Jol qozǵalysyn jolǵa qoıatyn tujyrymdama

«Qalanyń bas josparynda kóliktik damý bólimi bar. Biraq ýaqyt talaby men ýrbanızasııany, jańa syn-tegeýrinderdi eskere otyryp, burylý alańdary, jaıaý júrginshiler, baǵdarshamdar jáne basqa da máselelerdi jazyp, keshendi kólik shemasynyń damýyn jeke bólip kórsetý qajet. Álemdik tájirıbede qalalyq jáne kóliktik josparlaý – qala qurylysynyń ózara baılanysty jáne ózara táýeldi elementteri», dedi B.Igenberdınov.

Sonymen qatar kólik kom­panııa­synyń basshysy qala­lyq kólikti basqaratyn uıym­dar ara­syn­daǵy úılestirý jumys­ta­ryn kúsheıtý qajet ekenin atap ótti.

«Buǵan qosa magıstraldy kó­she­ler men ózen arqyly ótetin kópirler sanyn arttyrý qajet. Turǵyn oramdary qurylysyn kólikter aýqymyn eskere otyryp josparlaý kerek. Bul rette qalalyq kólikti basqarý salasyn­da­ǵy strategııalyq qujat – ke­shen­di kólik shemasyn jasaý eń du­rys sheshim bolady», dedi B.Igen­berdınov.

Keshendi kólik shemasy (KKS) qalada qalalyq kólikti uıym­das­tyrý men basqarýǵa qatysty qoldanystaǵy quqyqtyq júıedegi olqylyqtar men qaıshylyqtardy anyqtaıdy, jer paıdalaný men qalalyq kólikti josparlaýdy, qalalyq kólik salasyna tartylǵan organdardyń fýnksııalary men óki­let­tikterin biriktiredi. Son­daı-aq qoǵamdyq kólik, jol-kó­lik ınfraqurylymy, jol qozǵa­­lysyn uıymdastyrý, kólik aǵyn­­da­ryn basqarý, turaq keńis­tigi jáne t.b. salalardaǵy prob­le­ma­lar­dy sheshýdi usynady.

Keshendi kólik shemasynyń tujyrymdamasyn qalalyq máslıhat bekitti. Úkimetpen, In­dýs­trııa jáne ınfra­qury­lym­dyq damý mınıstrligimen birlesip qarjylandyrý kózderi kelisiledi. Budan ári KKS-ti iske asyrý qol­ǵa alynady. KKS ázirleýmen qatar Nur-Sultan qalasynyń aýma­ǵyn 2025 jylǵa deıin damytý baǵdarlamasynda nysanaly kór­setkishterdi nazarǵa alý qajet.

Aıta ketý kerek, elorda ákim­digi jol ınfraqurylymyn damy­tý­ǵa erekshe kóńil bóledi. Osy jyly 100-ge jýyq kóshe salynyp, jóndeledi. Keıingi eki jylda 300-ge jýyq kóshe jóndeldi, onyń jartysy – turǵyn úı alap­ta­ryndaǵy kósheler.

Sonymen qatar Uly dala dańǵy­lynda eki avtokólik kópiri­niń qurylysy júrip jatyr. Bul osy jyly aıaqtalady. Esil ózeni arqyly Táýelsizdik dańǵy­lyn­da­ǵy kópirdiń qurylysy 2023 jyly aıaqtalady. Bul jumystar aıaqtalsa, joldaǵy trafık aıtar­lyq­taı jeńildeıdi. Sondaı-aq Alash tas joly boıyndaǵy kópi­r­ge («búkir kópir») kúrdeli jón­deý, jańa jolaıyryqtaryn jobalaý jáne t. b. jumystar júr­gi­zi­lip jatyr.