«Ǵylym men bilimdegi tulǵalar: dástúr jáne sabaqtastyq» atty konferensııada sóz alǵan el Prezıdentiniń keńesshisi, UǴA akademıgi Baýyrjan Omarov óz salasynda bıikke kóterilgen tuǵyrly tulǵalardy ardaqtaý arqyly dástúrimizdi damytatynymyzdy aıtty.
«Mundaı halyqaralyq deńgeıde konferensııa uıymdastyrý – ótkenimizdi umytpaýdyń, búginimizdi ulyqtaýdyń belgisi. Serik Qırabaev pen Álııa Beısenova – birinshiden, ǵylymdaǵy irgeli izdenis pen eńbektiń sımvoly. Ekinshiden, olar – tańdaǵan taqyrybyn jiti zerttep, shyrqaý shyńdardy baǵyndyrǵan tulǵalar. Úshinshiden, elge belgili egiz adam, ıaǵnı ádebıettaný men geografııa ǵylymdarynyń kóshbasshylaryna aınalǵan jandar. Tórtinshiden, sońyna ertken ónegeli shákirtteri bar, ǵylymı mektebi qalyptasqan ulaǵatty ustazdar. Besinshiden, tanymy joǵary zııalylar, ult múddesin ulyqtaýshylar. Altynshydan, elge súıkimi bolǵan syıly qarııa mártebesin ıelengen ardaqtylar. Jetinshiden, eki jaqsynyń bir-birin taýyp qosylǵanynyń úlgisin kórsetken kisiler. Sondyqtan konferensııanyń kóteretin júgi salmaqty dep senimmen aıta alamyn», dedi B.Omarov.
M.Áýezov atyndaǵy Ádebıet jáne óner ınstıtýtynyń dırektory, UǴA korrespondent-múshesi Kenjehan Matyjanov óz kezeginde akademıkterdiń mereıtoılaryna arnalǵan is-sharalardyń Almaty shaharynan bastaý alyp, áli de jalǵasyp jatqanyn jetkizdi. Sondaı-aq ol S.Qırabaevtyń ózine ustaz bolǵanyn, dáristi jatqa aıtatynyn, qazaq poezııasyndaǵy sonaý Buqar jyraýdan bastap Qasym Amanjolovqa deıingi óleńderdiń bárinen múdirmeı mysal keltirip otyratynyn tebirenispen eske aldy.
Konferensııada otandyq jáne sheteldik ǵalymdar S.Qırabaev pen Á.Beısenovanyń ǵylym jolyna qatysty baıandamalar jasady. Jáne jıyn sońynda konferensııaǵa qatysýshylar A.Baıtursynuly atyndaǵy №48 mektep-lıseıine baryp, «Akademık Á.Beısenova synybynyń» ashylý saltanatyna qatysty.
