Jańadan paıda bolǵan bul memlekettik qyzmetti Semeı synaq polıgony aýmaǵynda 1949-1990 jyldar aralyǵynda turǵan azamattar paıdalana alady.
«Memlekettik qyzmettiń kómegimen azamattarǵa jeńildikter men ótemaqylar alý quqyn rastaıtyn kýálik alý múmkindigi beriledi. Jańa qyzmet eGov.kz portalynda tegin kórsetiledi jáne 2022 jyldan bastap qoljetimdi. Qyzmet iske qosylǵannan beri 311 azamat onlaın rejiminde kýálik pen ótemaqy alýǵa ótinish berdi. Osyndaı qyzmet elimizdegi Halyqqa qyzmet kórsetý ortalyǵynda da kórsetiledi. Biraq byltyr 7 myńǵa jýyq adam qaǵaz túrinde ótinish bergen», deıdi «Ulttyq aqparattyq tehnologııalar» AQ basqarma tóraǵasy Rostıslav Konıashkın.
Onyń aıtýynsha, buryn mundaı qyzmet túri qaǵaz túrinde ǵana kórsetilip kelgen. Keıin azamattarǵa yńǵaıly bolý úshin memlekettik organdarmen birlese otyryp, qyzmet túri onlaın formatqa kóshirilgen.
Qyzmetti paıdalaný úshin egov.kz portalyna kirip, basty bettegi «Áleýmettik qamsyzdandyrý» bólimin ashyp, «Otbasylarǵa kómek» tarmaǵyn tańdaý qajet. Osy bólimniń ishinde qajet qyzmet túri jazylǵan. Ári qaraı paıdalanýshy portalda tirkeýden ótip, onlaın qyzmetke tapsyrys beredi. Barlyq qajetti joldy toltyrǵannan keıin ESQ nemese eki faktorly aýtentıfıkasııa kómegimen ótinimge qol qoıady.
«Memlekettik qyzmetti kórsetý nátıjesi 20 jumys kúni ishinde daıyn bolady jáne paıdalanýshynyń «Jeke kabınetinde» habarlama túrinde saqtalady. Habarlamany alǵannan keıin ótinish berýshi turǵylyqty mekenjaıynda ornalasqan jumyspen qamtý jáne áleýmettik baǵdarlamalar bólimine baryp, jeke kýáliktiń telnusqasyn alýy qajet. Birjolǵy memlekettik aqshalaı ótemaqy óńirler, respýblıkalyq mańyzy bar qalalar jáne memleket astanasy boıynsha ótemaqy tóleý kestesine sáıkes júzege asyrylady», deıdi mamandar.
