Senimdi derek kózderiniń málimeti boıynsha, reseılik enshiles qarjy ınstıtýttaryn satyp alýǵa basty úmitker – Freedom Finance banki. Frank Media aqparyna súıensek, Freedom-nan bólek, «Alfa banktiń» enshiles bankin satyp alýǵa «Evrazııalyq bank», Bank RBK jáne Orbis avtodıleri qyzyǵýshylyq tanytyp otyr.
Al «Sber» óziniń 733,9 mln dollar kólemindegi bólshek nesıe portfelin Halyk Bank-ke satty. Soǵan qaramastan sarapshylar «Sberdiń» jaǵdaıy qıyndaý ekenin, ázirge oǵan tek Freedom Finance ǵana qyzyǵyp otyrǵanyn, kelissózder júrip jatqanyn aıtady.
«Freedom Finance kapıtal 800 mln dollar bolǵan jaǵdaıda aksıonerlerge 200-300 mln dollar tóleýge daıyn. Biraq mámile tek Qazaqstan qadaǵalaýshysynyń qoldaýymen jasalady. Qıyn jaǵdaı týa qalsa «Sberbanktiń» enshiles bankine 1-1,5 mlrd dollarǵa deıin ótimdilik kerek bolady», deıdi sarapshylardyń biri. Aıtpaqshy, kelisim tolyq aıaqtalý úshin OFAC (AQSh Qarjy mınıstrliginiń qarjylyq barlaýmen aınalysatyn bólimi – red) lısenzııasy da qajet bolaryn aıta keteıik.
Qazaqstanda jumys isteıtin taǵy bir reseılik memlekettik bank VTB bank (Qazaqstan) bizdiń naryqtan ketýdi josparlamaǵan sııaqty. Al keı sarapshylar Freedom Finance-niń «Sber» men «Alfa bank» enshiles uıymdaryn satyp alý týraly aqparat naryqtyń reaksııasyn bilý nemese suranysty jasandy túrde ósirip, satylym qunyn qymbattatý úshin jasalǵan ádis bolýy múmkin degen boljaý aıtady.
«Tartymdy aktıvterdi «naryq jaǵdaıynda» satyp alý ádette menshikti kapıtal somasynan joǵary bolady. Biraq bizdiń bank sektorynda jeńildikpen jasalýy múmkin. Ásirese, bul sanksııaǵa ilikken bankterge qatysty. Olardan tez arada sanksııany qaıta alyp tastaý kepili joq bolǵandyqtan ınvestorlar úshin de reseılik bankterdi satyp alý tıimsiz bolmaq jáne satyp alýshy ınvestor nemese kompanııa AQSh-ta tirkelgen bolsa. Mysaly, Freedom Holding Corp amerıkalyq Nasdaq bırjasynda saýda jasaıdy. Iаǵnı mundaı mámilege barý úshin olarǵa mindetti túrde OFAC lısenzııasy qajet bolmaq. Jaqsy aktıvterdi basqa bankke satqannan keıin reseılik enshiles bankterdiń portfel sapasy tómendeıdi. Olardyń aktıvterine qyzyǵatyn Halyk Bank ǵana emes. Kóptegen bank meılinshe sapaly aktıvterdi nemese satyp alýshy bankterdiń portfelindegi qaryz alýshylardy satyp alýǵa tyrysady. Reseılik bankter neǵurlym ınvestor izdegen saıyn, olardyń quny da soǵurlym tómendeı bermek», dep pikir bildiredi RiskTakersKZ sarapshylary.
Freedom Finance rasymen reseılik enshiles bankterge qyzyǵyp otyr degenniń ózinde, olardy asyraı alatyndaı áleýeti joq dep biledi kanal ekspertteri.
«FF Kassa Nova-ny satyp aldy, biraq áli kúnge túsinikti bıznes model qalyptastyra qoıǵan joq. Olarda belsendiliktiń basym bóligi baǵaly qaǵazdar baǵytyna jumsalyp jatyr. Kishkentaı banktiń ornyqtylyǵyn qamtamasyz ete alý úshin aksıonerde qajetti kapıtal bolýǵa tıis. Bul – aksıoner aýystyrýǵa baılanysty qadaǵalaýshynyń kelisimin alar sáttegi eń basty shart. Eger osy jaǵdaılar qańtarǵa deıin bolǵan bolsa bálkim, Jusan óz qalaýyn kórseter me edi. Biraq dál qazir olardyń óz qıyndyǵy óz basyna jetip artylady. Reseılik bankterdiń jańa aksıoneri kim bolaryn tap basyp aıtý qıyn», deıdi RiskTakers.
