Sport • 12 Sáýir, 2022

Júzýden Qazaqstan quramasy álem birinshiligine daıyndyqqa kiristi

Jazǵy sport túrleri boıynsha jańa maýsym bastalyp, qurama sportshylary mańyzdy dodalarǵa daıyndyqty bastap ketti, dep habarlaıdy Egemen.kz olympic.kz saıtyna silteme jasap.

Egemen Qazaqstan

Álemdik arenada el namysyn qorǵaıtyn sportshylar qatary da irikteldi. Atap aıtqanda jaqynda júzýden Qazaqstan chempıonaty aıasynda bıylǵy álem birinshiligine baratyn sportshylar anyqtaldy. Osyǵan oraı Olympic.kz júzýden Qazaqstan chempıonatyn nátıjesi men bıylǵy álem chempıonatyna attanatyn sportshylar esimderin usynady.

Respýblıkalyq birinshilik Aqtóbe qalasynda ótti. El birinshiliginiń nátıjesinde jalpykomandalyq esepte upaı sany boıynsha 43 714 enshilegen Almaty qalasynyń quramasy kósh bastady. 35 266 upaıyn enshilegen Aqtóbe oblysyy ekinshi orynnan kórinse, Nur-Sultan qalasynyń komandasy 30 096 upaı jınap, úzdik úshtikti túıindedi.

Atalǵan el birinshiliginde Qazaqstan rekordy jańardy. Onyń avtory Aqtóbe oblysynyń ókili Dıana Tasjanova. 1500 metrdi erkin ádispen 17:31,08 sekýndta baǵyndyrǵan aqtóbelik Dıana Tasjanovaǵa tıesili.

Chempıonat qorytyndysy boıynsha #teamKZ sapynan bes sportshysy sý sporty boıynsha 19-shy álem chempıonatynyń normatıvin oryndap, dúnıejúzilik birinshilikke qatysý múmkindigine ıe boldy. Olar:

1. Ádilbek Mýsın

2. Aleksandr Varakın

3. Aıbek Qamzenov

4. Adelaıda Pchelınsev

5. Ksenııa Ignatova

«О́tken aptada biz Aqtóbe qalasynda ótken el chempıonatyn aıaqtadyq. Jarys tórt kúnge sozyldy. Biraq bizdiń komanda klımatqa beıimdelý úshin 14 kún erte kelip, oqý-jattyǵý jıynyna qatysty. Menińshe, el birinshiliginde barlyǵy joǵary dárejede nátıje kórsetip, Qazaqstan chempıonaty josparlaǵanda óte jaqsy ótti. Aqtóbelik sportshy 1500 metrge erkin júzýden respýblıka rekordyn jańartty. Ulttyq qurama sportshylary da óz kezeginde ózderiniń úzdik nátıjelerine qol jetkizdi. Al meniń osy chempıonattaǵy nátıjeme kóńilim tolady. Osylaısha bizdiń maýsymdy ashyq dep jarııalaımyz.

Bul jarys maýsym aıynyń ortasynda Býdapeshtte ótetin álem chempıonatyna irikteý kezeńi bolǵandyqtan mańyzy óte joǵary boldy. Ulttyq quramanyń negizgi quramynan bólek, jarysqa qatysý normatıvin Aıbek Qamzenov (Aqtóbe) pen Ksenııa Ignatova (Qaraǵandy) oryndady. Jastar jarady. Mańyzdy dodada ózderin jaqsy qyrynan kórsetedi dep oılaımyn. Bul óte úlken múmkindik.

Vengrııaǵa attanǵanǵa deıin sheberlikterimizdi shyńdap, daıyndyqtarymyzdy tyńǵylyqty pysyqtaýymyz qajet. Daıyndyqtyń kelesi kezeńi Taldyqorǵan qalasynda, jýyrda ǵana boı kótergen jańa sport kesheninde oqý-jattyǵý jıyny retinde ótedi. Odan keıin Ystyqkólde josparlanǵan jattyǵý jıynynda daıyndyq kezeńine núkte qoıamyz», dedi júzýden Qazaqstan quramasynyń múshesi Ádilbek Mýsın.

Aıta keterligi, júzýden álem chempıonaty 17 maýsym men 3 shilde aralyǵynda Vengrııa astanasy Býdapeshtte ótedi.

Aıana Toǵanbek

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz