Kollajdardy jasaǵan Záýresh Smaǵul, «EQ»
Bul rette enpf-otbasy.kz platformasy 732 myńnan astam qazaqstandyqqa turǵyn úı jaǵdaıyn jaqsartýǵa jáne emdelýge qajetti resýrstardy alýǵa múmkindik berdi. Ortasha eseppen alǵanda 2021 jyly platformaǵa aı saıyn 100 myńǵa deıin ótinim kelip tússe, osy jyldyń 1-30 naýryz aralyǵynda enpf-otbasy.kz-ke klıentterden túsken ótinimder sany 2022 jyldyń eń joǵarǵy deńgeıine jetti. Bul degenimiz – 870 myń.
Otbasy banktiń dereginshe, aıaqtalǵan ótinimder, ıaǵnı maquldanǵan ótinimder 352 myńdy quraǵan. Atalǵan sanat boıynsha qarajat nysanaly maqsatyna jiberildi degen sóz. Klıent qarajatynyń jetkiliksiz bolýyna baılanysty keri qaıtarylǵan ótinishter sany – 146 myń.
106 myń ótinim boıynsha klıent nysanaly maqsatyn rastaıtyn qujattardy bekitýi kerek. Salynǵan qujattardy tekserýge berilgen ótinim – 73 myń. 52 myń ótinimdi klıentterdiń ózi joıǵan. Klıentter qol qoımaǵan, aıaqtalmaǵan ótinimder sany 35 myńǵa teń.
34 myń ótinim pysyqtaýǵa jiberilgen. 33 myń ótinim boıynsha BJZQ-dan arnaıy shotqa qarajattyń túsýi kútilip otyr. Tolyqtyrý úshin Otbasy bankiniń salymyn tańdaýdy qajet etetin ótinimder sany – 20 myń. BJZQ-na qaıtarylǵan qarajat boıynsha ótinimder 19 myńdy qurady.
Kelip túsken ótinimder, sondaı-aq maqsatty rastaıtyn qujattar salynǵan ótinimder kezek tártibimen pysyqtalady.
Sonymen qatar qazir el ishinde 2022 jylǵy 1 sáýirde qazaqstandyqtardyń Otbasy banktegi arnaıy shottaryndaǵy birrettik zeınetaqy tólemi BJZQ-ǵa qaıtarylady degen qaýeset taraýda. Otbasy banktiń habarlaýynsha, azamattardyń arnaıy shottaryndaǵy qarajat olardyń menshigi. Arnaıy shotqa aqsha túsken sátten bastap qazaqstandyqtardyń turǵyn úı jaǵdaılaryn jaqsartý maqsatynda olardy paıdalaný boıynsha rastaıtyn qujattardy usyný úshin 20 jumys kúni bar. Osylaısha, naýryzdyń aıaǵynda arnaıy shotqa túsken aqshany 2022 jyldyń 30 sáýirine deıin qoldanýǵa bolady. Eger qarajat emdelý maqsatynda suralyp, arnaıy shotqa túsken bolsa, onda azamattardyń olardy paıdalaný maqsatyn rastaý úshin 45 jumys kúni bar.
Sondyqtan arnaıy shotqa óz qarajatyn túsirip qoıǵan ótinish berýshiler banktiń aımaqtyq fılıaldaryna barmaı-aq qujattardy asyqpaı jınaýy kerek. О́ıtkeni barlyq rásim onlaın rejimde ótedi.
Sondaı-aq áleýmettik jelilerde «sońǵy úsh kúnde zeınetaqy jınaqtarynyń artylǵan somasy joǵalyp ketti» degen málimdemeler taralyp jatyr. Banktiń habarlaýynsha, buǵan valıýta baǵamy sebep. Mysaly, 2022 jylǵy 25-28 naýryz aralyǵynda berilgen 53 649 ótinimdi, suralǵan qarajattyń jetkiliksizdigine baılanysty BJZQ keri qaıtardy. Buǵan valıýta baǵamynyń ózgerýi jáne osyǵan baılanysty zeınetaqy jınaqtaryn qaıta baǵalaý áser etken. 2022 jylǵy 25 naýryzda zeınetaqy aktıvterin qaıta baǵalaýǵa yqpal etken dollardyń baǵamy 494,16 teńgeni, al 2022 jylǵy 28 naýryzda 484,49 teńgeni qurady.
«О́ziniń birrettik zeınetaqy tólemin burynǵy shekti kórsetkish boıynsha paıdalaný úshin bank enpf-otbasy.kz portalynda ótinim berýdi 2022 jyldyń 29 naýryzyna deıin úlgerýdi usyndy. Sebebi turǵyn úı jaǵdaılaryn jaqsartýǵa jáne otbasyn emdeýge arnalǵan birrettik zeınetaqy tólemin paıdalaný qaǵıdalaryna sáıkes bank 2 jumys kúni ishinde ótinimdi óńdep, BJZQ-ǵa jiberedi. BJZQ qoldanystaǵy shekti kórsetkish boıynsha ótinimderdi 2022 jyldyń 31 naýryzyn qosa alǵanda saǵat 23:59-ǵa deıin qabyldap, qarastyrady», delingen Otbasy bankiniń habarlamasynda.
– О́tinimderdiń kópshiligi qaıtalanady. Birneshe ret ótinish bergen rekordshylar bar. Biraq dál osy naýryz aıynda biz qalypty jaǵdaıǵa jatpaıtyn prosesterdi baıqadyq: mysaly, 5 teńge alýǵa ótinim bergender bar. 40 teńgeden 2000 teńgege deıingi somany alýǵa 161 ótinim joldandy. Adamnyń kompıýterlik saýattylyǵynyń ortasha deńgeıinde portalda bolý ýaqyty 15-20 mınýtty alatynyn eskersek, mundaı operasııalardyń qarjylyq máni túsiniksiz. Sondaı-aq aqylǵa qonymsyz suranystary bar ótinimder túse bastady. Mysaly, portalda 200 mln teńgeden 6 mlrd teńgege deıin 627 ótinim kelip tústi. Birjolǵy zeınetaqy tólemderiniń mundaı somasy buryn-sońdy bolmaǵany túsinikti. Mamyr aıynyń basynda zeınetaqy jınaqtaryn paıdalaný jáne osy biregeı jobanyń erekshelikteri týraly halyqqa tolyq esep jarııalaýdy josparlap otyrmyz, – deıdi Otbasy bankiniń basqarma tóraǵasy Lázzat Ibragımova.
