 742 qujat engen. Onyń – 709-y­ ruqsat, 33-i habarlama. Onda Qa­zaq­stannyń ruq­sattar sanynyń únemi artýy, jańa ruqsattardyń negizsiz engizilýi, ruqsat berý júıesinde táýekelderdi baǵalaý­­­dyń qoldanylmaýy, ruqsattar­­dyń tártipke keltirilmeýi, ruqsat uǵy­mynyń joqtyǵy syndy bir­qatar júıelik máseleleri sheshi­min tap­­qan. «Zań jobasy olar­dy sheshýdiń jol­daryn da kóz­deıdi. Zańdaǵy ruqsattardyń tolyq tizbesin jasap, jańa ruqsat­tardy engizýde retteýish áserdi qoldanady. Munymen birge, ruqsattardy qaýiptilik dáre­jesi boıynsha sanattap, úlgi­lik tásildemelerdi belgileıdi. Sóı­tip, ruqsattardy jikteıdi. Osy zańdaǵy lısenzııalar men ózge ruq­sattardy qosa qaraǵanda, ámbebap ruqsat uǵymyn engizý bolyp tabylady», dedi B.Jámishev. Onyń aıtýyna qaraǵanda, ruq­sattar men eskertýler saladaǵy memlekettik retteýdiń negizgi qaǵıdat­­tary – tutynýshylardyń, bıznes pen memleket múddeleriniń tepe-teń­digin saqtap otyrý. Sondaı-aq, ruq­sattar men eskertý tártipterin engizýdiń tıimdiligi men negizdiligi, memlekettik organdar qyzmetiniń ashyqtyǵy men barlyq aqparattardyń qoljetimdi bolýy qarastyrylǵan. Sóıtip, ózara jaýaptylyq artyp, bıznes jemqorlyqtan azat etiledi. Mınıstr, mundaı ustanymdardyń buǵan deıin Úkimette tanystyrylǵan, 2020 jylǵa deıingi kásipkerlik qyz­met­terdi memlekettik retteýdiń Tujy­rymdamasy jobasyna engizil­genin, túptep kelgende onyń ózger­meıtinin jáne memlekettiń barlyq retteýshilik saıasatyna jatqyzy­latynyn aıtty. Munymen qatar, B.Jámishev 9 kodeks pen 74 zańǵa ilespe zań jobalarymen birge ózgerister men tolyq­­tyrýlar engiziletinin habarlady. Atap aıtqanda, Azamat­tyq kodekske, Ákimshilik quqyq buzýshylyqtar týraly kodeks­ke, «Qazaqstan Respýblıkasynda mem­le­kettik baqylaý men qadaǵalaý týraly» Zańǵa ózgerister engizý qarastyrylǵanyn málimdedi. Otyrysta sóz alǵan Ulttyq ká­sipkerler palatasynyń tóraǵasy Abylaı Myrzahmetov bul zańnyń tıisti memlekettik organdar men kásipkerler jáne birqatar qoǵamdyq uıymdardyń qatysýymen ár taraýy muqııat zerdelenip, ázirlegenin málimdedi. «Sondyqtan osy zańnyń tezirek qabyldanýyn bıznes qaýym­­das­tyqtary asyǵa kútip júr», dedi palata tóraǵasy. Úkimet basshysy otyrysty qory­tyndylaı kelip, zań jobalary tutas júıelik problemalardy sheshýge baǵyt­talǵanyna toqtaldy. «Ony qabyl­daý arqyly bızneske negizsiz ruqsat berý joldaryna tosqaýyl qoıy­lady. Jańa ruqsatnama, ol biry­ńǵaı tizbege qosylǵannan soń jáne tek onyń retteýshilik yqpaly­na taldaý júrgizilgennen keıin ǵana iske qosylady. Memleket basshy­sy­nyń Jarlyǵymen 2015 jyldyń 1 qańtaryna deıin ruqsat berýdi avtomattandyrýdy aıaqtaý da qaras­tyrylýda. Atalǵan zańnyń qabyl­danýy aldaǵy jyldan bastap ekonomıkany memlekettik retteýdiń jańa sapalyq deńgeıine, keshendi túrde kóshirýge múmkindik beredi», dep túıindedi sózin S.Ahmetov. Premer-Mınıstr О́ńirlik damý mınıstrligine bul zań jobalaryn aǵym­daǵy jyldyń 1 sáýirine deıin Parlament Májilisine engizýdi qadap tapsyrdy. Nurbaı ELMURATOV, «Egemen Qazaqstan».