Sport • 21 Sáýir, 2022

Iýlııa Pýtınseva Ystanbul týrnıriniń ekinshi aınalymyna shyqty

173 ret
kórsetildi
1 mın
oqý úshin

Qazaqstandyq, álemniń 51-raketkasy Iýlııa Pýtınseva Ystanbul WTA 250 týrnıriniń ekinshi aınalymyna shyqty, dep habarlaıdy Egemen.kz QTF baspasóz qyzmetine silteme jasap.

Iýlııa Pýtınseva Ystanbul týrnıriniń ekinshi aınalymyna shyqty

Qazaqstandyq tennısshi bastapqy kezdesýin álemniń 57-raketkasy, Polsha ókili Magda Lınetpen ótkizdi. Buǵan deıin qarsylastar ózara bes ret kezdesip, sonyń tórteýinde M.Lınett jeńgen edi. Bul joly birinshi partııada Pýtınseva 4:1 esebimen alǵa uzady. Polıak qyzy da qalyspaı, tarazy basyn teńestirgenimen, qazaqstandyq tennısshi taı-breıkte sátti oınady. Esep 7:6 (8:6). Ekinshi sette Iýlııa 6:4 esebimen basym tústi.

Eki saǵat 8 mınýtqa sozylǵan tartysty matchta Pýtınseva 1 eıspen birge 9 breık-poınttyń beseýin paıdalana bildi. Iýlııa júlde qory 239 477 AQSh dollaryna baǵalanǵan jarystyń shırek fınalyna shyǵý úshin álemniń 76-raketkasy, shvesııalyq Rebekka Petersonmen saıysqa túsedi.