Taý-tasty erkin kezip júrgen túz taǵylaryn sanaý bir-eki kúndik jumys emes. Aptaǵa, aıǵa sozylady. «Katonqaraǵaı» ulttyq parkinde sanaq jumystaryna 248 ınspektor men janýarlardy qorǵaý jáne óndirý bóliminiń 5 mamany qatysty. Sanaq jumystary kezinde qoryqshylar jabaıy ańdar shoǵyrlanǵan jerlerde izderin sanady, kózge tússe, ózderin sanady. Fototuzaqqa túskenderi jáne bar.
Janýarlardy qorǵaý jáne óndirý bóliminiń bastyǵy Erik Qasymovtyń aıtýynsha, tuıaqty ańdardan taýteke, maral, elik, qaban shoshqa, kúdir, bulannyń sandary turaqty. Sonymen qatar terisi baǵaly bulǵyn, túlki, sý kúzeni sekildi ańdar da kemip, bolmasa kóbeıgen joq. Jyrtqyshtardyń sany da turaqty.
– Sanaq jumystaryna ınspektorlar kádimgideı daıyndalady. Ań-qustardyń izimen taý kezý qıynnyń qıyny. Jetken jerimizge deıin avtokólikpen, odan ári atpen júremiz. At tuıaǵy baspaıtyn jerlerge jaıaý shyǵýǵa májbúrmiz. Jabaıy ańdar júretin jerlerge fototuzaq quramyz. Jabaıy ań-qustar shoǵyrlanǵan jerler dronmen de baqylandy, – deıdi E.Qasymov.
Esterińizde bolsa, «Katonqaraǵaı» ulttyq tabıǵı parkiniń aýmaǵyna qurylǵan fototuzaqqa «Qyzyl kitapqa» engen qar barysy, Altaı ulary túsken edi. Mamandardyń pikirinshe, jabaıy ań-qustar sanynyń turaqty bolýy – jaz, kúz aılarynda daıyndalǵan azyq pen naýaǵa sebilgen tuzdyń nátıjesi. Altaıdy meken etetin ań-qustardyń túrine keler bolsaq, ulttyq tabıǵı park aýmaǵynda qosmekendilerdiń 3 túri, baýyrymen jorǵalaýshylardyn 6, súıekti balyqtardyń 17, sútqorektilerdiń 67, qustardyń 280-nen astam túri bar. Al omyrtqasyz janýarlardyń 1 500 túri mekendeıdi eken. Qazaqstannyń «Qyzyl kitabyna» engen sútqorektilerdiń 5 túrin (Altaı arqary, tas sýsary, qar barysy, sabanshy jáne Ikonnıkov jarqanaty), qustardyn 21 túrin (búrkit, ıtelgi, altaı ulary, sur tyrna, qara degelek, balyqshy tuıǵyn) park aýmaǵynan kezdestirýge bolady.
