QR Parlamenti Májilisinde «Qazaqstan Respýblıkasynyń keıbir zańnamalyq áktilerine turǵyn úı saıasatyn reformalaý máseleleri boıynsha ózgerister men tolyqtyrýlar engizý týraly» zań jobasyn tanystyrǵan QR Indýstrııa jáne ınfraqurylymdyq damý vıse-mınıstri Erkebulan Daýylbaev osyndaı málimet aıtty.
«Zań jobasy sheńberinde «Otbasy Banki» ulttyq damý ınstıtýty bolyp qaıta qurylýda, onyń negizgi mindeti – respýblıka boıynsha azamattardy turǵyn úımen qamtamasyz etý boıynsha turǵyn úı qatynastaryn damytý. Osyǵan baılanysty Otbasy bankin ekinshi deńgeıli bankter júıesinen shyǵarý jáne oǵan turǵyn úıge esepke alýdy, qoıýdy jáne ony bólýdi ortalyqtandyryp júzege asyratyn ulttyq damý ınstıtýty mártebesin berý kózdelgen.
Otbasy bankiniń quqyqtyq mártebesi Qazaqstan Respýblıkasynyń zańnamalyq aktilerimen aıqyndalatyn bolady. Otbasy banki Qarjy naryǵyn retteý jáne damytý agenttiginiń qadaǵalaýyndaǵy sýbektiler qatarynan shyǵarylatyn bolady», dedi vıse-mınıstr.
Onyń aıtýyna qaraǵanda, Qarjy naryǵyn retteý jáne damytý agenttigi men Ulttyq Bank qarjylyq qyzmetterdi tutynýshylardyń quqyqtaryn qorǵaý máseleleri boıynsha baqylaý men qadaǵalaýdy saqtaıdy.
«Sonymen qatar, Otbasy banki depozıtterdi qabyldaý, zańdy jáne jeke tulǵalardyń banktik shottaryn ashý jáne júrgizý, kassalyq operasııalar, banktik qaryz operasııalary, salymshylarǵa turǵyn úı, aralyq jáne aldyn ala turǵyn úı qaryzdaryn berý sııaqty Qazaqstan Respýblıkasynyń zańnamasynda aıqyndalǵan sheńberde banktik jáne basqa da operasııalardy agenttiktiń lısenzııasynsyz júzege asyratyn bolady. Bul rette ýákiletti organnyń ekinshi deńgeıdegi bankti bank operasııalaryn júrgizýge arnalǵan lısenzııadan aıyrý týraly sheshimi kepildik berilgen ótemdi tóleý úshin negiz bolyp tabylatyndyǵyn eskere otyryp, Otbasy bankiniń depozıtterge mindetti kepildik berý júıesine qatysýy múmkin emes. Osyǵan baılanysty, «Otbasy bankinde» ornalastyrylǵan turǵyn úı qurylys jınaq aqshasyna salymdardyń saqtalýyna QR Úkimeti aıqyndaıtyn mólsherde jáne tártipte memleketpen kepildik berý usynylady», dedi Erkebulan Daýylbaev.
Vedomstvo ókili usynylyp otyrǵan jańa tetik boıynsha jergilikti atqarýshy organdarda kezekte turǵandardyń aǵymdaǵy bazasy «Otbasy bankine» berilip, jergilikti deńgeıde esepke qoıý toqtatylatynyn aıtty.
