Bul jınaqta Batys saıahatshylarynyń qazaq jerin zertteý tarıhy baıandalǵan. Eýropa men Azııanyń túıisken tusynda ornalasqan qazirgi Qazaqstannyń aýmaǵy árdaıym zertteýshilerdiń, kópester men saıahatshylardyń nazaryn aýdarǵanyn bilemiz. Kóshpendilerdiń salqar dalasy men shóli boıymen ótken Jibek jolyn soltústikke baǵyttaýǵa tyrysqan alǵashqy brıtandyq saýdagerler Entonı Djenkınson men Djonas Henýeı edi.
N.Fıldıń kitabynda olardyń qyzyqty oqıǵalaryn baıandap, Adel Ommer de Gell, Lıýsı Atkınson jáne Marı de Ýıfalvı-Býrdon sııaqty qazaq jerin zerttegen kórnekti saıahatshy áıelder týraly da oı tolǵaıdy. Avtor jınaq mazmunyna toqtala kele: «Uly dala saıahatshylary» kitaby, bálkim, sońǵy myń jyl ishinde Uly Dala eline saıahat jasaǵan tulǵalar týraly aǵylshyn tilindegi tuńǵysh tarıhı shyǵarma bolar. Týyndy uly Shyńǵys han men onyń uldaryna jiberilgen emıssarlardan bastalady. Kóshpeli qoǵamda resmı saqtalǵan jazba derekter az boldy dep oılaımyn, sondyqtan sheteldik saıahatshylardyń jazbalary asa mańyzdy. Jazbalardyń arqasynda Qazaqstannyń tarıhy jaıly tyń derekterge qol jetkizýimiz múmkin», deıdi.
Tusaýkeser barysynda N.Fıldıń saıahat jasaý kezinde zertteýshilerdiń eń qyzyqty áńgimelerin baıandap, erekshe fotosýretterin kórsetti. Aıta keteıik, kitaptyń aǵylshyn tilindegi nusqasy Qazaqstannyń Ulybrıtanııadaǵy Elshiliginiń qoldaýymen jaryq kórip, 2020 jyly Londondaǵy Koroldik geografııalyq qoǵamda tanystyrylǵan bolatyn. Al Almaty oblysynyń ákimdigi Qazaqstannyń Ulybrıtanııadaǵy Elshiliginiń bastamasymen qazaq-orys tilderindegi jańa basylymdardy byltyr aýdaryp, jarııalady.
Qazaqstannyń Ulybrıtanııadaǵy Elshisi Erlan Ydyrysov jınaqtyń Qazaqstan men Ulybrıtanııa arasyndaǵy dıplomatııalyq qarym-qatynastardyń ornaǵanyna 30 jyl tolýyna oraı tanystyrylǵanyn atap ótti.
Tusaýkeserge Syrtqy ister mınıstriniń orynbasary Roman Vasılenko, QazaqGeography basqarma tóraǵasy Orman Nurbaev, Ulybrıtanııanyń Qazaqstandaǵy Elshisi Ketı Lıch, sheteldik dıplomatııalyq korpýstyń ókilderi, qazaqstandyq tarıhshy-ǵalymdar, etnograftar men ólketanýshylar qatysty.
N.Fıldıńniń kitaby Qazaqstan men Ulybrıtanııa arasyndaǵy dıplomatııalyq qarym-qatynastyń 30 jyl buryn emes, birneshe júz jyl buryn ornaǵanyn dáleldeıdi. Jalpy, saıahatshy buǵan deıin «Uly dalanyń ońtústigine qaraı: Tomas pen Lıýsı Atkınsonnyń 1847-52 jyldary Shyǵys Qazaqstan boıynsha saıahattary» atty tuńǵysh kitabyn jaryqqa shyǵardy. Ol XIX ǵasyrdyń ortasynda Qazaqstan aýmaǵy boıynsha saıahattaǵan Tomas pen Lıýsı Atkınsonnyń Vıktorııa dáýirindegi zertteýshilerge arnalǵan. Nık Fıldıń sondaı-aq Siberian Steppes blogyn júrgizedi, ári Jońǵar Alataýynyń shalǵaı taýlaryna atpen ekspedısııalar jasap júr. Eske salsaq, 2016 jyldyń jazynda ol Tomas pen Lıýsı Atkınsonnyń on urpaǵyn Shyǵys Qazaqstanǵa ata-babalary alǵash ret 160 jyl buryn barǵan jerlermen tanystyrý úshin ertip kelgen edi.
