Qaırat Kemalov: Kereı hannyń adamı bolmysyn somdaýǵa tyrystym

– Alpysty alqymdaǵan shaǵy­ńyzda kınodaǵy debıýti­ńizdi jasadyńyz. Biraq qatar­daǵy kóp róldiń biri emes, qazaq handyǵynyń negizin qalaǵan Kereıdeı kemeńger hannyń kesek beınesin keskindeý baqyty buıyrdy. Kınematografııadaǵy juldyzdy sátińizdiń bulaısha kesh týýyna ne sebep? 

– Onyń sebebi kóp. Meniń, men qatarlastardyń ómiriniń, shyǵar­ma­shylyq shedevr týdyratyn ja­lyndy shaǵynyń kóp bóligi Keńes ókimeti kezinde ótip ketti. Jas­tyǵymyzdy bergen sol kezeńde dú­nıeniń bárin Máskeý sheshetin. Sol jaqtyń qas-qabaǵyna qarap tirlik keshtik qoı. Bul kınematografııa salasyn da aınalyp ótken joq. Ol kezde qazirgideı qaptap túsirilip jatqan kıno joq. Máskeý «Qazaqfılmge» jylyna bir, ári ketse eki-aq kıno túsirýge ruq­sat beretin. «Qazanshynyń óz erki, qaıdan qulaq shyǵarsa» deı­di. Sol eki fılmdi rejısserler Almatydaǵy akterlermen túsiredi, ról solardan artylmaıtyn da. Al Qaraǵandy, Semeı, Shymkent sııaqty oblys-oblystyń túkpirinde jatqan ártisterdi kim shaqyryp júredi? Eki kıno kimge jetedi? Men ózi tabıǵatymnan, týabitti bolmysymnan shaqyrmasa suranyp, «meni alyńdarshy» dep jalynýǵa joq adammyn. Onyń ústine teatrda da tirshilik, shyǵarmashylyq qaınap jatyr. Basqa dúnıeni oılaýǵa, pendeaýı pıǵyldarǵa berilýge mo­ıyn burǵyza da bermeıtin. Sóıtip júrgende kóp ýaqyt ótip ketti.

Kınoǵa tússek degen asqaq arman jastyǵymyzben birge qol bulǵap qalyp bara jatty. Biraq men oǵan ókpelemeımin. Zaman solaı, taǵdyr bylaı bolǵan shyǵar. Ámbe men ózgeden emes, kináni únemi ózimnen izdeımin. Osy ýaqyt­qa deıin kınoǵa shaqy­ryl­­masam, demek kamera meni súı­meı­­tin, qa­byldamaıtyn bol­ǵany dep túıdim. О́ıtkeni rejıs­ser­ler­ge mán-jaı bizge qaraǵan­da aıqy­ny­raq kórinedi ǵoı. Sondyq­tan kıno salasyndaǵy bul tynysh­tyqty qabyldap, soǵan únsiz kóngen edim. Alaıda Kereı han róli­ne sh­aqyrylǵan sátten bas­tap bar­lyǵy birden ózgerip shyǵa keldi. Sóngen úmit janyp, shyǵar­ma­shy­­lyǵymnyń ekinshi tynysy ashylǵandaı boldy.

– Kereımen qalaı tabys­tyńyz? Rejısser shaqyrdy ma, álde kastıng arqyly arnaıy irikteýden óttińiz be?

– Kınodan birjolata kúderimdi úzgenimdi joǵaryda aıttym ǵoı. Kastıng degenge de tipten qyzyq­paıtyn bolǵanmyn. Sodan bir kúni kólikte kele jatsam, telefonym shyldyrlaıdy. Tutqany kótere bergenim sol edi, arǵy jaqtan ózin kastıng dırektorymyn dep ta­nystyrǵan adam amandyq-saý­lyqtan soń maǵan Almatyǵa ke­lýim­di, túsirileıin dep jatqan aýqym­dy joba – «Qazaq handyǵy» fılminiń kastıngine qatysýym­dy surady. Osyǵan deıin qııýy kelmegen saladan ábden úmitimdi úz­sem kerek, birden bas tarttym. Biraq tutqanyń arǵy jaǵynda daýys ǵalamtordan fotosýretterim men spektakldegi men oınaǵan rólderdiń úzindilerin kórip, rejısser Rústem Ábdirashtyń ózi ar­­naıy shaqyrǵanyn aıtty. «Min­detti túrde kelsin, tekserip kóre­min», depti. Sodan ne kerek, shuǵyl jı­nalyp Almatyǵa jol tarttym. Kelsem, kastıng ótip jatqan ǵımarat adamǵa lyq toly. Men barǵan kúnniń ózinde Kereı róline 15-20 adam tústi-aý deımin. Ár kúni osylaı eken. Tipti sheteldiń akterleri kelip jatyr. Bir-eki kartınasyna tústim. Sosyn Rústem maǵan ári qarap, beri qarap, densaý­ly­ǵymdy surady, túrli suraq qoıdy. Keıin «Habar ózimizden bolady, júre berińiz», dedi. Men: «Mynaý jaı sharýa boldy ǵoı», dep ketip qaldym. Tipti ol týraly umytyp ta ketippin. Arada shamamen bir aıdaı ýaqyt ótkende, Almatydan habarlasyp, tez arada bastan-aıaq kıim ólshemin jiberýimdi sura­dy. Mán-jaı­dan habarsyzbyn. Dereý kastıng dırektoryna telefon shaldym. Sharýa kóp bolyp, ha­bar­­­lasa almaı jatqanyn aıtyp aq­talǵan qaryndas kórkemdik keńes­tiń sheshimimen Kereı róline beki­til­genimdi aıtyp súıinshiledi. Árı­ne, qýanyshymda shek bolǵan joq. Qýandym. Biraq ol qýanysh ári ketse bir saǵatqa sozylǵan shyǵar, odan ári júreksine basta­dym. Basty róldi buryn kıno sala­­syn­da tájirıbesi joq akterge oı­lan­­bastan bere salǵan rejıs­ser Rús­temniń júrekjutqan táýekel­shil­digine tańǵaldym. Men ol kisi­niń ornynda bolsam, mundaı qadam­ǵa bara almas edim. Qalaı degenmen muqym qazaq kútip otyrǵan aýqymdy joba ǵoı, qorqaqtaıtyn edim. Alaıda Rústem maǵan sendi. Sol senimge selkeý túsirmeýge barymdy saldym.

– Kereı hannyń tulǵasyn somdaýda qalaı izdendińiz? Qandaı derekterge súıendińiz?

– Men ózi Qaraǵandy obly­synyń Jańaarqa aýdanyndaǵy Aqtúbek eldi mekeninde týyp-óstim. Bizdiń el ult­tyq qunardy saqtaǵan, qaı­ma­ǵy buzylmaǵan naǵyz qazaqy aýyl edi. Tarıhı oqı­ǵalardy tilge tıek etip, tebi­rene áńgime aı­typ oty­ratyn dala­nyń dana qarııa­la­ry kóp bol­dy. Sonyń áseri bolsa kerek, jas­taıymnan tarıhqa qu­mar bo­lyp óstim. Sebebi bizdiń kezi­miz­­de tele­dıdar turmaq, elektr ja­ry­ǵy bolmady. Oıynymyz da, bı keshi­­miz de, kompıýterimiz de kóne qa­rııa­­lardyń ańyz-áńgimeleri edi. Tún­niń bir ýaqytyna deıin jas­ty­ǵymyzdy jastanyp qoıyp tyń­­daı­tynbyz. Neshe túrli qor­qy­nyshty, qııal-ǵajaıyp áńgime­ler­di tyńdap alyp, bala oıymyz shoshynyp, túnde eriksiz oıatatyn. Sol áńgimeler jadymyzda jat­talǵan. Rólmen jumys iste­ge­nde soǵan biraz súıendim. Aýyl aq­saqal­darynyń sóz saptaýy, olar­dyń keńdigin, tolǵana, kúńire­ne sóı­leıtinderin salýǵa tyrys­tym. Odan keıin, árıne, eń bastysy – Ilııas Esenberlınniń «Kósh­pen­diler» trılogııasyn negizge aldyq. О́ıtkeni tarıh máselesi – daýly taqyryp. Sondyqtan da tasqa basylǵan derekter negizinde beı­ne týdyrýǵa kúsh saldyq. Ál­bette, kórkem kıno bolǵannan ke­ıin kórkemdeý tásilderin de qol­dan­dyq. Bastysy, tarıhymyzdy ba­rynsha tolymdy, tushymdy jáne kórermenderimizge qyzyqty etip berýge shyǵarmashylyq top bolyp ter tóktik. Qolymnan kelgenshe Kereıdiń batyrlyǵyn, tul­­ǵalyǵyn ǵana emes, adam retin­de onyń basyna túsken taý­qy­­metti qalaı sezingenin, ishki qına­lystaryn oınaýǵa tyrystym. Sol arqyly keıipkerimdi halyqqa, kórermenge barynsha jaqyn etkim keldi.

– Ádette akterler jas kezin­de-aq «kınodaǵy alǵashqy sezim­niń», ıaǵnı debıýttiń tolqy­ny­syn bastan keship qoıady. Siz qandaı sezimde boldyńyz? Kıno alańynda qandaı da bir qıyndyq týyndaǵan joq pa?

– Álbette, shyǵarmashylyq bolǵan soń barlyǵy da bolady. Men de kıno alańyna kelip túrli sezimdi, alýan tolqynysty bastan keshtim. Qasyma serigim bolyp fılmde Jánibekti somdaǵan talantty akter Erkebulan Daıyrov­tyń túskeni sondaı jaqsy boldy. Erkebulannyń jas ta bolsa kıno salasyndaǵy tájirıbesi mol, túsirilim jumystarynyń qyr-syryna qanyq. Qaı shıdiń as­tyn­da qandaı kamera jatqanyn jaq­sy biledi. Attyń ústinde kele jatqanda: «Aǵa, alǵa qaraı óte berińiz, anaý jerde kamera bar, siz soǵan oınaısyz. Men bergi jaq­tyń kamerasyn alaıyn» dep aldyn ala eskertip, barly­ǵyn tú­sindirip berdi. Al men qaı shı­diń asynda ne jatqanyn qaı­dan bileıin?! Munyń barlyǵy táji­rı­bemen keletin sheberlik qoı. Sol jetispegendikten de alǵashqy 10-15 kúndeı qınaldym, keıin bar­lyǵyn ıgerip kettim. Bir qyzy­ǵy, «Qazaq handyǵyna» túsip jat­qan ýaqytta taǵy bir rejısser jan­ushy­ryp óziniń avtorlyq kınosyna shaqyrdy. Ol psıhologııalyq janr eken. Qoıshynyń róli. Taý ishinde eshkimge kerek bolmaı qalǵan sho­pan­nyń ómirin baıan etedi. Al myna jaq­ta qazaqtyń birinshi hanyn oınaýym kerek. Sodan al­ǵash­qysyn biti­re salyp, ile ekin­shi fılmniń ju­my­syn bastap ket­tik. Ony aıaq­tap elge kelsem, Qara­ǵan­dyda Qaz daýys­ty Qazybek bıdiń me­reı­toıy­na oraı kórkem ári derek­ti fılm­niń túsirilimi qolǵa aly­nyp­ty. Sóıtip, kıno ala­ńyn­daǵy ys­tyq-sýyǵym basyl­maı turyp, Qazy­bek bı róline tústim. Qazir sah­nada «Sáken» qoıyly­my­men júrmiz.

– Iá, shyǵarmashylyq ómir­baıanyńyzǵa kóz tiksek, repertýar qorjynyńyz Abaı, Aqan seri, Sáken, Qazybek bı syndy kil tulǵalar beınesine toly eken. Bul sizdi akter retinde bir ampýlaǵa, ıaǵnı shtampqa túsirip jiberedi dep qoryqpaısyz ba?

– Durys aıtasyz. Teatrda qyryq jyl úzilissiz qyzmet etip kele jatyrmyn. Ylǵı sol han, bı, batyr beıneleri. Faktýram, túr-turpatym kelgendikten bolar, rejısserler kileń osyndaı rólderge yńǵaılaǵysy kep turady. Al odan bas tartýǵa bizdiń quqyǵymyz joq. Mundaı rólderdi oınaýdyń óz qıynshylyǵy bar. О́zińiz aıtpaqshy, «trafaret­­nyı shtampqa» túsip ketý qaýpi basym. О́ıtkeni aǵza bireý, syrt­qy tulǵa jalǵyz, daýys ta solaı. Oınaýdy jaqsy bilemin, onyń teorııasyn, negizin Asqar Toqpanov, Rábıǵa Qanybaeva bas­taǵan ustazdardan úırendik qoı. Meniń qorqynyshym – sahna men ekranda bir tıpti bolyp ketpesem eken degen alań. Sondyq­tan da shamam kelgenshe tarıhı tulǵalardy oınarda ke­ıip­kerimdi barynsha basqa jaǵy­nan, ózge qyrynan kórsetýge ty­rysamyn. О́tkendegi rólde qol­danǵan minez, shtrıhtardy kele­si jumysym­da paıdalanbaýǵa tyrysamyn. Kez kelgen rólimde tulǵadan buryn, eń áýeli sol tulǵanyń adam retindegi bolmysyn, keskinin ashý­ǵa umtylamyn. Onyń da biz sııaq­ty adam ekenin, biz sekildi onyń da renjıtinin, kúletinin, sezi­mi bar ekenin kórsetýge barymdy salamyn. Sodan keıin ǵana tul­ǵa­lyǵyna ótemin. Biraq qansha aıtqanmen shtamp báribir ózine tartyp turady. Al odan arylý úshin izdenis, tek qana izdenis, bilim jáne sheberlik qajet. Arasynda rejıs­serlerden surap alyp kom­mer­­sııalyq rólderde oınaıtynym bar. Bul – az da bolsyn ózińdi syndyrý, basqa qyryńnan kóriný úshin aýadaı qajet dúnıe. Al qazir múlde kereǵar rólderde oınaǵym keledi. Kem bop qalǵan, shermende kúıge tús­ken, tipti keıde, shyny kerek, kóshedegi úı-kúısiz júrgen jan­dar­dyń (bomj) da álemine enip, sonyń minezin, oıyn saraptaǵym kele­di. Olar da bizdeı adamdar, biraq álemi, ortasy, ómirge degen kóz­qarasy, túsinigi basqa jandar. Solar­dyń psıhologııasyn zerttesem deımin. Mysaly, «Qazaq han­dyǵyn» aıaqtaǵannan keıin meni dalada qalǵan qoıshynyń rólin somdaý­ǵa shaqyrdy. Men oǵan qýana-qýana bardym. Sebebi ekeýi bir-birine qarama-qaıshy beıne boldy. Mundaı tájirıbe akter úshin óte qyzyq.

– Shyǵarmashylyq joly­ńyz­dyń M.Áýezov atyndaǵy ult­tyq akademııalyq qazaq dra­ma teatrynan bastalǵanyn bile­­miz. О́nerdegi tusaýy­ńyzdy kes­ken qasıetti qarasha­ńy­raq­tyń taǵylymy, sizdiń al­daǵy ómirińizge áseri týraly tol­ǵan­ǵanda oıyńyzǵa ne oralady?

– Men negizi ózimdi baqyt­ty­myn dep sanaımyn. Ol ýaqyt­ta teatrǵa baǵyttaıtyn Qur­man­ǵazy atyndaǵy kon­ser­va­torııa­nyń teatr fakýlteti ǵana bolatyn. Sol oqý ordasyna oqý­ǵa qa­byl­danǵannan bastap, ak­te­r­lik jolymda talaı jaqsy adam­dardyń tálimi men shapaǵatyn kóp kórdim. Qaraǵandydaǵy mektep-ınternatta alańsyz oqýyn oqyp júrgen balanyń ómirin mek­tebimizge Almatydan arnaıy kel­gen ustaz Rábıǵa Qanybaevnyń sa­pary bir-aq sátte túbegeıli óz­ger­­­­­tip jibergen edi. Teatr fa­kýl­­­­teti­ne oqýǵa qabyldaıtyn talant­­­ty ta­lap­kerlerdi izdep kel­­gen Rábı­ǵa Muqaıqyzymen joly­­­­ǵýym – taǵdyrdyń maǵan ber­gen úl­ken syıy. Sol ki­­siniń ar­­qa­syn­da Almatyǵa kelip, oqýǵa túsip, qazaqtyń tuń­ǵysh kási­bı re­jısseri Asqar Toq­­p­anov, Qazaq­stannyń halyq ár­tisi Shol­pan Jandarbekova bas­ta­ǵan ula­ǵatty ustazdardyń táli­min al­dym. Oqý bitire salyp, «ákem­teatr­ǵa» jumysqa qabyl­dan­dym. Ol ýa­qytta oqýdy endi bitir­gen akterdiń M.Áýezov teatryna qabyldanýy sırek jaǵ­daı edi. Dıplomdyq ju­my­symyz Ý.Shekspırdiń «Asaý­ǵa tu­saýyn­daǵy» Petrýchıo róli úl­ken teatrǵa jol salyp berdi sóı­tip. Serke Qojamqulov, Sábıra Maı­qanova, Bıken Rımova, Farıda Sháripova, Ydyrys Noǵaıbaev bas­ta­ǵan talanttardyń sahna tu­ǵy­rynda júrgen kezeńi. Mine, sol kisilerdiń ortasyna kelip tús­tim ǵoı. Qorqynyshty ərıne. At­tary­nyń ózinen at úrkedi. So­ǵan qaramastan bul kisiler meni óner­diń uly mektebinen ót­kizip qana qoı­maı, meıirim shýa­ǵyna qosa sho­myl­dyrdy. Ol ýaqyt­tyń adamdary bólek edi. О́mir­degi júris-tury­sy da, jas maman­darǵa degen jana­shyrlyǵy da basqasha edi. Jaı janashyrlyq emes, sen úshin alań­dap, júregi shyn aýyra­tyn. О́zi­niń týǵan bala­syn­daı meıirimin tógetin. Keıin ot­basylyq jaǵdaıyma baılanys­ty týǵan jerim Qaraǵandyǵa ke­lip, S.Seıfýllın teatryna ju­mys­qa ornalas­tym. Bul jerde de Qara­ǵandy teatry­nyń negi­zin qala­ǵan Jámılá Shash­kı­na­lar­dan bastap, Qarǵash Sataev, Ásııa Aby­laevalar da aıa­lap qarsy alyp, bil­genderin úı­ret­ti. О́zim de aq­­sa­qaldyq jasqa ja­qyn­dap qalǵan­nan keıin, oılanyp qa­raımyn ǵoı. Shy­­ny­men de ol za­man­nyń adam­dary bó­lek eken. Búgin de teatrda jana­shyr­lar bar, jastarǵa baryn salyp jan­u­shy­ra kó­mek­tesedi. Bi­raq báribir biz­diń kór­gen meıirim men ma­hab­­baty­myz­dyń jóni bólek. Qalaı desek te qa­zirgi qam­qorlyqtyń formasy basqa...

– Ol qandaı forma eken?

– Osy zamanǵa laıyq formalar. Olar bilgenin úıretedi, bilmegenińdi túsindiredi. Biraq men qamqorlyǵyn kórgen aǵa-apalar­dyń, aqsaqaldardyń tálimi bólek edi. Beınebir týysqanyń sııaqty báıek bolyp, jaqynyńdaı janyńa ornyǵyp alatyn. Al búgingi zamanda qashyqtyq degen bar. Úlken retinde, tájirıbeli akter retinde janashyrlyq qylǵan bolady. Biraq báribir ishteı jattyǵyn baıqatady. Al ana kisiler bolsa sen teatrǵa kel­gen betten birden qoınyńdaǵy bala­sy qylyp menshiktep alady. Nemeresin qushaqtap, ıiskep jatqan ata-ájeler sııaqty erkeletip júrip ónegesin boıyńa darytady. Sondaı bir aıyrmashylyǵy bar. Bir sózben aıt­qanda, ol adamdarda júrek úlken­deý edi. Árıne, bul búgin­gi adamdarda júrek joq degen sóz emes. Biraq ol kisilerdiń júregi basqasha edi.

– Sizdiń akterlik qyzmetińizdi úsh kezeńge bólip qarastyrýǵa bolady. Alǵashqysy – M. Áýezov teatryn­daǵy kezeń, ekinshisi – Aq­mola oblystyq teatry kezeńi jáne Qaraǵandy teatry. О́mirińizdegi osy úsh teatrdyń ornyn aıtyp bere alasyz ba?

– M.Áýezov teatryna alǵash bala bolyp kelgen kezdegi atmo­sfe­ranyń qandaı bolǵanyn aıttym. Alaıda ol jaqta kóp bolmaı, bir jyldan soń Qaraǵandyǵa keldim. Ol da alǵashqynyń jalǵasy sııaqty boldy. Munda da teatr aqsaqaldary men analarynyń qolyna tústim, tárbıesin kórdim. Jańa beıneler kórermenimen qaýyshyp jatty. S.Seıfýllın atyndaǵy Qaraǵandy oblystyq drama teatry meniń ekinshi otbasym dese de bolǵandaı. Sóıtip júrgende jańa zaman kep qaldy. Astanamyz Almatydan Aqmolaǵa kóshetin boldy. Aqmola barlyǵyna belgili kishkentaı ǵana oblys ortalyǵy edi. Ol kezde Aqmolada qazaq teatry bolmaǵan eken. Qaraǵandy teatrynda jumys istegen qazaqtyń myqty azamaty, úlken sýretker, rejısser Jaqyp Omarovty sol kezdegi shahar basshylyǵy arnaıy aldyrtyp, taqyr jerden teatr ashqyzady. Jaqyp aǵamyz jer-jerden myqty degen akterlerdi jınap, jańa teatrdyń trýppasyn jasaqtaıdy. Sol shaqyrylǵan toptyń ishinde biz de boldyq. Teatr shymyldyǵy eń alǵash 1991 jyldyń 15 qara­sha­synda Ǵ.Músirepovtiń «Aqan seri – Aqtoqty» qoıylymymen túrilip, spektaklde Aqan beınesin somdadym. Teatr ashylǵan kúnnen-aq jaqsy nátıje kórsetti. Onyń bári qoıylymnyń basy-qasynda júrgen Jaqyp Omarovtyń bilik­ti, joǵary deńgeıdegi uıymdasty­rý­shylyǵynyń arqasynda bolatyn. Keıin Qadyr Jetpisbaev, Ázirbaıjan Mámbetovter qyzmetke keldi. Teatr múldem basqa deńgeıge kóterildi. Sondyqtan aıtylyp jat­qan úsh mekteptiń aldyńǵy eki mektebi bir-birine uqsastaý bolyp kelse, Q.Qýanyshbaev teatrynyń jóni bólek. Jańa teatr. Árkim jas teatrǵa óz tarapynan septigin tıgizýi qajet edi. Sol jolda úz­dik­siz izdendik. 5-6 jyldaı osynda qyzmet ettim de, teatr aıaǵynan tik turyp, ujym ornyqqan soń elge qaıtýǵa sheshim qabyldadym. Qalaı desek te, qansha jerden jaǵdaıyńdy jasap tursa da týǵan jer adam úshin báribir ystyq qoı. Meniń jaǵdaıymda tipti erekshe. Qaraǵandyǵa kindigim baılanǵan dese de bolady. Sóıtip, Sáken tea­t­ry­na qaıtyp oraldym. Bul meken men úshin eń ystyq orta. Bıyl qarashańyraq teatrymyzdyń 90 jyldyq mereıtoıy. Osy jyldar ishinde teatrymyz gúldenip, ósip-órkendep jaqsy nátıjelerge qol jetkizdi. Saıdyń tasyndaı myqty akterlik býyn qalyptasty.

– Kezinde ulylardyń táli­min kórip, batasyn alǵan siz de búginde aqsaqal jasyna jaqyn­dap qaldyńyz. Teatrdaǵy qazirgi jas­tardyń talabyn qalaı baǵa­laısyz? Jalpy, búgingi Qara­ǵandy teatrynyń hali qandaı?

– Irgeli qarashańyraq bol­ǵan­­nan keıin de teatrymyz únemi iz­denis ústinde. Jaqsy qoıy­lym­dar jaryqqa shyǵyp jatyr. Ujymymyz da uıymshyl. Tek bir áttegen-aıy, oblystyq teatr­lardaǵy maman máselesi áli qıyn kúıinde qalyp keledi. Bul bizde ǵana emes, barlyq ob­lys­tyq teatrǵa tán másele dep oı­­laımyn. Almaty men elorda­daǵy joǵary oqý ornyn bitirgen jastar teatrymyzǵa kelýge qulyqsyz. Úlken qalada qalyp, shyǵarmashylyq mansap jasaǵysy keledi. Olardy da tú­siný­ge bolady. О́ıtkeni oblysqa keletin jas mamandardy yntalandyrý jaǵy kemshin túsip jatqany belgili. Úısiz-kúısiz páterden páterge kóship júrgen aılyǵy shaılyǵyna jetpeıtin jastarda osydan keıin qandaı qulshynys bolsyn? Oblystyq teatrlarǵa jastardyń turaqtamaıtynynyń negizgi sebebi osy. Qalaı desek te sanany turmys bıleıtini ras qoı. О́ıtkeni bárimiz de pendemiz. Olar­ǵa da kiná artýǵa bolmaıdy. Son­dyqtan da basshylyq, bılik tarapy­nan osy jaǵyna kóńil bólinse deımiz. Biz de jastar kelmedi dep qol qýsyryp qarap otyrmaı, qoly­myzdan kel­genshe shákirt tár­bıe­lep, ujym­ǵa ornyqtyryp jatyr­myz. Tát­timbet atyndaǵy óner kol­ledjin­de «Drama» bóli­min ash­qanbyz. Sol bólimniń meńgerý­shisimin. Jergilikti talantty balalardy akterlikke sol jerde daıar­lap shyǵaramyz. Ázirge tapqan she­shi­mimiz osy. Jalpy, eldegi jas­tar­dyń ónerge degen qyzyǵý­shylyǵy, umtylysy qýantady.

 – Áńgimeńizge rahmet.

Áńgimelesken

Nazerke JUMABAI,

«Egemen Qazaqstan»