Birde aýylda ulan-asyr báıge boldy. Qasen baıdyń qoıyn baǵyp júrgen jerinen shaýyp kelip báıgege qatysqaly turǵan topty attyń ishinen Shoıban shashasyna úki taqqan, biraq ózge attardaı emes, qımylsyz, salmaqty turǵan bir kúreńdi kórsetip, «osy at búgin báıgeden keledi» demesi bar ma? Attardy aıdaǵaly turǵan top ta, báıgeni kórýge jınalǵan jurt ta Shoıbannyń sózin «jyndynyń sandyraǵyna» balady. Bas báıgege qomaqty aqsha tigilgen alamannyń attaryn jurt degbirsizdene kútýde. Bir ýaqytta uzyn shań kórindi. Jurt qıqýlap, báıgege at qosqany da, qospaǵany da eleýrep ala jóneldi. Anadaıda álgindegi úki taqqan kúreń at sııaqty Shoıban da únsiz hám salmaqty kúıde tur. Mine, attar jaqyndap keledi, bireýi «meniń torym ǵoı ana kele jatqan» dese, endi biri odan qalyspaı «meniń qasqam eken» desip, bir-birine erik bermeı tur. Bir ýaqytta kómbege álgi kúreń jaqyndap keldi, tanaýynan esken jel qarsy aldyndaǵy joldy arshyp kele jatqandaı, tipti tuıaǵy qara jerdiń apshysyn qýyrardaı. Jurt bul joly basqasha aıqaıǵa basty. О́ziniń «sáýegeıligi» rasqa aınalsa da, Shoıban áli únsiz. Báıge bitti, daýryqqan jurt kúreń attyń ıesin súıinshilep, anadaıǵa ertip alyp ketti. Al báıge tóbeniń basynda eń sońynda sopaıyp Shoıban qaldy. Ol taǵy bir júırikti kútetindeı, tipti sonyń kelýinen dámeli bapker sııaqty.
Taǵy birde aýylda bir aqsaqal ómirden ótti. Jurt jınalyp álgi kisiniń otbasyna kóńil aıtty. Qaraly úıge jınalǵandar qaıtqan kisiniń ómirde jasaǵan izgi isterin aıtyp, áńgimelesip turǵan sátte jalǵyz ózi sopıyn Shoıban da attan tústi. Árıne, ol da kóńil aıtýǵa kelip tur. Sosyn ol qaıtys bolǵan kisiniń uldaryna qarap: «Jasymańdar, jylamańdar, adam túgili jaqsy at ta óledi ǵoı» degeni. Qapelimde aıtylǵan bul sózdi árkim ártúrli qabyldap, Shoıbandy jazǵyryp jatty. Ony «jyndanǵan» deýshiler de boldy. Sol Shoıban bir jyly qysta qatty aýyryp, tósek tartyp jatyp qaldy. Sońǵy sátinde ol qasyna barǵan bir jigitke: «Baryp qarashy, tory attyń eri alynyp pa, aýnap tastamasyn» depti. Osy sózden keıin aýzy sózge kelmeı baqıǵa attanypty. Bir ómir solaı sóndi de qaldy. Biraq onyń kúreń attyń taǵdyryn boljaǵan sáýegeıligi, atyn basyna urǵan kisini jezdeı qaqtap boqtaǵany, «adam túgili jaqsy at ta óledi» degen máteli bul kúnderi el aýzynda jıi aıtylady. Menińshe, Shoıbannyń júreginde bir ǵana uǵym bar desek, ol jylqyny qorǵaý degen uǵym bolsa kerek.
