Alashtyń aıaýly ánshisi

Ánshi mereıtoıy kóktemniń al­ǵashqy kúninde kóńilge kórik bergen tamasha kórmemen bastaldy. «Qa­zaqkonsert» memlekettik konsert uıymynyń ǵıma­ratynda ashylǵan kórmede aty ańyzǵa aınalǵan ánshiniń ónerdegi al­ǵashqy qadamdary men zor jetis­tikteri, soǵys jyldaryndaǵy qaı­­sarlyǵy, azamattyq bıik parasaty, ómiriniń jarqyn sátterinen foto­sýretter men qundy já­di­ger­­­ler qamtylǵan. Aıtýly kór­meni uıym­dastyrýǵa ánshiniń uly Tájen men kelini Maral ti­ke­leı atsalysyp, kórme tórine óner ıesiniń sırek sýretterin usy­­nypty. Sondaı-aq mádenı oqıǵa aıasynda Roza Baǵlanovaǵa arnalǵan eksklıýzıvti músin tanystyryldy. О́ner týyndysynyń avtory – gıperrealıst músinshi Aıdos Esmaǵambetov.

Saltanatty is-shara odan ári «Qazaq­tyń qaharman qyzy» atty mazmundy konsertke ulasty. Keshti Mádenıet jáne sport mınıstri Dáýren Abaev betashar sózimen ashyp, IýNESKO deńgeıinde toılanatyn tulǵalar tizimine engen dańqty ánshiniń ǵa­syrlyq toıy resmı túrde bas­talǵanyn aıryqsha atap ótti.

Esimi ańyzǵa aınalǵan ánshiniń qazaq­tyń án óneri men rýhanııatyna sińirgen eńbegi eresen. Ásirese maıdan dalasynda oq pen ottyń ortasynda júrip salǵan áni soǵysqa qatysqan talaı sarbazdyń janyna jiger syılap, jeńiske degen qadamdy jaqyndatýǵa septeskeni anyq. Roza Tájibaıqyzy – Halyq Qaharmany ataǵyna ıe bolǵan Qazaqstandaǵy jalǵyz ánshi. Ol ómi­riniń 70 jylynan astamyn sahnada ótkizip, álemniń 50-den asa elinde bolyp 25 tilde án shyrqaǵan. Sóıtip jarty ǵasyrdan astam ýaqyt boıy qa­zaq halqynyń dástúrli má­denıeti men óneriniń órkendep, álem­ge tanylýyna úlken úles qosty. Roza Baǵlanovanyń oryndaýyndaǵy «Aqmańdaılym», «Ińkárim», «Ádemi-aý», «Aq tamaq», «Aq­suńqarym». «Ah, Samara – gorodok» ánderi ánshiniń ásem daýsymen birge ha­lyqtyń janyna berik ornyǵyp, el júreginde máńgilik jattalǵan.

Qazaq ónerinde qaıtalanbas iz qal­dyrǵan tarıhı tulǵanyń mereıtoıyna arnalǵan keshte Roza Baǵlanovanyń ómiri, shy­ǵar­mashylyǵy jaıly arnaıy daıyndalǵan beınerolık kórer­men nazaryna usynyldy. Roza Rym­baeva, Tamara Asar, Renat Gaı­sın, Jubanysh Jeksen, Aıgúl Qosanova, Zarına Altynbaeva, Ámire, Rýhııa Baıdúkenova, Janet (Belarýs), Hýlkar Abdýllaeva (О́zbekstan), Mır­bek Atabekov (Qyr­ǵyzstan) bas­taǵan elimizdiń jáne sheteldiń ta­nymal ártisteri, sonymen qatar Roza Baǵlanovanyń nemeresi Úrbıbi Baǵ­lanova da óz ónerin halyqqa pash etti.

Ánshiniń ónegeli ómiri men shy­ǵar­mashylyǵyn nasıhattaý sharalary mu­nymen áste toqtamaq emes. Elimizdiń bar­lyq óńirinde jyl boıy Roza Baǵla­novanyń mereıtoıyna arnalǵan festıvalder men konsertter, mazmundy keshter men semınarlar, qundy kórmeler men mańyzdy konferensııalar ótkiziletin bolady.