Kezdesýge qatysýshylar álemde qalyptasyp otyrǵan qazirgideı jaǵdaıda Eýropalyq Odaqtyń, qatysýshy elderdiń jáne EO bıznes-qurylymdarynyń Qazaqstan Respýblıkasymen yntymaqtastyǵyn damytý máselelerin qozǵady.
Eýropalyq Odaqtyń Qazaqstan Respýblıkasyndaǵy elshisi Kestýtıs Iаnkaýskas «ózara qatynastyń barlyq salalarynda biz ınvestısııalardyń ekologııalyq, áleýmettik, ekonomıkalyq jáne qarjylyq turǵydan turaqtylyǵyn qamtamasyz etýge shaqyramyz. Ornyqty ózara baılanys bizdiń yntymaqtastyq baǵdarlamalarymyzdyń negizgi basymdyǵy bolady», dedi óz sózinde.
Fransýz Respýblıkasynyń Qazaqstandaǵy elshisi Dıde Kaness «Qazaqstandaǵy taza jáne tıimdi temirjol sektoryna arnalǵan jasyl sýtegi» taqyrybynda baıandama jasady. Onda Qazaqstan uzyndyǵy 16 000 shaqyrym iri temirjol jelisi bar álemdegi aýmaǵy jaǵynan toǵyzynshy el ekenine toqtaldy.
Dıde Kaness «temirjol arqyly júk tasymalynyń únemi artýy olardyń dekarbonızasııasy úshin qoljetimdi quraldar týraly máseleni týyndatady. Osy turǵydan alǵanda, Prezıdent Q. Toqaevtyń «jasyl sýteginiń ónerkásiptik klasterin» damytý basymdyqqa ıe» degen baǵasy ózekti ekenin» atap kórsetti.
Elshi fransýz jáne eýropalyq kompanııalardyń Qazaqstanmen osy saladaǵy yntymaqtastyqty tereńdetýge daıyn ekenin rastady, sondaı-aq bul Qazaqstanǵa jańa tehnologııalardyń kómegimen «ekologııalyqqa» ótý úshin múmkindikter bere otyryp, temirjol sektorynyń áleýetin tolyq kólemde paıdalanýǵa jáne Jasyl Jibek joly qurylysynda kóshbasshy el bolýǵa jol ashatynyn aıtty.
Sondaı-aq tranzıttik áleýetti damytý jáne Qazaqstan temir joldaryn jańǵyrtý taqyrybyn Qazaqstandaǵy Ispanııa Koroldiginiń elshisi Horhe Ýrbıola da qoldady.
«Qazaqstannyń qazirgi tańda iri óńirlik tranzıttik toraptardyń birine aınalýǵa biregeı múmkindigi bar», dedi ol.
Buǵan qosa, «Qazaqstan-Eýroodaq» dıalog platformasynyń toǵyzynshy otyrysy aıasynda mynadaı sheteldik kompanııalar ókilderiniń: «QTJ» UK» AQ-men yntymaqtastyqty keńeıtý múmkindikteri týraly DB Engineering & Consulting GmbH; Qazaqstandaǵy uıaly baılanystyń perspektıvalary jáne kıbernetıkalyq qaýipsizdik máseleleri boıynsha VEON/KaR-Tel kompanııasynyń baıandamalary tyńdaldy.
Kezdesý sońynda QR Premer-Mınıstri Álıhan Smaıylov 2021 jyldyń qorytyndysy boıynsha Qazaqstan men Eýropalyq Odaq elderi arasyndaǵy ózara saýda kóleminiń $28,9 mlrd deıin artqanyn atap ótti, bul 2020 jylǵy kórsetkishke qaraǵanda 21,4%-ǵa joǵary.
«Biz jańa usynystardy talqylaýǵa jáne qazirgi geosaıası konıýnktýra jaǵdaıynda barynsha jumys isteýge daıynbyz. Biz strategııalyq maqsattarǵa qol jetkizý úshin, ásirese jańa tásilder men kooperasııalardy qajet etetin jańa syn-tegeýrinder kezinde birlesken jumysymyzdy odan ári jalǵastyrýymyz qajet», dep túıindedi Á. Smaıylov.
