Osyǵan deıin Reseı sarbazdary Ýkraınanyń soltústik bóliginen jappaı ketip jatqanyn málimdegen bolatynbyz. Oqıǵa ornynda júrgen sheteldik BAQ qalalar men eldi mekenderdiń qazirgi ahýalyn kórsetip, jergilikti halyqpen tildesip, qıyn jaǵdaıyn jetkizip jatyr. Bul oqıǵadan keıin Batys elderi Reseıge taǵy sanksııa salýdy oılastyryp jatyr. Fransııa prezıdenti Emmanýel Makron Reseıdiń kómir men munaı eksportyna qarsy sanksııa salýǵa shaqyrdy. Ol fransýz BAQ-taryna «áskerı qylmystyń aıqyn belgileri bar» dep málimdegen. Germanııanyń qorǵanys mınıstri Krıstın Lambreht osyǵan deıin qulyqsyz bolyp kelgen Eýropalyq odaq endi Reseı gazyn ımporttaýǵa tyıym salý týraly máseleni talqylaýy kerek dedi. Batys basshylary osy sekildi málimdemeler jasap, jańa sanksııalar salynýy múmkin ekenin eskertip jatyr.
Al Kreml halyqaralyq basshylardan Býchadaǵy jaǵdaı týraly jalǵan aıyptaýlarǵa asyqpaýdy jáne ártúrli derekkózderden málimet suraýdy talap etti. Reseı bul aıyptaýlardy úzildi-kesildi qabyldamaıtynyn jetkizdi.
«Jaǵdaı, árıne, óte mańyzdy. Sondyqtan biz halyqaralyq kóshbasshylardyń málimdemeler jasaýǵa, jalǵan aıyptaýlarǵa asyqpaýyn jáne aqparatty ártúrli derekkózderden suraýyn, kem degende, bizdiń dálelimizdi tyńdaýyn talap etemiz», dedi Reseı prezıdentiniń baspasóz hatshysy Dmıtrıı Peskov. Onyń aıtýynsha, mundaı mańyzdy másele joǵary deńgeıde talqylanýy kerek.
«Biz kez kelgen aıyptaýdy úzildi-kesildi qabyldamaımyz. Onyń ústine bul taqyryp barynsha joǵary deńgeıde talqylanýy tıis dep esepteımiz. Sondyqtan Máskeý Qaýipsizdik keńesinde osy taqyrypty qarastyrý bastamasyn kóterdi. Alaıda bastama qoldaý tappaǵanyn bilemiz. Bizdiń dıplomattar bul máseleni Qaýipsizdik keńesiniń kún tártibine shyǵarý úshin belsendi jumys isteýdi jalǵastyrady. Taqyryp óte mańyzdy», dedi D.Peskov.
Reseıdiń qorǵanys mınıstrligi de Kıev rejiminiń Býcha eldi mekenindegi beıbit turǵyndardy óltirdi degen aıyptaryn joqqa shyǵaryp, Reseıdiń Qarýly kúshteri Býchýdan 30 naýryzda tolyǵymen ketti dep málimdegen.
BUU Bas hatshysy Antonıý Gýterrısh Býchadaǵy oqıǵalarǵa táýelsiz tergeý júrgizip, kinálilerdi jaýapqa tartý keregin aıtty.
BUU Adam quqyqtary jónindegi basqarmasy Ýkraınada soǵys bastalǵannan beri 3455 beıbit turǵyn zardap shekkenin habarlady. Onyń ishinde 1400-den astam adam qaza bolyp, 2000-nan astamy jaraqat alǵan. BUU naqty sandar áldeqaıda kóp bolýy múmkin deıdi.
Reseı eldiń soltústiginen áskerin shyǵarǵanymen, dúısenbi kúni tańerteń Odessa men Hersondy nysanaǵa alyp, ońtústik Ýkraınaǵa shabýyldaryn qaıta bastaǵanǵa uqsaıdy. Marıýpolde de shabýyl jalǵasqan.
Ýkraınanyń vıse-premer-mınıstri Irına Vereshýk Marıýpol portyndaǵy jáne jaqyn Lýgansk oblysyndaǵy qaqtyǵys aımaqtarynan 2964 adamnyń evakýasııalanǵanyn habarlady. Qyzyl Krest uıymy juma kúni gýmanıtarlyq kómekti jetkizý úshin Marıýpolge kirýge birneshe ret áreket jasaǵan. I.Vereshýk Qyzyl Krest avtobýstaryn qalaǵa kirgizý úshin Reseımen kelissóz jalǵasyp jatqanyn aıtty. Beısenbide ol sońǵy aptalarda Marıýpolden shamamen 75 myń adam evakýasııalanǵanyn habarlaǵan-dy.
AQSh BUU Bas Assambleıasynan Reseıdi Adam quqyqtary jónindegi keńesten shettetýdi surady. Bul týraly AQSh-tyń BUU-daǵy elshisi Lında Tomas-Grınfıld málimdedi. Nıý-Iorktegi 193 músheden turatyn Assambleıanyń úshten ekisi daýys bergen jaǵdaıda adam quqyqtaryn buzǵan memlekettiń músheligin toqtata alady.
Ýkraına prezıdenti Volodımır Zelenskıı Gremmı syılyǵynda beıneúndeý jasap, «únsizdikti mýzykamen toltyrýǵa» jáne kórermenderdi áleýmettik jeliler jáne teledıdarda «soǵys týraly shyndyqty aıtýǵa» shaqyrdy.
Bul oqıǵalardan keıin eki el arasyndaǵy kelissóz qalaı órbıtini belgisiz. Ázirge kelesi kezdesý týraly aqparat joq.
