Petropavlda Ýálıhanov kóshesindegi jol qozǵalysy rettelmeıtin jaıaý júrginshiler ótkelinde Toyota RAV-4 avtokóliginiń júrgizýshisi 49 jastaǵy qala turǵynyn qaǵyp ketken. Budan keıin júrgizýshi bir baǵytta ketip bara jatqan Volkswagen avtokóligimen soqtyǵysqan.
Jol-kólik oqıǵasy saldarynan áıel medısınalyq mekemesine jedel járdem kóligimen jetkizildi. Toyota tizgininde 54 jastaǵy turǵyn bolǵan. Medısınalyq kýálandyrý onyń masań kúıde bolǵanyn kórsetti.
Atalǵan fakt QR Qylmystyq kodeksiniń 345-1 baby (Alkogoldik, esirtkilik jáne (nemese) ýytqumarlyq masań kúıde kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) boıynsha Sotqa deıingi tergep-tekserýlerdiń biryńǵaı tizilimine engizildi. Saraptamalar taǵaıyndaldy. Avtokólik arnaıy turaqqa qoıyldy.
«Jalpy 3 aıdyń ishinde oblys aýmaǵynda mas júrgizýshilermen 4 jol-kólik oqıǵasy jasaldy. Sonyń saldarynan 3 adam qaza taýyp, 2-ýi jaraqat alǵan. Avtokólikten keletin qaýip joǵary, ony masań kúıde basqarýǵa jol berilmeýi tıis. Polıseıler osyndaı faktilerdi anyqtaý jáne jolyn kesý boıynsha maqsatty jumys júrgizedi. Jyl basynan oblys boıynsha 263 mas júrgizýshi ákimshilik jaýapkershilikke tartyldy», deıdi SQO Polısııa departamenti Jergilikti polısııa qyzmeti basqarmasynyń bastyǵy Aıdyn Baımatov.
