Delegasııa quramyna Sıfrlyq damý, ınnovasııalar jáne aeroǵarysh ónerkásibi mınıstrligi, «NZM» AQ jáne IT kompanııalardyń ókilderi endi. Sondaı-aq Mańǵystaý oblysynan «Mediana Services Limited» IT kompanııasynyń basshysy, Mańǵystaý oblysy О́ńirlik keńesiniń múshesi О́mirbek Qurbanbaev qatysty.
Sapar barysynda qazaqstandyq tarap Estonııanyń memlekettik qyzmetter salasynda sıfrlyq keńistik qurý, medısınanyń elektrondyq júıeleri, salyq, kedendik ákimshilendirý, bilim berý, kólik logıstıkasy, sondaı-aq tehnologııalyq habtardy qalyptastyrý tájirıbesimen tanysty. Qazaqstandyq qatysýshylar mundaı kezdesýlerdiń paıdaly ekenin atap ótti. Estonııa tarapy da bolashaqta qos el arasyndaǵy aqparat almasýdy jáne baılanystardy ózektendirý úshin osyndaı is-sharalardyń mańyzdylyǵyna nazar aýdardy.
Shara barysynda qazaqstandyq «Mediana Services Limited» IT kompanııasy men Estonııanyń «IN Deal OÜ» arasynda yntymaqtastyq týraly memorandýmǵa qol qoıý rásimi ótti. Oǵan qazaq eli tarapynan kompanııa jetekshisi О́mirbek Qurbanbaev qol qoıdy. Osylaısha qazaqstandyq IT sheshimder tıisti deńgeıde jáne Eýropa elderine eksporttaýda úlken áleýetke ıe bolmaq.
«Qol qoıylǵan qujat eki jaqty yntymaqtastyq jobalardy iske asyrýǵa, bizdiń kompanııanyń IT ónimderin Estonııaǵa jáne Eýroodaq naryqtaryna shyǵarýǵa, estondyq bıznes-áriptesimizdiń qazaq naryǵyna kelýine yqpal etedi. Naqty aıtatyn bolsaq, Tallınn qalasynda keńsemizdi ashyp, eki IT-ónimimizdi Eýropa naryǵyna beıimdep eksportqa shyǵarýdy qolǵa alamyz. Kásiporyndarǵa arnalǵan korporatıvtik smart IoT sheshimderimiz jáne bilim berý salasyndaǵy balabaqshalarǵa arnalǵan ınteraktıvtik-baǵdarlamalyq jobamyz bar. Osy eki jobamen naryqqa qadam bastap jatyrmyz», deıdi О́. Qurbanbaev.
Bul kelisim eki eldiń elshilikteri men Astana dıplomatııalyq klýby birlesip Estonııanyń sıfrlyq tájirıbesin zerdeleý sheńberinde uıymdastyrǵan qazaqstandyq delegasııanyń 2021 jylǵy qarashadaǵy saparynyń jemisi.
