Tergeý materıaldaryna sáıkes, Nurlan Aǵadilov qyzmet babyn teris paıdalanǵan. 2021 jyly 13 tamyzda qaramaǵynda jumys istegen Balymbetovten 50 myń teńgeni bopsalap alǵan.
Sol úshin qyzmet jaǵynan qoldaýǵa ýáde etken. Eks-polıseı kinásin moıyndaǵan joq. Qorǵaýshysy Jalǵas Asqarovtyń aıtýynsha, sotta taǵylǵan aıyptar rastalmady dep otyr.
«Biz osy úkimniń Qazaqstan Respýblıkasy Joǵary sotynyń qaýlylary men qylmystyq-prosessýaldyq zańnama talaptaryna saı kelmeıdi dep sanaımyz. Negizgi sot otyrysynda aıyptaýshy jaqtyń bopsalaý arqyly para alýǵa qatysty dálelderi rastalmady. Jábirlenýshi de Aǵadilovtyń aqshany bopsalap almaǵanyn málimdedi. Kómek berýdi suraǵannan keıin óz erkimen kelisken. Sol kezde Aǵadilov ony qorqytqan joq», deıdi Asqarov.
Onyń sózine qaraǵanda, jábirlenýshi ǵana emes, taǵy eki kýáger qorqytyp-úrkitýdiń bolmaǵanyn rastady. Jedel-izdestirý kezinde aýdıojazba da jasalǵan.
«О́kinishke qaraı, sot úkim shyǵarǵanda osy dálelderdi nazarǵa alǵan joq. Biz mindetti túrde appelıasııalyq shaǵym túsiremiz», dep atap kórsetti N. Asqarov.
