Hadısha Bókeeva atyndaǵy Batys Qazaqstan oblystyq qazaq drama teatrynda ótken saltanatty jıynda Qazaqstan Respýblıkasy Tótenshe jaǵdaılar mınıstriniń orynbasary Marat Kúldikov oblystyń bas qutqarýshysy Ernur О́tegenovke kásibı erlik, qurmet pen batyldyqtyń sımvoly – jaýyngerlik týdy tabys etti.
«Memleket basshysy azamattardyń qaýipsizdigine erekshe kóńil bóledi. Bul úshin biz tótenshe jaǵdaılardyń aldyn alý jáne joıý boıynsha mindetterimizge adal bolýymyz kerek. О́tken jyldyń qazan aıynda Prezıdent Jarlyǵymen mınıstrliktiń jáne onyń aýmaqtyq bólimsheleriniń sımvoly retinde Tý bekitildi. Táýelsizdik jyldarynda qutqarýshylardyń óz ómirin qıyp jasaǵan erligi jeterlik. Sondyqtan búgingi kún Departamenttiń barlyq ujymy úshin aıtýly oqıǵa», dedi Tótenshe jaǵdaılar vıse-mınıstri.
Kezdesý barysynda mınıstr orynbasary jeke quramǵa Qazaqstan Respýblıkasy Prezıdenti Qasym-Jomart Toqaevtyń, Tótenshe jaǵdaılar mınıstri Iý. Ilınniń tapsyrmalaryn jetkizip, mınıstrlik tarapynan atqarylyp jatqan jumys jóninde aıtyp berdi. Qutqarýshylar men órt sóndirýshiler óz saýaldaryn qoıyp, tushymdy jaýap aldy. Jıyn aıaqtalǵan soń Marat Kúldikov birqatar órt sóndirý bólimderin aralap shyqty.
Aıta keteıik, 2022 jylǵy 3-4 naýryz aralyǵynda respýblıkalyq «Kóktem – 2022» komandalyq-shtabtyq oqý-jattyǵýy ótip jatyr. Jattyǵýdyń maqsaty – tótenshe jaǵdaılardyń aldyn alý jáne olardy joıý kezinde Azamattyq qorǵaý memlekettik júıesiniń is-qımyldaryn tekserý.
Bıyl respýblıkalyq oqý-jattyǵý shtaby Batys Qazaqstan oblysynda ornalasqan. Qazir ortalyq memlekettik organdar men Tótenshe jaǵdaılar mınıstrliginiń jaýapty mamandary oblys aýmaǵynda júr. Atalǵan oqý-jattyǵýlarǵa Qazaqstan Respýblıkasy Ulttyq Ulanynyń 5517 áskerı bólimi, azamattyq qorǵaý qyzmetteriniń kúshteri men quraldary jumyldyrylǵan.
Batys Qazaqstan oblystyq Tótenshe jaǵdaılar departamentiniń baspasóz qyzmeti málimdegendeı, sharaǵa 2381 adam, 732 tehnıka, 68 júzý quraly qatysýda. Oqý-jattyǵýlarǵa «Qazavıaqutqarý» AQ áýe kemeleri de tartylǵan.
