Sıfrly bilim berý deńgeıin arttyrý qajet

«Tekserilgen shynaıy aqparatty paıdalaný negizinde vırtýaldy bilim berý deńgeıin arttyrý» taqyrybynda ótken jıynda sarapshylar dúnıejúzilik aqparat álemindegi jańalyqtardy ortaǵa salyp, zertteýlerimen bólisti. Bıyl besinshi ret ótken ǵylymı jıynǵa Nı­der­landy, Slovakııa, Túrkııa, Reseı, Qazaqstan, Qyr­ǵyz­stan, О́zbekstan ǵa­lym­dary vırtýaldy oqytý men sıfrly bilim berýdiń shekaralary men formattaryna den qoıdy.

Is-sharanyń ashylýynda BUU jahandyq kommýnıkasııalar departamentiniń ókili Vlastımıl Samek BUU «Ǵalamshar ıgi­li­­gi úshin ­jumy­lyńyz, teńsizdikpen jáne jalǵan aq­paratpen kúresińiz» kom­­­mýnıkasııa bo­ıynsha baıandamasynda ǵylymı qaýym ókilderiniń nazaryn jýr­­nalıstıka salasynda aqparattyq ortadaǵy senim men senimsizdik, faktchekıng jáne tekserý ádisterine aýdardy. Sondaı-aq Syrtqy ister mınıstrliginiń Almaty qalasyndaǵy ókildiginiń saıası yntymaqtastyq basqarmasynyń basshysy Almasha Arenova eldegi memlekettik qyzmet salasynda áleýmettik jelilerdiń basymdyqtaryn atap ótti. Álemdegi, el­degi aqparattyq ahýaldyń kóńilge alań týdyrǵan kezeńinde ár azamatqa du­rys aqparatty jetkizetin BAQ arnalary men ókilderi ekenin erekshe atap ótken Senat tóraǵasynyń buqaralyq aqparat quraldarymen baılanys jónin­de­gi keńesshisi Bıbigúl Jeksenbaı medıa keńistiktegi aqparattyq qaýipsizdik máselesine toqtaldy.

Eýropalyq jýrnalıster daıarlaıtyn assosıasııanyń keńesshisi (EJTA), Jýrnalıstıka salasyndaǵy bilim berý boıynsha dúnıejúzilik keńes tóraǵasynyń orynbasary, Vındeshaım qoldanbaly ǵylymdar ýnıversıtetiniń professory Nıko Drok sarapshylar nazaryn dezınformasııa kezeńinde jýrnalıstik bilim berýdi baǵdarlaý máselesine aýdaryp, «Oqytýshy retindegi paryzymyz – stýdentterdi oqytý ǵana emes, faktilerdi tekserýdiń tehnıkalyq quraldary, sonymen qatar tarıhı, saıası, mádenı jáne áleýmettik-faktilerdi maǵynaly jáne teńgerimdi kontekstke qoıý úshin ekonomıkalyq bilim berý», dep atap ótti. 2020 jyldan beri QazUÝ-diń jýrnalıs­tıka fakýlteti EJTA múshesi retinde ke­­ńester, konvensııalarǵa qatysýǵa múm­kin­dik alǵan.

Jıynda Slovakııa Ǵylym akade­mııa­sy­nyń boljaý ınstıtýty professory V.Bachıshın, TRT «Túrkııa úni» radıosy qazaq redaksııasynyń redaktor-júrgizýshisi Ýfýk Týzman, M.Ulyqbek atyndaǵy О́zbekstan UÝ professory Iа.Mamatova, Sankt-Peterbýrg MÝ professorlary D.Gavra, I.Bykov, RÝDN ýnıversıteti jýrnalıstıka teo­rııasy men tarıhy kafedrasynyń do­senti V.Matvıenko, Medıa damytý kor­po­ra­tıv­tik qory Medıa jobalar bóliminiń je­tek­shisi B.Qulaman, Elorda-Aqparat medıaholdıngi dı­rek­torynyń orynbasary Q.Áýesbaı, J.Balasaǵun atyndaǵy Qyrǵyz UÝ jýrnalıstıka fakýltetiniń dekany Sh.Kostıýk, t.b. ǵalymdar baıandama jasady. Sankt-Peterbýrg MÝ professory Dmıtrıı Gavranyń medıakommýnıkasııa salasyndaǵy trendterdi taldaǵan baıandamasy ǵylymı jańalyǵy, tezıstik tujyrymdary qatysýshylar nazaryn aýdar­dy. Osyǵan oraı 2020-2022 jyldary kommýnıkasııa salasynyń úrdisteri men draıverleri, kommýnıkasııa mamandaryna kásibı bilim berý júıesindegi qaterler baıandamasy qazaq, aǵylshyn tilderine aýda­ry­latyn bolady.

Ǵylymı sharanyń bas seriktesi Co­me­nius Analytica ortalyǵy qoldaýymen jýr­­­nalıstıka forýmynyń materıaldar jı­na­ǵy Slovakııanyń IRIS Publishing and printing baspa úıinde jarııalanady.

Qatysýshylar túrkııalyq ǵalym­dar­dyń ulttyq kommýnıkasııa arnalarynyń ıntegrasııasy, eýropalyq ǵalymdardyń shyndyqqa negizdelgen aqparatty oqý prosesine engizý týraly tujyrymdary aldaǵy ýaqytta akademııalyq ynty­maq­tas­tyqqa jol ashady degen senimde.

ALMATY