«Bul mektepke aıtýly aqyn esimi tegin berilgen joq. Endi oqýshylar Ilııas atamyzdyń shyǵarmalaryn oqyp, izdenip, zertteıdi dep oılaımyn. Bala kúnimizden aqynnyń «Qulager» poemasyn oqyp óstik. Qazir osy mektepte atalǵan týyndyny jatqa aıtatyn oqýshylardyń bar ekenin bilemin. Árıne, oǵan qýanamyz. Mekteptegi oqýshylardyń bilim sapasy jaqsy. Osy tóńirektegi qazaq mektepteriniń aldy deýge bolady. «Gıdroponıka», «Raketa modeldeý» zerthanalary ashyldy. Endi mektep janynan jylyjaı salynyp jatyr. Osynyń bári oqýshylarǵa jasalyp jatqan jaǵdaı», dedi Bilim basqarmasynyń basshysy.
Sodan keıin sóz alǵan Memlekettik Eltańba avtorlarynyń biri, sáýletshi Jandarbek Málibek tuǵyrly tulǵa týraly oı tolǵap, «Ilııas aǵamyzdyń amanatyna adal bolyńdar» dep oqýshylarǵa batasyn berdi. Al murajaıdyń ashylýyna Qaraǵandydan ádeıi kelgen aqynnyń urpaǵy, Sáken Seıfýllın atyndaǵy Qazaq drama teatrynyń aktrısasy Nurjibek Jansúgirova osy is-sharanyń basy-qasynda júrgen azamattarǵa alǵysyn aıtty.
«Men Ilııas atamyzdyń týǵan inisi Qyzyrbektiń nemeresimin. Atam soǵysqa qatysqan ardager. Tórt klastyq bilimi bolsa da aǵasynyń barlyq óleńin jatqa aıtatyn. Halqymyz «Sáken, Ilııas, Beıimbetti» úsh báıterek dep qadir tutty. Osy arystardyń rýhyna bas ıemin. Olardyń týǵan eli úshin jasaǵan eńbegi jas urpaqqa úlgi» deı kelip, murajaıǵa Ilııas atasynyń 60-shy jyldary shyqqan tańdamalysy men atasy Qyzyrbek Jansúgirovtiń fotosyn syılady.
Jańa ashylǵan murajaıǵa Ilııas Jansúgirovtiń 20 tomdyq jınaǵy men jeke qujattarynyń kóshirmeleri qoıylǵan. Sondaı-aq aqynnyń otbasy men jyr dúldúliniń shyǵarmashylyǵyn zerttegen birqatar ǵalym jaıynda málimet berilgen.
Odan soń qonaqtar bilim ordasyndaǵy «Gıdroponıka», «Raketa modeldeý» zerthanasyn baryp kórdi. Munda oqýshylar zertteý jumystarymen aınalysady. Máselen, 2019 jyly Baıqońyr qalasynda ótken «Ǵylym álemin ashamyz» HV halyqaralyq jarysynda osy mektep oqýshylary «Gıdroponıka», «Raketa modeldeý» boıynsha júldeger atanǵan. Sonymen qatar mektepte jaratylystaný pánin aǵylshyn tilinde júrgizýdiń qanatqaqty jobasy engizilgen.
Is-shara sońy mektep oqýshylary daıyndaǵan konsertke ulasyp, onda jaqynda ótken «Ilııas oqýlary» qalalyq baıqaýynyń júldegerleri marapattaldy.
P.S. Atalǵan bilim ordasyna aqyn esimi 2020 jyly berilipti. Sodan beri eki jyl ótti. Alaıda mektep mańdaıshasynan Ilııas Jansúgirov atyndaǵy №58 mektep-gımnazııasy degen jazýdy kóre almaı, kóńilimiz kúpti boldy.
