Zańsyz taksı qyzmetin kórsetkenderdi ákimshilik jazaǵa tartý zań jobasy ótken jyldyń tamyz aıynda usynylǵan edi. Alaıda, keıin tolyqtyrýǵa jiberildi. Endi jańa nusqasy «Ashyq úkimet» portalynda jarııalandy. Bul jolǵy usynysta ákimshilik jaza qatańdatylǵan.
«Bul zań jobasy zańsyz jolaýshy tasymalymen aınalysqan adam anyqtalǵan jaǵdaıda onyń kóligin tárkilep, aıyp turaǵyna qoıý úshin daıyndalǵan.Iаǵnı quqyq qorǵaý organdary zańsyz taksı qyzmeti máselesin sheshkenshe kólik aıyp turaǵynda turady», dedi Ádilet mınıstrligi zańnama departamenti ákimshilik zańnama basqarmasynyń basshysy Saltanat Serikbaeva.
Jańa zań jobasynda zańsyz jolaýshy tasymalymen aınalysqan jeke tulǵaǵa 15 aılyq eseptik kórsetkish, sheneýnikterge 25, al zańdy tulǵalarǵa 25-ten 150 aılyq eseptik kórsetkish kóleminde aıyppul qarastyrylǵan.
