Oblystyq TJD, Tótenshe jaǵdaıdyń aldyn alý basqarmasynyń bastyǵy Alekseı Shtykel, «Qazgıdromet» RMK fılıalynyń dırektory Adel Ahmetovtiń qatysýymen ótken baspasóz konferensııasynda sý tasqyny qaýpi bar kezeńge daıyndyqtyń qalaı júrip jatqandyǵy týraly aıtyldy.
– Sý tasqynynyń bizdiń oblysta oryn alýy – jyldaǵy qubylys. Taýly, nýly, sýly óńir bolǵandyqtan, bul qalypty jaǵdaı. Tek biz oǵan daıyn bolýymyz kerek. Naqtyraq aıtsaq, oblys aýmaǵynan 800-ge jýyq ózen aǵyp ótedi. Olardyń jalpy uzyndyǵy 10 myń shaqyrymnan asady. Kóp jyldyq sınoptıkalyq boljam boıynsha, oblys ózenderindegi sý tasqyny naýryzdyń ekinshi onkúndiginde bastalyp, maýsymnyń ekinshi onkúndiginiń ortasyna deıin sozylady, – deıdi oblystyq TJD aldyn alý basqarmasynyń bastyǵy Alekseı Shtykel.
Búginde oblys aýmaǵynda jaýapty mamandar daıyndyq kestesi boıynsha jumys istep jatyr. Ákimdikterde táýlik boıy kezekshilik uıymdastyryldy, sý tasqyny qaýpi bar jerlerge monıtorıng júrgizildi. Is-qımyldardyń barlyǵy derlik egjeı-tegjeıli josparlanyp, sý tasqynyna qarsy is-sharalar oblysta júıeli túrde júrgizilip jatyr. Aqpan aıynyń birinshi juldyzynan bastap óńirde sý tasqyny bolý qaýpi bar aımaqtarda joǵary sanattaǵy arnaıy mamandar kezekshilik júrgizip, saraptama jasady. Oblys ákimi apparatynyń jumyldyrý daıyndyǵy bóliminiń basshysy Erken Sársembınovtiń aıtýynsha, kezek kúttirmeıtin shyǵyndar men tótenshe jaǵdaılardy joıý úshin bıýdjetten barlyǵy 2,6 mlrd teńge qarajat qarastyrylǵan. Onyń 1,2 mlrd teńgesi oblystyq rezervte.
Turǵylyqty aımaqtardan jalpy kólemi 304 myń tekshe metr qar shyǵaryldy, avtomobıl jáne temirjoldardaǵy sý ótkizý qurylystary, kópirler, aryqtar men kanaldar tazartyldy. 104 myń dana qap, 6,7 myń tonna ınertti materıaldar, 690 tonna janar-jaǵarmaı daıyndaldy.
Aıta ketsek, oblys boıynsha 108 eldi mekendi sý basý qaýpi bar. Sý tasqynyn boldyrmaý úshin 3 naýryzdan bastap oblystyń Buqtyrma, Ertis, Kúrshim, Úbi ózenderi kesip ótetin 7 aýdanda muz jarý profılaktıkalyq jarylys jumystary bastaldy. Sý basýyn boldyrmaý úshin jaǵalaýdy bekitý jáne túbin tereńdetý, bógetterdi jóndeý, arnany retteý syndy jumystar qolǵa alynyp, aldyn alý sharalary júrgizilip-aq jatyr.
Al 3-5 naýryz aralyǵynda Borodýlıha, Shemonaıha aýdandarynda jáne Semeı qalasynda jalpy aýdany 29 896 sharshy metrdi quraıtyn ózen muzyn jarý jumystary júrgizildi.
– 10 naýryzdaǵy jaǵdaımen alyp qarasaq, Shyǵys Qazaqstan oblysynyń ózenderindegi gıdrologııalyq jaǵdaı turaqty. Qysqy sý deńgeıiniń tómendigi baıqalady. Shaǵyn ózenderdiń keıbirinde muz erip jatyr, – deıdi «Qazgıdromet» RMK fılıalynyń dırektory Adel Ahmetov.
Eger tabıǵattyń tosyn minezi baıqalyp, jaǵdaı kúrt ózgerse, oblys jáne aýdan ákimdikterin, oblystyq TJD jáne múddeli organdar dereý habardar etilmek. Jalpy, Shyǵys Qazaqstanda 2021-2023 jyldarǵa arnalǵan sý tasqynyna qarsy is-sharalardyń jol kartasy sheńberinde 162 mln teńgege 11 is-shara júzege asyrylǵan.
Shyǵys Qazaqstan oblysy
