Kelissóz barysynda saýda jáne ınvestısııalar, tranzıt jáne kólik, sondaı-aq sý-energetıkalyq teńgerim salalaryndaǵy yntymaqtastyq máseleleri talqylandy. Álıhan Smaıylov baýyrlas eki el arasyndaǵy 30 jyldyq dıplomatııalyq qarym-qatynas kezinde saıası, saýda-ekonomıkalyq jáne mádenı-gýmanıtarlyq salalarda ózara túsinistik qalyptasqanyn atap ótti.
О́zara saýda máselesin talqylaı otyryp, Premer-Mınıstr taýar nomenklatýrasyn keńeıtý qajettigi týraly pikir bildirdi. Saýda-ekonomıka salasyndaǵy negizgi jetistik ózara saýda kóleminiń ulǵaıýy jáne belgilengen $1 mlrd-qa qol jetkizý boldy. Jańa mindet — taýar aınalymynyń kólemin $2 mlrd-qa jetkizý.
«Bizde saýdany ulǵaıtý áleýeti bar 190 taýar pozısııasy boıynsha usynys bar. Bizge Qarasý-Aqtilek ótkizý beketi mańynda ındýstrııalyq saýda-logıstıkalyq keshender qurý jobasyn iske asyrýdy jedeldetý qajet», dedi Á. Smaıylov.
Sý-energetıka salasyndaǵy ózara is-qımylǵa qatysty Mınıstrler kabınetiniń basshysy bul saladaǵy máseleler júıeli túrde sheshilip jatqanyn atap ótti. D. Dıýshekeev óz kezeginde Qyrǵyzstan tarapynyń Qazaqstannan tikeleı ınvestısııalar tartýǵa múddeli ekenin jetkizdi.
«Biz ınvestısııalyq jáne saýda saıasatyn jetildirý jolynda belsendi jumys júrgizip jatyrmyz. Bıznes júrgizý jáne kásipkerler men ınvestorlardyń quqyqtaryn qorǵaý úshin qolaıly jaǵdaılar jasalyp jatyr», dedi Qyrǵyzstannyń Qazaqstandaǵy Tótenshe jáne О́kiletti elshisi.
Sondaı-aq D.Dıýshekeev ortaq múddelerdi qanaǵattandyrý aıasynda azyq-túlik qaýipsizdigin qamtamasyz etýge qatysty usynys aıtty. Mundaı sheshimniń maqsaty – syrtqy naryqtardaǵy turaqsyzdyq jaǵdaıynda azyq-túlik qaýipsizdiginiń buzylýynyń syn-tegeýrinderin tómendetý úshin birikken saıasatty ázirleý. Kezdesý qorytyndysy boıynsha taraptar barlyq qozǵalǵan másele boıynsha ymyraǵa kelýge daıyn ekendikterin bildirdi.
