Koreıanyń Aýrýlardy baqylaý jáne aldyn alý agenttiginiń (KDCA) derekterine saı, elde kúndelikti 400 741 juqtyrý jaǵdaıy tirkelip jatyr, olardyń basym bóligi – jergilikti halyq.
Jalpy elde vırýs juqtyrǵandar qatary 7 629 275-ke jetti. Bul – 2020 jyldyń 20 qańtarynan (sol kúni eldi birinshi juqtyrý jaǵdaıy tirkelgen) bergi eń joǵarǵy kórsetkish.
Beısenbi kúni atalǵan kórsetkish 362 338 bolǵan. Onyń aldyndaǵy antırekord ótken senbi kúni tirkelgen – 383 659 adamnan vırýs anyqtalǵan.
COVID-19-dan kóz jumǵandar sany 164-ten 11 052-ge deıin ósti. Degenmen ólim úlesi – 0,14%. Jaǵdaıy aýyr naýqastardyń sany 1 244-ke jetti, aldyńǵy kúnge qaraǵanda 48-ge kóp. Omıkron shtamynyń tez taralyp jatqanyna qaramastan, el úkimeti qalypty tirshilikke oralý úshin baryn salyp jatyr.
Jalpy, álemniń kóp elinde qaýipsizdik erejeleri jeńildep, qatań sharalar alynyp tastaldy. Áıtse de, vırýstyń qaıta órshigeni týraly habarlar jan-jaqtan túsip jatyr. Osyǵan deıin vırýstyń taralmaýyn baqylaǵan Qytaı da elde jaǵdaı turaqsyz ekenin aıtty.
Qytaıdyń 9 mıllıon turǵyny bar Chanchýn qalasynda jappaı testileý júrip jatyr. Shahar ótken aptada lokdaýnǵa jabylǵan. Eldi mekende bir kúnde vırýsty juqtyrýdyń 460 deregi rastalsa, kelesi kúni ol san myńnan asyp ketken. Jappaı testileý úshin qalaǵa ózge óńirlerden myńnan asa medısına qyzmetkeri jetkizilip, 7 myń áskerı tartyldy.
Qytaıdyń 13 mıllıonǵa jýyq turǵyny bar Shenchjen qalasy da lokdaýnǵa jabyldy. Qazir shaharda qoǵamdyq kólik qatynamaıdy. Ár otbasynan bir adam ǵana dúkenge barý úshin tysqa shyǵa alady. Munda da qazir jappaı testileý júrip jatyr. Qytaıda sońǵy ýaqytta ahýal órship barady. Naýryzdyń basynan beri 10 myńnan asa vırýs juqtyrý deregi tirkeldi.
