Aımaqtar • 22 Naýryz, 2022

Petropavldaǵy apat: Úıindilerdiń astynda jumysshy áıeldiń denesi tabyldy

138 ret kórsetildi

Petropavlda jylý-elektr ortalyǵyndaǵy apat kezinde habar-osharsyz ketken mashınıst-qaraýshy áıeldiń denesi úıindilerdiń astynda tabyldy, dep habarlaıdy Egemen.kz.

SQO densaýlyq saqtaý basqarmasynyń baspasóz qyzmeti jylý-elektr ortalyǵynda tútin murjasy opyrylyp túsken kezde úıindi astynda qalǵan mashınıst-qaraýshynyń denesi tabylǵanyn málimdedi.

SQO tótenshe jaǵdaılar departamentiniń málimetinshe, kezekshi aýysym qyzmetkerleriniń bar-joǵyn anyqtaý kezinde qazandyq sehynyń jabdyqtaryn qaraýshy mashınıst, 1984 jyly týǵan áıeldiń habar-osharsyz ketkeni anyqtaldy. SQO TJD qyzmetkerleri oqıǵa ornynda dereý izdestirý-qutqarý jumystaryn bastady. Keıin olarǵa Nur-Sultan qalasynyń jedel-qutqarý jasaǵynyń qutqarýshylary da qosyldy.

Izdeý jumystary 2 táýlikten astam ýaqyt júrgizildi. Bul jumysqa kınologııalyq qyzmet te tartyldy. Aýyr ınjenerlik tehnıkany paıdalaný múmkindigi bolmaǵandyqtan qutqarýshylar úıindilerdi qolmen shans jáne gıdravlıkalyq quraldardy paıdalana otyryp qopardy.

22 naýryz kúni saǵat 10:32-de qurylys konstrýksııalarynyń úıindileriniń astynan áıeldiń denesi tabyldy. Saǵat 12:05-te múrde úıindilerdiń astynan shyǵarylyp, sot-medısınalyq saraptama júrgizý úshin tıisti mekemege jetkizildi. 

Qazirgi ýaqytta SQO TJD psıhologııalyq qyzmet toby marqumnyń týystarymen jumys istep jatyr.

Mert bolǵan jumysshynyń aty-jóni - Natalıa Olegovna Chefonova.

«SevKazEnergo» AQ basshylyǵy men ujymy Petropavl «2-Jylý-elektr ortalyǵy» JShS-de mert bolǵan Natalıa Chefonovanyń otbasyna jáne týystaryna qaıǵyryp kóńil aıtty.

«SevKazEnergo» AQ baspasóz qyzmetiniń málimetinshe, kompanııa basshylyǵy N.Chefonovanyń otbasyna turǵyn úı jaǵdaıyn jaqsartýǵa, qaıtys bolǵan jumysshynyń bes jyldyq eńbekaqysy mólsherinde otbasyna qarjylyq ótemaqy tóleý túrinde qoldaý kórsetip, mert bolǵan áıeldiń balasyna bilim alý aqysyn  tóleý túrinde kómek kórsetedi. Jerleýdi uıymdastyrýǵa baılanysty barlyq shyǵyndardy jumys berýshi óz moınyna almaq.

Apattyń sebebi memlekettik komıssııanyń qorytyndysynan keıin belgili bolady.

Eske sala ketsek, 20 naýryz kúni saǵat 19:20-da Petropavldaǵy jylý-eleýtr ortalyǵynyń bir murjasy qulady. Ortalyqtaǵy apatqa baılanysta qylmystyq is qozǵaldy. JEO-daǵy tútin murjasynyń jartylaı qulaýyna baılanysty oblys ákimi jedel shtab qurdy.

Osy oqıǵa boıynsha Prezıdent oblys ortalyǵy men basqa da eldi mekenderdiń turǵyndaryn tez arada jylýmen qamtamasyz etýdi tapsyrdy.

Al 21 naýryz kúni apat bolǵan jylý ortalyǵynyń dırektory men bas ınjener ýaqytsha ustaý ızolıatoryna qamaldy.

Sońǵy jańalyqtar

Tarazda Qonaev eskertkishi boı kóterdi

Aımaqtar • Búgin, 12:50

Qazaqstanda qansha adam vaksına aldy

Koronavırýs • Búgin, 10:42

Elimizde 1452 adamnan koronavırýs anyqtaldy

Koronavırýs • Búgin, 09:05

Uqsas jańalyqtar