Kópbalaly jáne az qamtylǵan otbasylarǵa jan-jaqty kómek kórsetý maqsatynda 2019 jyldyń tamyz aıynan bastap Almatynyń ár aýdanynda «bir tereze» qaǵıdaty boıynsha «Baqytty otbasy» ortalyqtary jumys istep keledi. Zýlfııa Baısaqovanyń aıtýynsha, búginde qalada 30 339 kópbalaly otbasy turady. Kópbalaly analardyń 4 855-i «Altyn alqa», «Kúmis alqa» alqalarynyń ıegerleri. Sonymen qatar 1 300-den astam otbasy ataýly áleýmettik kómek alady.
«Baqytty otbasy» ortalyqtarynda psıhologııalyq jáne zańgerlik kómekpen qatar jumysqa ornalasý men bos ýaqytty tıimdi paıdalaný baǵytynda keńester beriledi.
«Bizdiń ortalyqtarda analar men otbasylarǵa profıldik kýrstardan ótýge kómektesetin Isker ana baǵdarlamasy jumys isteıdi. Kásipkerler palatasynda áıelder kásipkerlik negizderine oqytylady. Osy baǵdarlamanyń kómegimen kóptegen ana óz bıznesin ashyp, azyq-túlik jáne kıim-keshek saýda oryndary, Áýezov aýdanyndaǵy aspazdyq, qalanyń bes aýdanyndaǵy tigin sehtarynyń jumysy jolǵa qoıyldy», dep atap ótti Z.Baısaqova.
Zýlfııa Baısaqova atap ótkendeı, «Baqytty otbasy» ortalyqtarynda otbasylyq qundylyqtardy dáripteý, otbasyn qurmetteý jáne óskeleń urpaqty adamgershilikke tárbıeleý, kópbalaly otbasylardyń laıyqty ómir súrý jaǵdaılaryn jaqsartýǵa kómektesýge basymdyq beriledi. Búginde kópbalaly otbasylardyń kópshiligi Alataý aýdanynda turady.
Naqty sharalar qoǵamnyń alǵa jyljýyna yqpal etedi. «Baqytty otbasy» ortalyǵynda ashylǵan qolónerdi damytý ortalyǵynyń jumysy jolǵa qoıylǵan. Osy ortalyq arqyly 12 myń adam oqytý kýrstarynan ótti, myńnan astam áıel tigin sheberhanalary, aspazdyq, baspahana, sulýlyq stýdııalary sııaqty jeke isterin ashýǵa jáne damytýǵa óteýsiz granttar aldy. Osyndaı kýrstardyń nátıjesinde áıelder tabys taýyp qana qoımaı, óz otbasylaryna qýanysh syılap alǵa qoıǵan maqsattaryn júzege asyrýda. Búginde «Baqytty otbasy» ortalyqtaryna otbasy jaǵdaıyn jete biletin, olarmen tyǵyz jumys isteıtin ári qordalanǵan máselelerin der kezinde sheshýge mamandanǵan kópbalaly analardyń ózderi basshylyq etýde. Bul ortalyqtar kelem deýshilerge árdaıym ashyq ári munda jańa jobalardy bastaý múmkindigi mol.
ALMATY
