BUU pikirine qaraǵanda, áıelder erlermen birdeı teń quqyq pen múmkindikterge qol jetkizilmegen sosıým eshqashan ornyqty damýǵa qol jetkize almaıdy. Qazir elimizde 1,1 mln azamat áıelder basshylyq etetin shaǵyn jáne orta bıznes sýbektisinde jumys isteıdi. Tutastaı alǵanda, áıelderdiń ekonomıkalyq belsendiliginiń deńgeıi 63,7%-dy quraıdy. Qarjy jáne saqtandyrý qyzmetindegi áıelder úlesi 57 paıyzǵa jetken. Eldegi 22 banktiń 9-yn áıelder basqarady, sonymen qatar 16 bankte olar dırektorlar keńesiniń múshesi bolyp otyr. Al saqtandyrý sektorynda 27 basshynyń 9-y – áıel, taǵy eki áıel naryqtaǵy 9 kompanııanyń ishinde saqtandyrý brokerlik kompanııany basqarýda.
«Bul – oń kórsetkish. Degenmen, odan ári ósý úshin áli de áleýet bar. Genderlik teńdikti qamtamasyz etý – Qazaqstannyń strategııalyq mindetteriniń biri. Táýelsizdik jyldary elimiz genderlik teńsizdikke qarsy is-qımyl boıynsha birqatar túbegeıli sharalar qabyldady. Degenmen bul másele Qazaqstan úshin áli de ózekti. Sondyqtan memlekettiń osy baǵyttaǵy jumysy jalǵasýda. Genderlik teńdikke qol jetkizý jáne barlyq áıeldiń quqyqtary men múmkindikterin keńeıtý bilim berýdi, jumyspen qamtýdy, eńbekaqy tóleýdi jáne qarjylandyrýǵa qoljetimdilikti qosa alǵanda, barlyq baǵyttarda damýǵa tıis», deıdi M.Ábilqasymova.
Qazaqstandaǵy «BUU-Áıelder» qurylymynyń elder boıynsha bólimshesiniń aqparatyna súıensek, elimiz jumys ornynda, bıznes-naryqta jáne qoǵamda genderlik teńdikke jáne áıelderdiń quqyqtary men múmkindikterin keńeıtýge yqpal etetin áıelderdiń quqyqtary men múmkindikterin keńeıtý bóliginde BUU qaǵıdattaryn ilgeriletý boıynsha Ortalyq Azııada kóshbasshy bolyp otyr.
«Zamanaýı úrdister ár uıymnyń ornyqty damýy týraly máseleni birinshi orynǵa qoıatyny anyq. Ornyqty damý qaǵıdattaryn ustaný osy qaǵıdattardy kompanııalardyń qyzmetine dáıekti jáne jan-jaqty engizýdi, bıznes-modelderdi neǵurlym ornyqty etip ózgertýdi bildiredi. Ekologııa, áleýmettik jaýapkershilik jáne korporatıvtik basqarý (ESG) ólshemsharttary boıynsha praktıkalardy engizý neǵurlym ózekti baǵyt bolyp sanalady. Osy tásilderdi engizý genderlik teńdik jáne uıymdardyń damýyna áıelderdiń qatysý deńgeıi máselelerinde ilgerileýge múmkindik beredi», dep atap ótti M.Ábilqasymova.
Qazaqstanda áıelderdiń quqyqtary men múmkindikterin keńeıtýdi, genderlik teńdikti jáne qarjylandyrýǵa qoljetimdilikti qoldaıtyn jobalardy qarjylandyrýǵa baǵyttalǵan oblıgasııalar shyǵarýdyń tabysty mysaldary da bar. Kólemi 38 mlrd teńge bolatyn Azııa damý bankiniń arnaıy jobasy aıasynda 2022 jylǵy aqpanda KASE saýda-sattyq júıesinde 14 mlrd teńge somasyna genderlik oblıgasııalardyń ekinshi shyǵarylymy júzege asyryldy. Budan buryn, ótken jyly ADB osy qural arqyly 8,4 mlrd teńge tartty. Bul qarajat turǵyn úıdi qarjylandyrýda genderlik teńdikti qamtamasyz etýge baǵyttalmaq.
