«Qarjy pıramıdasyna qatysty is boıynsha taǵy úsh fıgýrant anyqtaldy. Másele «MUDARABAN CAPITAL» seriktestiginiń qatysýshylary – buǵan deıin «kepilmen bosatý» bultartpaý sharasy tańdalǵan Sh. jáne T.esimdi azamattar, sondaı-aq sotqa deıingi tergeý barysyna «úıqamaqqa» alynǵan M. jáne K.esimdi azamattar týrasynda bolyp otyr», dedi vedomstvodan.
Eske salaıyq, atalǵan tulǵalar QR Qylmystyq kodeksiniń 217-baby 3-bóligi boıynsha Almaty qalalyq Polısııa departamenti Tergeý basqarmasy tergep jatqan qylmystyq is boıynsha kúdikti retinde tanylǵan edi.
«Almaty qalalyq Polısııa departamenti qylmystyq isti qarjy pıramıdasyn qurý jáne uıymdastyrý faktisi boıynsha «ASTEX.KZ» JShS jáne «ACD technology» JShS-lardyń laýazymdy tulǵalarynyń ústinen azamattar toby bergen ujymdyq aryz negizinde tirkegen bolatyn», dedi qalalyq Polısııa departamenti bastyǵynyń orynbasary Rýstam Abdrahmanov.
Anyqtalǵandaı, 2009 jyldyń aqpany men 2021 jyldyń qańtary aralyǵynda atalǵan JShS-lardyń laýazymdy tulǵalary memlekettik satyp alýlarǵa qatysý jeleýimen aqsha qarajatyn tartý úshin jeke jáne zańdy tulǵalarmen birlesken qyzmet týraly kelisimsharttar jasasqan.
«Ekijaqty qujatqa sáıkes fırmalar árbir salymshyǵa aı saıyn salynǵan sýmmadan 20 paıyz tólep otyrýy tıis bolǵan. 5 mlrd teńge kólemindegi aqsha qarajaty «ASTEX.KZ» JShS-ǵa 162 salymshydan ózge kompanııa - «MUDARABAN CAPITAL» JShS-dan túsip otyrǵan», dep naqtylady vedomstvonyń baspasóz qyzmetinen.
Eske salaıyq, atalǵan iske qatysy bar degen kúdikpen tanymal vaınerler Meıirjan Tórebaev pen Meıirhan Shernııazov kúdikti retinde ustalǵan bolatyn.
Keıin tergeý soty ekeýine qatysty «kepilmen bosatý» túrindegi bultartpaý sharasyn sanksııalady. Úshinshi kúdikti – taǵy bir tanymal vaıner Azımjan Saıdbaevqa izdeý jarııalandy.
15 sáýir kúni Bas prokýrordyń orynbasary Áset Shyndalıev qarjy pıramıdasyn qurý isi boıynsha tergeý aıaqtalǵanyn málim etken edi.
«Qazir is boıynsha tergeý aıaqtaldy, ıaǵnı tanystyrý kezeńi ótip jatyr. Osy qylmysqa qatysty barlyq kúdiktiniń is-qımylyna baǵa berilip, olarǵa aıyp taǵyldy. Bul rásimder aıaqtalǵannan keıin, ony prokýrorǵa joldaıdy. О́z kezeginde prokýror isti sotqa baǵyttaıdy», degen edi Bas prokýrordyń orynbasary.
